ޚިޔާލަށް ގެންނަވާށެވެ. މައްޗާއި ތިރި ވަކިކުރަން ނޭނގޭ، ފެންތިކިތައް ވައިގެ ތެރޭގައި އުދުހޭ، އަދި ކޮޅަށް ހުރުމަށް ހަށިގަނޑުގެ މަސްތަކުގެ ބޭނުން ނުޖެހޭ މާހައުލެއްގައި ހޭލެވޭ ދުވަހެކެވެ. މިއީ ބައިނަލްއަގުވާމީ ޖައްވީ ސްޓޭޝަން (އައިއެސްއެސް) ގައި ދިރިއުޅޭ އެސްޓްރޮނޯޓުންގެ އާންމު ދިރިއުޅުމެވެ. މިކަންކަން އެނގުން މުހިންމު ވަނީ ކީއްވެގެން ހެއްޔެވެ؟ ސަބަބަކީ، ދުނިޔެއިން ބޭރުގައި އިންސާނުން ދިރިއުޅޭނެ ގޮތް ދެނެގަތުމަކީ، މުޅި ކާއިނާތު ހޯދައި ބެލުމަށް އެޅޭ އެންމެ ފުރަތަމަ ފިޔަވަޅަށް ވާތީއެވެ. ދުނިޔޭގެ ދަމާބާރު ނެތް މާހައުލެއްގައި އިންސާނުން ދިރިއުޅެނީ ކިހިނެއްކަން ބަލައިލާނަމެވެ.
ބައިނަލްއަގުވާމީ ޖައްވީ ސްޓޭޝަން ނުވަތަ އައިއެސްއެސް އަކީ އެމެރިކާ، ރަޝިޔާ، ޔޫރަޕް، ޖަޕާން އަދި ކެނެޑާ ގުޅިގެން ޖައްވުގައި ބިނާކޮށްފައިވާ ބޮޑު ލެބޯޓަރީއެކެވެ. ނާސާއިން ބުނާ ގޮތުގައި، ފުޓުބޯޅަ ދަނޑަކާ އެއްވަރުގެ ބޮޑުމިން ހުންނަ މި ސްޓޭޝަން ދުނިޔެ ވަށައި ދަތުރުކުރަނީ ގަޑިއިރަކު ގާތްގަނޑަކަށް 28،000 ކިލޯމީޓަރުގެ ބާރުމިނުގައެވެ. އެހެންކަމުން ކޮންމެ 90 މިނެޓަކުން އެއްފަހަރު މި ސްޓޭޝަން ދުނިޔެ ވަށައި ބުރެއް ޖަހައެވެ. އެހެންކަމުން މިނއުޅަނދުގައި ތިބޭ ބަޔަކަށް ކޮންމެ ދުވަހަކު 16 ފަހަރު ދުނިޔެއަށް އިރުއަރާ އޮއްސޭ މަންޒަރު ފެންނާނެއެވެ. އެއްވަގުތެއްގައި އާންމު ގޮތެއްގައި މި ސްޓޭޝަންގައި 7 އެސްޓްރޮނޯޓުން ދިރިއުޅޭނެއެވެ. މި ސްޓޭޝަންގެ މައިގަނޑު ބޭނުމަކީ ބިމުގެ ދަމާބާރު ނެތް މާހައުލެއްގައި ސައިންސާއި ބޭސްވެރިކަމުގެ ތަހުލީލުތައް ކުރުމާއި، ކުރިމަގުގައި ކުރާ ޖައްވީ ދަތުރުތަކަށް ބޭނުންވާނެ އާލާތްތައް ޓެސްޓުކުރުމެވެ. 1998 ވަނަ އަހަރު ޖައްވަށް ފޮނުވާލި މި ސްޓޭޝަންގައި، ނޮވެންބަރު 2000 އިން ފެށިގެން މެދުކެނޑުމެއް ނެތި އިންސާނުން ދަނީ ދިރިއުޅެމުންނެވެ.
