އަމީނީ މަގުގެ ދެވަނަ ސެގްމަންޓުގެ މަރާމާތަށް މާފަންނު ދަނޑުން ފެށިގެން ހައުސިން މިނިސްޓްރީގެ ކުރީގެ އޮފީހާ ހަމައަށް އޮތް ސަރަހައްދު ބަންދުކޮށް، އެ ސަރަހައްދުގައި ހުރި އުޅަނދުފަހަރު ނަގަން ފުލުހުން އެދިއްޖެއެވެ.
'އެކްސް'ގައި ފުލުހުން ކުރި ޕޯސްޓެއްގައިވަނީ އަމީނީ މަގުގެ ދެވަނަ ސެގްމަންޓުގެ މަރާމާތަށް ޓަކައި އެ ސަރަހައްދު އާންމު ދަތުރުފަތުރަށް ބަންދުކުރެވޭނެ ކަމަށެވެ.
އެހެންކަމުން އެ ސަރަހައްދުގައި ޕާކުކޮށްފައި ހުރި ހުރިހާ އުޅަނދެއް މިރޭ ދަންވަރު 12 ޖެހުމުގެ ކުރިން ނެގުމަށް ފުލުހުން ވަނީ އެދިފައެވެ.
ފުލުހުން އާންމުކުރި ޗާޓުގައިވާ ގޮތުން މާފަންނު ޓާފް ދަނޑުން ފެށިގެން ހައުސިން މިނިސްޓްރީގެ ކުރީގެ އޮފީހާ ހަމައަށް އޮތް ސަރަހައްދުގައި ދަތުރުފަތުރެއް ނުކުރެވޭނެއެވެ. އެ ޗާޓުގައިވާ ގޮތުން ޓްރެފިކް ފުލުހުގެ އިދާރާއި މާފަންނު ދަނޑާ ދެމެދު އޮތް ސަރަހައްދަށް ހަތަރު ފުރޮޅުލީ އުޅަނދުފަހަރަށް ނުވަދެވޭނެއެވެ.
https://x.com/PoliceMv/status/2106381823165288564
ފާހަގަކުރެވޭ ގޮތުގައި ދިވެހިރާއްޖޭގެ އަޑު ކުރިމަތިން އޮންނަ ހަތަރު އަނގޮޅި ކަންމަތި ސަރަހައްދު މަރާމާތުކޮށް އެ ތަނުގައި ތާރުއަޅައި ވަނީ ނިންމައިލައިފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ޕްލޭނިން މިނިސްޓްރީން އާރުޑީސީއާ އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.
މީގެ ދެ އަހަރު ކުރިން މި ސަރުކާރުން ވެރިކަމާ ހަވާލުވުމަށްފަހު އަމީނީ މަގުގެ އެންމެ ފަހު ސެގްމަންޓުގައި ތާރު އަޅައި ނިންމައިލިއެވެ. އެކަމަކު، ހާބަރު ފުޑްކޯޓު ސަރަހައްދުގައި "މުލިހި"ތަކެއްހެން ތާރުގަނޑު އުފުލި، އެ މަގުން ދަތުރުކުރާ ފަރާތްތަކަށް ބޮޑެތި ތަކުލީފުތަކަކާ ކުރިމަތިލާންޖެހުނެވެ.
އެހެންވެ، އެ ކަމުގެ ޝަކުވާ ބޮޑުވެ، ސަރުކާރަށް ފާޑުކިޔުން ވެސް އަމާޒުވިއެވެ.