ފްލައިދުބާއީ ބޯޓު ވައްޓާލަން އުޅުނު މައްސަލައިގައި، ދުބާއީން ދެ ދިވެއްސަކު ހައްޔަރުކޮށްފި!

ދުބާއީން ފުރައިގެން އިޒްރޭލަށް މިދިޔަ ބުދަ ދުވަހު ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި، އެ އެއާލައިންގައި މަސައްކަތްކުރާ ދެ ދިވެއްސަކު ޔޫނައިޓެޑް އަރަބް އެމިރޭޓްސް (ޔޫއޭއީ) އިން ރޭ ހައްޔަރުކޮށްފިއެވެ.

"ސަން"އަށް މައުލޫމާތު ދެއްވަމުން ސަރުކާރުގެ ތަރުޖަމާނު މުޙައްމަދު ހުސައިން ޝަރީފް (މުންދު) ވިދާޅުވީ ރޭގެ ވަގުތެއްގައި ދެ ދިވެއްސަކު ދުބާއީއިން ހައްޔަރުކޮށްފައިވާ ކަމަށެވެ. އެއީ ފްލައިދުބާއީއާ ވަރަށް ފަހުން ގުޅުނު ދެ ދިވެހީން ކަމަށް ވިދާޅުވިއެވެ.

ނަމަވެސް އެ ދިވެހީންނާ، ފްލައިދުބާއީގެ ފްލައިޓް ވައްޓާލަން އުޅުނު މައްސަލައާ އޮތް ގުޅުމެއް އަދި ޔަގީންނުވާ ކަމަށާއި، އެ މީހުންނަކީ އެއްވެސް ކުށެއް ކުރިކަމަށް ބެލެވޭ ނުވަތަ ކޮން ތުހުމަތެއްގައި ހައްޔަރުކުރި ބައެއްކަން އަދި ޔަގީންނުވާކަމަށް ތަރުޖަމާނު ވިދާޅުވިއެވެ.

އަދި އެ މީހުންނަށް ދިވެހި ސަރުކާރުގެ ފަރާތުން ފޯރުކޮށްދެވެން ހުރި އެހީތެރިކަން ދިނުމުގެ މަސައްކަތް ޔޫއޭއީގެ ސަރުކާރާ ގުޅިގެން ދިނުމަށް ޓަކައި މަސައްކަތްކުރަމުން އަންނަކަމަށް ތަރުޖަމާނު ވިދާޅުވިއެވެ.

އެންމެ ފަހުން މައުލޫމާތަށް ބަލާއިރު، އެ ދިވެހީންނަކީ ޕައިލެޓުންނަށް ޚާއްސަ ރެސިޑެންޝަލް އިމާރާތެއްގައި އުޅޭ ދެ ދިވެހީންނެވެ. އަދި އެ ދެ މީހުން ހައްޔަރުނުކުރާ ކަމަށާއި، އެ ދެ މީހުން ވެސް ބަންދުކުރީ އެ އިމާރާތުގައި ތިބި އެހެން މީހުންނާ އެކު އެ އިމާރާތުގެ ތެރޭގައެވެ.

މިދިޔަ ބުދަ ދުވަހު މި ހާދިސާ ހިނގީ 174 ފަސިންޖަރުންނާއި އަށް ކުރޫންނާއެކު ދުބާއީން އިޒްރޭލުގެ ތެލް އަވީވްއަށް ދަތުރުކުރި ފްލައިދުބާއީގެ ބޯޓެއްގައެވެ. ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށްފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފައެވެ. އަދި ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓު ތިރިކޮށްފައެވެ.

އޭގެ ފަހުން އިސްރާއީލުން ވަނީ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ހައިޖެކްކޮށްގެން ނޫން ކަމަށާއި، އެއީ ސަލާމަތީ ނުރައްކަލެއް އޮތް ކަމެއް ނޫން ކަމަށް ބުނެފައެވެ.

އެ މައްސަލައާ ގުޅޭ ގޮތުން ޔުނައިޓެޑް އަރަބް އެމިރޭޓްސްއިން ވަނީ، އެ ހަމަލާއަކީ ބޯޓު ވައްޓާލަން ކޯޕައިލެޓް ދިން ހަމަލާއެއް ކަމަށާއި އެއީ ޓެރަރިޒަމްގެ އަމަލެއް ކަމަށް ބުނެފައެވެ.