އައިއެސްއެސްގައި އެސްޓްރޮނޯޓުން ދުވަސްތައް ހޭދަކުރަނީ ވަކި މުއްދަތަކަށެވެ. އާންމު ގޮތެއްގައި ކޮންމެ ފަޅުވެރިއަކުވެސް ހަ މަސް ދުވަސް އެތާނގައި ހޭދަކުރެއެވެ. އެއް ބަޔަކު ގޮސް އެ މުއްދަތު ހަމަވުމުން، ދެން އަންނަނީ އެހެން ބައެކެވެ. ސްޓޭޝަންގައި ފަޅުވެރިން ކުރަންޖެހޭ މައިގަނޑު މަސައްކަތްތަކުގެ ތެރޭގައި، ސައިންޓިފިކް ތަހުލީލުތައް ކުރުމާއި، ސްޓޭޝަންގެ މެޝިންތައް މަރާމާތުކޮށް ބެލެހެއްޓުމާއި، ސާފުކުރުމުގެ އިތުރުން ގަވާއިދުން ކަސްރަތުކުރުން ހިމެނެއެވެ. ޖާގައިގެ ގޮތުން ދަތި އަދި ބަންދުވެފައިވާ މާހައުލެއްގައި، ވަކި ބަޔަކާއެކު އެ މީހުން ދިރިއުޅެން ޖެހޭއިރު، ބިމުގެ ދަމާބާރު ނުވަތަ ގްރެވިޓީ ވަރަށް ކުޑަވުމުގެ ސަބަބުން ދުނިޔެމަތީގައި އުޅޭ ގޮތަކަށް އެތާނގައެއް ނޫޅެވެއެވެ.
ކަސްރަތުކުރުން:
ދުނިޔެމަތީގައި ނަމަ، އަހަރެމެން ކޮޅަށް ތިބޭއިރުވެސް ބިމުގެ ދަމާބާރާ ދެކޮޅަށް ހަށިގަނޑު ހިފެހެއްޓުމަށްޓަކައި ކަށިތަކާއި މަސްތަކުގެ ބޭނުން ހިފައެވެ. ނަމަވެސް ޖައްވުގައި ދަމާބާރު ގާތްގަނޑަކަށް ނެތުމުން، ހަށިގަނޑު ހިފެހެއްޓުމަށް މަސްތަކާއި ކަށިތަކުގެ ބޭނުމެއް ނުޖެހެއެވެ. އޭގެ ސަބަބުން، ގަވާއިދުން ކަސްރަތު ނުކުރާނަމަ، ހަށިގަނޑުގެ މަސްތަކާއި ކަށިތައް ބަލިކަށިވެއެވެ. މިކަމުން ސަލާމަތްވުމަށްޓަކައި، ކޮންމެ ދުވަހަކުވެސް ގާތްގަނޑަކަށް ދެ ގަޑިއިރު ވަންދެން އެސްޓްރޮނޯޓުން ކަސްރަތު ކުރެއެވެ. މިގޮތުން ބަރު އުފުލުމަށް ޚާއްސަ މެޝިންތަކާއި، ދުވާ މެޝިން (ޓްރެޑްމިލް) އަދި ބައިސްކަލް ފަދަ މެޝިންތައް ބޭނުންކުރެއެވެ. ބަރު އުފުލާ މެޝިންތަކުގައި ވެކިއުމް ސިލިންޑަރު ބޭނުންކޮށްގެން ދުނިޔެމަތީގައިވެސް ބަރު އުފުލާ ފަދައިން ކަސްރަތު ކުރެވެއެވެ. ޓްރެޑްމިލްގައި ދުވާއިރު، ހަށިގަނޑު މައްޗަށް އެރިޔަ ނުދިނުމަށްޓަކައި ރަބަރު ވާތަކަކުން ހަށިގަނޑު ހިފަހައްޓާފައި ހުރެއެވެ. އަދި ފުރޮޅު ނުހުންނަ ބައިސްކަލެއް ފަދަ މެޝިނެއްގައި، ފައިން އަނބުރާ ބާރުމިން ބަދަލުކޮށްގެން ކަސްރަތު ކުރެއެވެ.
