ދުނިޔޭގެ އެންމެ ނުފޫޒުގަދަ ޝެފުންގެ ތެރޭގައި ހިމެނޭ ގޯޑަން ރަމްސޭ، އިންޑިއާގެ ކެއުންތަކުގެ މުއްސަނދިކަމަށް ތަޢުރީފުކޮށް، އެޤައުމަށް މިޝެލިންގައިޑްގެ ތަރިތައް ޙައްޤުވާކަމަށް ބުނެފިއެވެ.
އެޕަލް ޓީވީ މެދުވެރިކޮށް ދައްކާ މަޤުބޫލު ޑޮކިއުމެންޓްރީ ސީރީޒް "ނައިފް އެޖް: ޗޭސިންގް މިޝެލިން ސްޓާސް" ސީޒަން 2ގެ އެގްޒެކެޓިވް ޕްރޮޑިއުސަރުގެ ހައިސިއްޔަތުން ނޫސްވެރިންނާ ވާހަކަދައްކަމުން ރަމްސޭ ބުނީ، އިންޑިއާގެ ކެއުންތަކުގެ ޙަޤީޤީ ރަހަތައް ހޯދުމަށް މީގެ އަހަރުތަކެއް ކުރިން ރާޖަސްތާނަށް ކުރި ދަތުރަށްފަހު އެ ކެއުންތަކަށް އޭނާގެ ހިތް ޖެހުނު ކަމަށެވެ. އެހެންކަމުން އިންޑިއާއަށް މިޝެލިންގައިޑް ތަޢާރަފުކުރުމަކީ ސައްތައިން ސައްތަ ޙައްޤު ކަމެއް ކަމަށް އޭނާ ފާހަގަކުރިއެވެ.
މީގެ ދެ އަހަރު ކުރިން ދުބާއީގައި އިންޑިއަން ރެސްޓޯރެންޓަކަށް ފުރަތަމަ ފަހަރަށް ތިން މިޝެލިން ސްޓާ ލިބިގެންދިޔަ އުފާވެރި ޚަބަރާއި، އިނގިރޭސިވިލާތުގައި ދެ މިޝެލިން ސްޓާ ހާސިލުކޮށްފައިވާ ދެ އިންޑިއަން ރެސްޓޯރެންޓް ހުރިކަން ރަމްސޭ ވަނީ މި ސީރީޒްގައި އާއްމުންނަށް ހަނދާންކޮށްދީފައެވެ. އަދި އޮސްޓްރޭލިއާ އާއި ނިއުޒީލަންޑަށް މިޝެލިންގައިޑް ފުޅާވަމުންދާއިރު، މާ ލަސްތަކެއްނުވެ އިންޑިއާއަށްވެސް މި ނިޒާމު އަންނާނެކަމުގެ ފުރިހަމަ އިތުބާރު އެބިއޮތް ކަމަށް އޭނާ ބުނެފައިވެއެވެ.
މިދިޔަ މަހުގެ 25ގައި ރިލީޒްކުރި 8 އެޕިސޯޑުގެ މި ޑޮކިއުމެންޓްރީ ސީރީޒްއަކީ ދުނިޔޭގެ އެކި ކަންކޮޅުތަކުގައި މިޝެލިން ސްޓާ ހޯދުމަށާއި ހިފެހެއްޓުމަށް ރެސްޓޯރެންޓްތަކުން ކުރާ އުނދަގޫ މަސައްކަތްތައް ދައްކުވައިދޭ ސީރީޒެކެވެ. ޓޮޕްޖޯގެ ކޯ-ފައުންޑަރު ޖެސީ ބާޖެސް ހުށަހަޅައިދޭ މި ސީރީޒްގައި އިނގިރޭސިވިލާތް، އެމެރިކާ، ބްރެޒިލް، ފްރާންސް އަދި ޖާމަނީ ފަދަ ޤައުމުތަކުގެ 16 ރެސްޓޯރެންޓެއްގެ ބެކްސްޓޭޖް ހަރަކާތްތައް ފެނިގެންދާނެއެވެ.
