ފުރާވަރަށް އަރަމުން އަންނަ އަންހެންކުދިންގެ މައްސަރުކަންތައް ޤަވާއިދުން ނުހިނގުމަކީ ގިނަ ބެލެނިވެރިންގެ ފަރާތުން މާ ބޮޑު ސަމާލުކަމެއް ނުލިބި ދޫކޮށްލެވޭ ކަމެކެވެ. ގިނަ ފަހަރަށް މިއީ ފުރާވަރުގެ ޢުމުރުގައި އާންމުކޮށް ދިމާވާ، ދުވަސްކޮޅަކުން އަމިއްލައަށް ރަނގަޅުވެދާނެ ކަމެއް ކަމަށް ހީކުރެވެއެވެ.
ސިއްހީ ދިރާސާތަކުން ކަށަވަރުވާ ގޮތުގައި، ފުރާވަރު ޢުމުރުގައި ދިމާވާ މިފަދަ މައްސަލަތައް ކުރީކޮޅުގައި ދެނެގަނެ، އެކަށީގެންވާ ފަރުވާ ހޯދުމަކީ މުސްތަޤުބަލުގައި ދުޅަހެޔޮ ޖީލެއް ބިނާކުރުމަށްޓަކައި ކޮންމެހެން މުހިންމު ކަމެކެވެ.
އިންޑިއާގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް)ގެ ކުޑަކުދިންގެ ހޯމޯންގެ ބަލިތަކާ ބެހޭ ޚާއްސަ ޕްރޮފެސަރު ޑރ. ރަޖްނީ ޝަރުމާގެ ދިރާސާތަކަށް ބަލާއިރު، މި މައްސަލަ އަންނަނީ ދުނިޔޭގެ އެކި ކަންކޮޅުތަކުގައި ބާރަށް އިތުރުވަމުންނެވެ.
ފަހުގެ ހޯދުންތަކުން ދައްކާގޮތުގައި، ކޮންމެ ފަސް އަންހެންކުއްޖަކުން އެއްކުއްޖަކީ ޙައިޟުވުމުގައި ޤަވާއިދުން ބޭރުވުމުގެ މައްސަލަ ތަހައްމަލުކުރަމުންދާ ކުއްޖެކެވެ. މީގެ ތެރެއިން ގިނަ ކުދިންނަކީ ހޯމޯންތަކުގެ މައްސަލަތަކުގެ ސަބަބުން ކުރިން "ޕީސީއޯއެސް" (ޕޮލިސިސްޓިކް އޯވަރީ ސިންޑްރޯމް)ގެ ނަމުން މަޝްހޫރުވެފައިވާ "ޕީއެމްއޯއެސް" (ޕޮލިއެންޑޯކްރިން މެޓަބޮލިކް އޯވަރިއަން ސިންޑްރޯމް) ފަދަ ބަލިތަކަށް ހުށަހެޅުމުގެ ފުރުސަތު ބޮޑު ކުދިންނެވެ.
ފުރާވަރުގެ އަންހެންކުދިންގެ ޙައިޟުގެ ނިޒާމަށް އަންނަ ބަދަލުތަކާ އެކު ކުރީކޮޅުގައި ސިއްހީ އެހީތެރިކަން ހޯދުމަކީ ކޮންމެހެން މުހިންމުކަމެއް--ފޮޓޯ/ޕިންޓްރެސްޓްދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ)ގެ ތަފާސްހިސާބުތަކަށް ބަލާއިރު، ދަރިމައިވުމުގެ ޢުމުރުގެ އަންހެނުންގެ ތެރެއިން %10 އާއި %13އާ ދެމެދުގެ ނިސްބަތެއްގެ މީހުން މިފަދަ މައްސަލަތައް ތަޙައްމަލުކުރާއިރު، އޭގެ ތެރެއިން %70 މީހުންނަކީ އެކަން ރަސްމީކޮށް ދެނެގަނެވިފައި ނުވާ މީހުންނެވެ.