ޖައްވީ ސްޓޭޝަންގައި ނިދާ ގޮތް -- ނިދުން:
ނިދުމަކީވެސް ޖައްވުގައި މުޅިން ތަފާތު ތަޖުރިބާއެކެވެ. ދަމާބާރު ނެތުމުން، މައްޗާއި ތިރި ވަކިކުރާކަށް ނޭނގެއެވެ. އެހެންކަމުން ތަޅުމުގައި، ފާރުގައި ނުވަތަ ސީލިންގުގައިވެސް ނިދިދާނެއެވެ. ނަމަވެސް މައްސަލައަކީ، ނިދާފައި އޮންނައިރު ހަށިގަނޑު ވައިގެ ތެރޭގައި އޮޔާ ދިއުމެވެ. މިކަން ހުއްޓުވުމަށްޓަކައި، ގިނަ އެސްޓްރޮނޯޓުން ނިދަނީ ކުޑަ ކޮޓަރިއެއްގައި ނުވަތަ ނިދާ ކޮތަޅެއްގެ ތެރޭގައި ހަށިގަނޑު އައްސައިގެންނެވެ. މީގެ އިތުރުން، އައިއެސްއެސްގައި ހުންނަ ގިނަ މެޝިންތަކާއި އޭސީ ފަންކާތަކުގެ ސަބަބުން އަބަދުވެސް އަޑުގަދަވާނެއެވެ. މި އަޑުތަކުގެ ސަބަބުން ނިދަން އުނދަގޫވާ މީހުން، ލޮލުގައި އަޅާ މާސްކާއި ކަންފަތަށް ޖަހާ އިޔަޕްލަގް ބޭނުންކުރެއެވެ.
ސާފުތާހިރުވުން:
ދުނިޔެމަތީގައި އިސްކުރެއް ދޫކޮށްލުމުން ފެން އަންނާނީ ތިރިއަށެވެ. ނަމަވެސް ޖައްވުގައި އިސްކުރެއް ދޫކޮށްލައިފިނަމަ، ފެންތިކިތައް ބުރައިގެން ދާނީ ހުރިހާ ދިމާލަކަށެވެ. އެހެންކަމުން، އައިއެސްއެސްގައި ފެންވެރުމަށް ފާޚާނާއެއް ނުވަތަ މޫނުދޮންނަ ތަށްޓެއް ނުހުރެއެވެ. ހަށިގަނޑު ސާފުކުރުމަށް ބޭނުންކުރަނީ ސައިބޯނި އެކުލެވޭ ތެތް ތުވާއްޔެކެވެ. ބޯދޮވުމަށް ބޭނުންކުރަނީ ފެނާ ނުލައި މަސައްކަތްކުރާ ޚާއްސަ ޝޭމްޕޫއެކެވެ. އެއަށްފަހު ހިކި ތުވާއްޔަކުން ބޯ ފުހެލަނީއެވެ. އަތާއި މޫނު ސާފުކުރުމަށް ވެޓް ވައިޕްސް ނުވަތަ ދިޔާ ސައިބޯނި ހުންނަ ތެތް ތުވާލި ބޭނުންކުރެއެވެ.