ގޯޑަން ރަމްސޭ 2020 ވަނަ އަހަރު އިންޑިއާއަށް ކުރި ދަތުރުގައި އެ ޤައުމުގެ ސައުތު ވެސްޓް އިންޑިއާއަށް ނިސްބަތްވާ ޝެފް ޝްރީ ބާލާއާ އެކު--ފޮޓޯ/ނެޝަނަލްޖިއޮގްރަފިކްނަވާރަސަތޭކަ ނުވަދިހައަށް ވަނަ އަހަރު އަމިއްލަ ފުރަތަމަ ރެސްޓޯރެންޓް ހުޅުވައި، ތިން މިޝެލިން ސްޓާ ހާސިލުކުރި ކާމިޔާބު ދަތުރު މަތިން ހަނދާންކުރަމުން ރަމްސޭ ބުނީ، މި ދާއިރާއަކީ ކޮންމެ ދުވަހަކުވެސް އާ ގޮންޖެހުންތަކާ ކުރިމަތިލާންޖެހޭ، އެއްވެސް ސްކްރިޕްޓެއް ނެތި ހިނގާ އުނދަގޫ މަސައްކަތެއް ކަމަށެވެ. އެހެންކަމުން މި ސީރީޒްގެ މައިގަނޑު މަގުސަދަކީ މިފަދަ ބުރަ މަސައްކަތްކުރާ ޝެފުންނަށް ޙައްޤުވާ ގަދަރާއި ސަމާލުކަން ހޯދައިދިނުން ކަމަށް އޭނާ ބުންޏެވެ.
ޝެފުންނަށް ކުރިމަތިވާ ބޮޑު ޕްރެޝަރާ ގުޅޭގޮތުން ރަމްސޭ ބުނީ، ޕްރެޝަރަކީ ސިއްހަތަށް ރަނގަޅު އަދި ކުރިއެރުމަށް ބޭނުންތެރި އެއްޗެއް ކަމަށެވެ. އަދި މިޝެލިން ސްޓާއެއް ހޯދުމަށްވުރެ އެ ތަރި ނުގެއްލި ހިފެހެއްޓުމަކީ މާ އުނދަގޫ ކަމެއްކަން އޭނާ ފާހަގަކުރިއެވެ. ކަސްޓަމަރުން ފޫހިވިޔަނުދީ، މޫސުމާ ގުޅޭގޮތުން މެނޫއަށް ބަދަލުތައް ގެނެސްގެން ނޫނީ މިޝެލިން ފެންވަރުގައި ދެމިނުހުރެވޭނެކަމަށް އޭނާ ބުންޏެވެ.
މީގެ އިތުރުން ރެސްޓޯރެންޓް ވިޔަފާރިތަކަށް މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ އިޤްތިސާދީ ހާލަތު ކަމަށާއި، ކިތަންމެ މޮޅު ޝެފަކަށްވިޔަސް ވިޔަފާރި ހިންގަން ނޭނގޭނަމަ ކުރެވޭނީ ބޭކާރު މަސައްކަތެއް ކަމަށް ރަމްސޭ އިންޒާރުދިނެވެ. އެހެންކަމުން އާ ރެސްޓޯރެންޓްތައް ކުޑަކޮށް ފަށައި، މާލީ މުސްތަޝާރުންގެ އެހީތެރިކަމާއެކު ކޭޝްފްލޯ މެނޭޖްކުރުމުގެ މުހިންމުކަން އޭނާ ފާހަގަކުރިއެވެ.
ރަމްސޭ ވަނީ، ކައްކާ ވަގުތު ހަމަވުމުން މިޝެލިން އިންސްޕެކްޓަރެއްގެ ވަޒީފާއަށް ކުރިމަތިލާން ގަސްދުކުރާކަން ހާމަކޮށްފައެވެ. މިޝެލިން އިންސްޕެކްޓަރުންގެ ހުންނަ ސިއްރުވެރިކަމާއި މިނިވަންކަމަށް ތައުރީފުކުރަމުން، އޭނާގެ ރަހަ ބެލުމުގެ ޤާބިލުކަމާއެކު އެ ވަޒީފާ ލިބޭނެކަމުގެ ފުރިހަމަ ޔަޤީންކަން އޮތްކަމަށް ސަމާސާ އަދަބާއެކު ރަމްސޭ ވަނީ ބުނެފައެވެ.