ވެރިކަމުގައި އެމްޑީޕީގެ ސަރުކާރެއް އޮންނަ އިރު އެ ޕާޓީގެ އިސްފަރާތަކީ ޗެއާޕާސަން ކަމަށާއި އެ ޕާޓީގެ އެތެރޭގެ އިންތިޚާބުތަކުގައި ވާދަކޮށް ކެމްޕެއިންތަކުގައި އަމަލީގޮތުން ޗެއާޕާސަން ހަރަކާތްތެރިވުން މަނާވާ ގޮތަށް އެމްޑީޕީގެ ކޮންގްރެސްގައި އެ ޕާޓީގެ އަސާސީ ގަވައިދު މިއަދު ފާސްކޮށްފިއެވެ.
އެމްޑީޕީގެ ކުރީގެ ޗެއާޕާސަން ފައްޔާޒް އިސްމާޢީލް ހުށަހެޅުއްވި އިސްލާހުތަކަށް ބަހުސްކުރުމަށްފަހު ނެގި ވޯޓުގައި އެ އިސްލާހުތައް ފެންނަ ކަމަށް ފާސްވީ އެމްޑީޕީގެ ކޮންގްރެސްގެ ހަވީރު އޮތް ދަންފަޅީގައި ވޯޓުގައި ބައިވެރިވި 565 މަންދޫބުންގެ ތެރެއިން 546 މަންދޫބުންގެ އަޣުލަބިއްޔަތުންނެވެ.
ފައްޔާޒް އަސާސީ ގަވައިދަށް ހުށަހެޅުއްވި ބައެއް އިސްލާހުތަކުގެ ތެރޭ ހިމެނެނީ އެމްޑީޕީގެ އިދާރާގެ މުވައްޒަފުން އެތެރޭގެ އިންތިޚާބުތަކުގައި ވާދަކޮށް ކެމްޕެއިންތަކުގައި އަމަލީގޮތުން ހަރަކާތްތެރިވުން މަނާވާނެ ކަމާއި ނަމަވެސް، އެތެރޭގެ އިންތިޚާބެއްގައި އިދާރީ މުވައްޒަފުން ވާދަކުރަން އެދޭ ނަމަ އެ އިންތިޚާބެއް ބޭއްވުމުގެ މަދުވެގެން އެއް މަސް ކުރިން ޗެއާޕާސަނަށް އަންގަން ޖެހޭނެ ކަމާއި އެ މުވައްޒަފަކާ މަސްލަހަތު ފުށޫއަރާ މީހަކު އިންތިޚާބެއްގައި ވާދަކުރާނަމަ ނުވަތަ އެފަދަ ކަމެއްގެ ސަބަބުން އިންތިޚާބުގެ އިންސާފުވެރިކަމާމެދު ސުވާލު އުފެދޭ ނަމަ އެ މުވައްޒަފަކު ވަގުތީގޮތުން މަގާމުގެ މަސްއޫލިއްޔަތު އަދާކުރުމުގެ ބާރު އެ އިންތިޚާބެއް ރާވައި ހިންގާ ކޮމިޓީއަށް ލިބިގެންވާ ކަމެވެ.
އެހެންކަމުން އެތެރޭގެ އިންތިޚާބުތަކުގައި އެ ޕާޓީގެ ޗެއާޕާސަނާއި ޑެޕިއުޓީ ޗެއާޕާސަނުންނަށް ވާދަކޮށް، ކެމްޕެއިންތަކުގައި އަމަލީގޮތުން ދެން ހަރަކާތްތެރިނުވެވޭނެއެވެ.
އަދި އެމްޑީޕީގެ ޗެއާޕާސަނަކަށް ހުންނަ ބޭފުޅަކަށް އެމްޑީޕީގެ އެތެރޭގެ އިންތިޚާބުތަކަށް ނުފޫޒު ނުފޯރުވޭނެއެވެ.
އެމްޑީޕީގެ ކޮންގްރެސްގައި ބައިވެރިވި މަންދޫބުން ވޯޓުދެނީ --- ފޮޓޯ: އެމްޑީޕީއޭގެ އިތުރުން އެ އިރެއްގައި ހުންނަވާ ރައީސުލްޖުމްހޫރިއްޔާއަކީ އެމްޑީޕީގެ މެންބަރެއް ނަމަ އެ ޕާޓީގެ އިސް ފަރާތަކީ އޭނާކަން އޮތް އޮތުން އުނިކުރަން ހުށަހެޅުމާއި އެ ޕާޓީގެ ރައީސާއި ނައިބު ރައީސްގެ މަގާމު އުނިކުރުމާއި ޕާޓީގެ ޗެއާޕާސަން ދައުލަތުގެ މުސާރަ ލިބޭ އެއްވެސް މަގާމެއް އަދާކޮށްގެން ނުވާނެ ކަން ވެސް، އަސާސީ ގަވައިދަށް ހުށަހެޅި އިސްލާހުތަކުގެ ތެރޭ ހިމެނެއެވެ.
އަދި އެމްޑީޕީއަށް ޑެޕިއުޓީ ޗެއާޕާސަނެއް އިތުރުކުރުމަށް ވެސް ހުށަހެޅިއެވެ. އެގޮތުން ސިޔާސީ ޑެޕިއުޓީ ޗެއާޕާސަންގެ މަގާމު އިތުރުކުރަން ހުށަހަޅައި، އެއް ނައިބު ޗެއާޕާސަންކަމަށް އަންހެން މެންބަރަކު ކަނޑައަޅަން ވެސް ހުށަހެޅިއެވެ.
އެމްޑީޕީއަކީ މިވަގުތު ރާއްޖޭގައި ދެވަނައަށް އެންމެ މެންބަރުން ގިނަ ސިޔާސީ ޕާޓީއެވެ. މިހާތަނަށް އެ ޕާޓީގައި 55،399 މެންބަރުން ތިބިކަން އިލެކްޝަންސް ކޮމިޝަންގެ ދަފުތަރުން ދައްކައެވެ.