ޖައްވީ ސްޓޭޝަންގައި ސާފުތާހިރުވާން ޖެހެނީ ވެސް ތަފާތު ގޮތަކަށް -- ކެއިންބުއިން:
ޖައްވުގައި ކެއިންބުއިމުގެ ކަންކަންވެސް ވަނީ ވަރަށް ބޮޑަށް ބަދަލުވެފައެވެ. 1960 ގެ އަހަރުތަކުގައި އެންމެ ފުރަތަމަ ޖައްވަށް ގެންދިޔަ ކާނާއަކީ ކުދިކުދި ގޮޅިތަކެއް ގޮތަށް ހުރި ހަރު ކާނާއާއި، ކުޑަކުދިންނަށް ދޭ ކާނާ ފަދައިން ހޮޅިތަކެއްގައި ބަންދުކޮށްފައި ހުރި ތަކެއްޗެވެ. އޭރު އޭގެ ރަހަ އެހާ މީރެއް ނޫނެވެ. ނަމަވެސް މިހާރު އައިއެސްއެސްގެ މެނޫގައި 300 އަށްވުރެ ގިނަ ބާވަތުގެ ކާނާ ހިމެނެއެވެ. ގިނަ ކާނާ ހުންނަނީ ޕްލާސްޓިކް ކޮންޓެއިނަރުތަކުގައެވެ. ބައެއް ކާނާއަކީ ހޫނު ނުވަތަ ފިނި ފެން އެޅުމުން ތައްޔާރުވާ ތަކެއްޗެވެ. އަނެއްބައި ތަކެތި އަވަން ބޭނުންކޮށްގެން ހޫނުކުރެވެއެވެ. އަދި ނަޓްސް، ރޮށި ނުވަތަ ޕާން، އަދި މޭވާ ފަދަ ތަކެއްޗަކީ އެ ހުރި ގޮތަށް ކާލެވޭ ތަކެއްޗެވެ. މިހާރު ޖައްވުގައި ކައިއުޅެނީ ދުނިޔެމަތީގައިވެސް ގިނަ ދުވަހަށް ރައްކާކޮށްފައި ހުންނަ ކާނާ ފަދަ ތަކެއްޗެވެ. ޖަޕާނު ފަދަ ގައުމުތަކުން ދަނީ ޖައްވުގައި ކެއުމަށް މީރު ޖަޕާނު ކާނާ އުފެއްދުމުގެ މަސައްކަތްވެސް ކުރަމުންނެވެ.
އެންމެ ފުރަތަމަ ޖައްވަށް ދިޔަ ދުވަސްވަރާ ޚިލާފަށް، މިހާރު އައިއެސްއެސްގެ މެނޫގައި 300 އަށްވުރެ ގިނަ ބާވަތުގެ ކާނާ ހިމެނޭ -- ފާޚާނާކުރުން:
ޖައްވީ ސްޓޭޝަންގައި ފާޚާނާ ހުރެއެވެ. ދުނިޔެމަތީގައި ހުންނަ ފަދަ ފާޚާނާ ތަށިވެސް ހުރެއެވެ. ނަމަވެސް އޭގެ މަސައްކަތްކުރާ ގޮތް ތަފާތެވެ. ފުރަތަމަ ކަމަކަށް، ފާޚާނާކުރަން އިންނައިރު މައްޗަށް ނޭރުމަށްޓަކައި ހަށިގަނޑު އައްސަން ޖެހެއެވެ. އަދި ނަޖިސް ބޭރުވުމުން، ވެކިއުމް ކްލީނަރެއް ފަދައިން ވަޔާއެކު އެތަކެތި ދަމައިގަނެއެވެ. އެހެން ނޫންނަމަ އެތަކެތި ވައިގެ ތެރޭގައި އުދުހޭނެއެވެ. ކުޑަކަމުދާ ތަކެތިވެސް ދަމައިގަންނަނީ ވެކިއުމް ކްލީނަރެއްގެ ހޮޅިއެއް ފަދަ ހޮޅިއަކުންނެވެ. މި ފާޚާނާތަކުގައި ދޮރެއް ނުހުރެއެވެ. އޭގެ ބަދަލުގައި ހުންނަނީ ފޮތިގަނޑެކެވެ. ނަމަވެސް ސްޓޭޝަންގެ އޭސީ ފަންކާތަކާއި ފާޚާނާގެ މޯޓަރުގެ އަޑުގަދަކަމުން، ފާޚާނާ ތެރޭގައި އިވޭ އަޑުތައް ބޭރަކަށް ނީވެއެވެ.