އަންހެންކުއްޖަކު އަލަށް ޙައިޟުވާ ދުވަސްވަރުން ފެށިގެން ފުރަތަމަ އަހަރުގެ ތެރޭގައި މި ނިޒާމު ޤަވާއިދުން ނުހިނގުމަކީ ހޯމޯންތަކަށް އަންނަ އާދައިގެ ބަދަލެކެވެ. އެހެންނަމަވެސް، ފުރަތަމަ އަހަރަށްފަހު، ދެ ޙައިޟުގެ ދެމެދުގައިވާ މުއްދަތު 21 ދުވަހަށްވުރެ ކުރުވުން ނުވަތަ 45 ދުވަހަށްވުރެ ދިގުވުމަކީ ސަމާލުވާންޖެހޭ ކަމެކެވެ. އަދި ބާލިޣުވިތާ ތިން އަހަރުވުމަށްފަހު، އެ މުއްދަތު 21 ދުވަހަށްވުރެ ކުރުވުން ނުވަތަ 35 ދުވަހަށްވުރެ ދިގުވުމަކީ ސިއްހީ އެހީތެރިކަން ހޯދަންޖެހޭނެ ހާލަތެކެވެ. ޚާއްސަކޮށް، ވިދިވިދިގެން ތިން މަސްދުވަސް ވަންދެން ޙައިޟުނުވެ ދިއުމަކީ ވަގުތުން ޑޮކްޓަރެއްގެ ލަފާ ހޯދަންޖެހޭ މުހިންމު ސިގުނަލެއް ކަމަށް ޑރ. ރަޖްނީ ޝަރުމާ ވިދާޅުވެއެވެ.
މި މައްސަލައިގެ އަސްލަކީ ހަމައެކަނި ރަހިމާއި އޯވަރީއަށް ދިމާވާ ކަންކަމެއް ނޫނެވެ. ތައިރޮއިޑް ގްލޭންޑްގެ މައްސަލަތަކާއި، ވިރާސީ ބަލިތަކުގެ އިތުރުން 'ޕްރޯލެކްޓިން' ހޯމޯން މަތިވުން ފަދަ ސިއްހީ ސަބަބުތައް މީގެ ފަހަތުގައި ހިމެނެއެވެ. މީގެއިތުރުން، ޒަމާނީ ދިރިއުޅުމުގެ ވައްޓަފާޅިއަށް އައިސްފައިވާ ބަދަލުތަކުގެ ތެރޭގައި ހިމެނޭ ސިއްހަތަށް ފައިދާނެތް ކާނާ ބޭނުންކުރުމާއި، ކަސްރަތު މަދުވުމާއި، ނިދިމަދުވުމުގެ އިތުރުން ސްކްރީންތަކަށް ދެވިހިފުމާއި ކިޔެވުމުގެ ސްޓްރެސްއަކީވެސް ހޯމޯންތަކުގެ ހަމަޖެހުން ގެއްލުވާލާ މައިގަނޑު ސަބަބުތަކެވެ.
މިފަދަ ކަންކަމަށް އަޅާނުލައި ދޫކޮށްލުމަކީ ދުރު މުސްތަޤުބަލުގައި ދަރިމައިވުމުގެ ނިޒާމަށް އެކަނި ނުރައްކާވާ ކަމެއް ނޫނެވެ. އޭގެ ނޭދެވޭ އަސަރު މުޅި ހަށިގަނޑަށް ފޯރައި، ކަށިތައް ދެރަވުމާއި، ހަކުރުބައްޔާއި، ލޭގެ ޕްރެޝަރު މަތިވުމާއި، ފެޓީ ލިވާ ފަދަ ދާއިމީ ބަލިތަކަށް މަގުފަހިކުރުވައެވެ. ހަމައެއާއެކު، މޫނުގައި އާދަޔާޚިލާފަށް އިސްތަށި ފެޅުމާއި، ބިހިނެގުން ފަދަ ސަބަބުތަކާހުރެ ކުއްޖާގެ އަމިއްލަ ނަފްސަށް އޮންނަ އިތުބާރު ކެނޑި، ނަފްސާނީ ބޮޑެތި މައްސަލަތަކާ ކުރިމަތިލާން ޖެހެއެވެ.
އެހެންކަމުން، ފުރާވަރުގެ އަންހެންކުދިންގެ ޙައިޟުގެ ނިޒާމަށް އަންނަ ބަދަލުތަކަކީ އާދައިގެ ކަމެއްގެ ގޮތުގައި ދޫނުކޮށްލައި، ކުރީކޮޅުގައި ސިއްހީ އެހީތެރިކަން ހޯދުމަކީ ކޮންމެހެން މުހިންމު ކަމެކެވެ. ދިރިއުޅުމުގެ އާދަކާދައަށް ހެޔޮ ބަދަލުތަކެއް ގެނެސް، ފައިދާހުރި ކާނާ ބޭނުންކުރުމާއި، ޑޮކްޓަރުންގެ އިރުޝާދުގެ ދަށުން ފަރުވާ ހޯދުމަކީ ކުއްޖާގެ ދުޅަހެޔޮ މުސްތަޤުބަލެއް ކަށަވަރުކުރުމަށްޓަކައި އެޅޭނެ އެންމެ މުހިންމު ފިޔަވަޅެވެ.