ޖައްވުގައި ބޭނުންކުރާ "ސްޕޭސް ޓޮއިލެޓް"އެއް ދައްކާލުން -- ސިއްހީ ފަރުވާ:
ޖައްވުގައި އުޅެނިކޮށް ބަލިވެއްޖެނަމަ ދެން ހަދާނީ ކިހިނެއް ހެއްޔެވެ؟ އައިއެސްއެސްގައި ތިބޭ ކޮންމެ އެސްޓްރޮނޯޓަކާވެސް ވަކި ޚާއްސަ މަސްއޫލިއްޔަތެއް ހަވާލުކުރެވިފައިވެއެވެ. އަދި އެކަމަކަށް ފުރިހަމަ ތަމްރީނު ދެވިފައިވެއެވެ. ކުއްލި ސިއްހީ ފަރުވާ ދިނުމާ ހަވާލުވެ ހުންނަނީ "ކްރޫ މެޑިކަލް އޮފިސަރ" ގެ މަގާމުގައި ހުންނަ އެސްޓްރޮނޯޓެވެ. އޭނާއަކީ ހަމައެކަނި ފުރަތަމަ އެހީ ދިނުމުގެ އިތުރުން، ޒަހަމްތައް ފެހުމާއި އިންޖެކްޝަން ޖެހުމަށްވެސް ތަމްރީނު ލިބިފައިވާ މީހެކެވެ. ސްޓޭޝަންގައި ބޭނުންވާނެ ސިއްހީ އާލާތްތަކާއި ބޭސް ހިމެނޭ މެޑިކަލް ކިޓެއް ހުރެއެވެ. މީގެ އިތުރުން، މީހެއްގެ ހިތް ހުއްޓޭ ފަދަ ހާލަތެއް މެދުވެރިވެއްޖެނަމަ ސީޕީއާރު ދިނުމަށް ހުރިހާ އެސްޓްރޮނޯޓުންނަށްވެސް ތަމްރީނު ދެވިފައިވެއެވެ. އެހެންކަމުން ކޮންމެ ވަގުތަކުވެސް ކޮންމެ މީހަކަށްވެސް އެހީތެރިކަން ފޯރުކޮށްދެވޭނެއެވެ.
ދުނިޔެއާ މުވާސަލާތުކުރުން:
ދުނިޔެއާ ގުޅައިލުމަށްޓަކައި އައިއެސްއެސްގައި ބޭނުންކުރަނީ ނާސާގެ ޓްރެކިން އެންޑް ޑޭޓާ ރިލޭ ސެޓެލައިޓް (ޓީޑީއާރުއެސް) ނިޒާމެވެ. މިއީ ދުނިޔެއާ ގާތްގަނޑަކަށް 36،000 ކިލޯމީޓަރު ދުރުގައިވާ ސެޓެލައިޓްތަކެކެވެ. އައިއެސްއެސްއިން ފޮނުވާ ސިގްނަލްތައް ފުރަތަމަ ދާނީ މި ސެޓެލައިޓްތަކަށެވެ. އެއަށްފަހު އެ ސެޓެލައިޓްތަކުން ދުނިޔޭގައި ހުންނަ ގްރައުންޑް ސްޓޭޝަންތަކަށް ސިގްނަލް ފޮނުވައިދެއެވެ. ނާސާއިން ބުނާ ގޮތުގައި، މި ނިޒާމުގެ ސަބަބުން އެއްވެސް މެދުކެނޑުމެއް ނެތި، ވަގުތުން ވަގުތަށް އޯޑިއޯ އަދި ވީޑިއޯ ކޯލުތައް މެދުވެރިކޮށް ދުނިޔެއާ ގުޅައިލެވެއެވެ. އެސްޓްރޮނޯޓުން އާއިލާއާއި ރައްޓެހިންނަށް ގުޅުމަށް އިންޓަނެޓް މެދުވެރިކޮށް މަސައްކަތްކުރާ ޚާއްސަ ފޯނުތަކާއި އީމެއިލް ބޭނުންކުރެއެވެ. މީގެ އިތުރުން، ސައިންޓިފިކް ތަހުލީލުތަކުގެ މައުލޫމާތުވެސް މި ނިޒާމު މެދުވެރިކޮށް ދުނިޔެއަށް ފޮނުވައެވެ.
އައިއެސްއެސްގައި ދިރިއުޅުމަކީ އިންސާނުންގެ ހަށިގަނޑާއި ސިކުނޑި އާ މާހައުލުތަކަށް ހޭނުމަށް ހުރި ގާބިލުކަން ދައްކައިދޭ ކަމެއް -- ހުސްވަގުތު:
މަދު މަސްތަކެއް ވަންދެން، ބަންދުވެފައިވާ ކުޑަ ޖާގައެއްގައި އެއް ބަޔަކާއެކު އުޅެން ޖެހުމަކީ ދުނިޔެމަތީގެ އާންމު ދިރިއުޅުމާ އަޅައިބަލާއިރު ވަރަށް ފަސޭހައިން ފިކުރީ ހާސްކަން (ސްޓްރެސް) އުފެދޭނެ ކަމެކެވެ. އެހެންކަމުން، މި ހާސްކަން ފިލުވާލުމަށްޓަކައި ހުސްވަގުތު ހޭދަކުރުމަކީ ވަރަށް މުހިންމު ކަމެކެވެ. އެސްޓްރޮނޯޓުންނަށް އެމީހުންގެ އަމިއްލަ ބައެއް ތަކެތި ސްޓޭޝަނަށް ގެންދެވެއެވެ.
ދުނިޔެމަތީގައިވެސް އުޅޭ ފަދައިން، ފޮތް ކިޔުމާއި ލަވަ އެހުން ފަދަ ކަންކަމުގައި އެމީހުން ވަގުތު ހޭދަކުރެއެވެ. އައިއެސްއެސްގެ ކުޑަދޮރުތަކުން ފެންނަ ދުނިޔެއާއި ތަރިތަކުގެ މަންޒަރުތަކަކީ ވަރަށް ހިތްގައިމު މަންޒަރުތަކެކެވެ. ބައެއް އެސްޓްރޮނޯޓުން މި މަންޒަރުތައް ބަލައި، ފޮޓޯ ނެގުމުގައި ވަގުތު ހޭދަކުރެއެވެ. މީގެ އިތުރުން ފިލްމު ބެލުމާއި، އިންޓަނެޓުން ހަބަރު ކިޔުމާއި، އަދި އާއިލާއާއި ރައްޓެހިންނާ ވާހަކަދެއްކުމުގެ ފުރުސަތުވެސް އެމީހުންނަށް ލިބެއެވެ.
އައިއެސްއެސްގައި ދިރިއުޅުމަކީ އިންސާނުންގެ ހަށިގަނޑާއި ސިކުނޑި އާ މާހައުލުތަކަށް ހޭނުމަށް ހުރި ގާބިލުކަން ދައްކައިދޭ ކަމެކެވެ. ދުނިޔެމަތީގައި ވަރަށް އާދައިގެ ކަންކަމުގެ ގޮތުގައި ދެކޭ ކަންކަން، ޖައްވުގައި ކުރަން ޖެހެނީ މުޅިން ތަފާތު، އުފެއްދުންތެރި ގޮތްތަކަކަށެވެ. މި ތަޖުރިބާތަކަކީ ކުރިމަގުގައި އިންސާނުން ޖައްވުގެ އިތުރު ހިސާބުތަކަށް ދަތުރުކުރުމަށް މަގުފަހިކޮށްދޭނެ މުހިންމު ފިލާވަޅުތަކެކެވެ.