ހަށިގަނޑުގައި ޑަކްޓޭޕް އަޅައިގެން ގިނަ އަދަދެއްގެ މަސްތުވާތަކެތި އެތެރެކުރަން އުޅުނު މައްސަލައެއްގައި ށ. ނޫމަރާ، ހަވީރީގެ، ޢަބްދުﷲ ފަޞީޙުގެ މައްޗަށް ދައުލަތުން އުފުލި ދެ ދައުވާއެއް ސާބިތުވެ، އޭނާ ޖުމްލަ 50 އަހަރަށް ޖަލަށް ލުމަށާއި 200,000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައަކީ ހަތް އޮކްޓޫބަރު 2024 ގައި ވެލާނާ އިންޓަނޭޝަނަލް އެއާޕޯޓުން ގއ. ކޫއްޑޫއަށް ފުރަން ގޮސް އުޅެނިކޮށް، ފަޞީޙުގެ ހަށިގަނޑު ބަލައިފާސްކުރިއިރު އޭނާގެ ދެ ފައިގެ ފަލަމަސްގަނޑުގައި ޑަކްޓޭޕުން ތަތްކޮށްފައި ހުރި މަސްތުވާތަކެތި ފެނުނު މައްސަލައެކެވެ.
ކްރިމިނަލް ކޯޓުގައި ގާޟީ ޢަލީ ނަދީމް، ބުރާސްފަތި ދުވަހު ކުރެއްވި ހުކުމުގައިވާ ގޮތުން، ފަޞީޙުގެ މައްޗަށް ސާބިތުވެފައިވަނީ މަސްތުވާތަކެއްޗާބެހޭ ގާނޫނުގެ ދަށުން އުފުލި ދެ ދައުވާއެކެވެ.
އޭގެ ތެރެއިން ފުރަތަމަ މައްސަލައަކީ، ޑައިމޯފިން ޓްރެފިކްކުރުމުގެ ދައުވާއެވެ. ފަޞީޙުގެ ފަލަމަސްގަނޑުގައި ތަތްކޮށްފައިވާ ޓޭޕްގެ ދަށުން 23.5976 ގްރާމްގެ ޑައިމޯފިން ފެނުނު މައްސަލައިގައި އޭނާ އުމުރަށް ޖަލަށް ލުމާއެކު 100,000 (އެއްލައްކަ) ރުފިޔާއިން ޖޫރިމަނާކުރުމަށް ވަނީ ހުކުމްކޮށްފައެވެ. މި މައްސަލައިގައި އޭނާ ބަންދުގައި ހޭދަކުރި ހަތް މަހާއި 27 ދުވަސް އުނިކުރުމުން، ތަންފީޒުކުރަންޖެހޭ އަދަބަކީ 24 އަހަރާއި ހަތަރު މަހާއި ތިން ދުވަހުގެ ޖަލު ބަންދެކެވެ.
ދެވަނަ ދައުވާއަކީ ކެނެބިސް ޓްރެފިކްކުރުމުގެ ދައުވާއެވެ. ފަޞީޙުގެ ފަލަމަސްގަނޑުގައި އޮޅާފައިވާ ޓޭޕްގެ ތެރެއިން ފެނުނު 10 ފިލްމު ދަޅުން 252.1652 ގްރާމްގެ ކެނެބިސް ފެނުނު މައްސަލައިގައިވެސް އޭނާ ވަނީ އުމުރަށް ޖަލަށް ލުމާއެކު 100,000 (އެއްލައްކަ) ރުފިޔާއިން ޖޫރިމަނާކުރުމަށް ހުކުމްކޮށްފައެވެ. މި ދެ މައްސަލައިގެ ޖޫރިމަނާ ފައިސާ ކަމަށްވާ ޖުމްލަ 200,000 ރުފިޔާ، ހުކުމް ކުރި ދުވަހުން ފެށިގެން 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް ވަނީ އަންގާފައެވެ.
ޝަރީއަތުގެ މަރުހަލާގައި ދިފާއުން ބުނެފައިވަނީ ފަޞީޙަކީ ހިއުމަން ޓްރެފިކިންގެ ވިކްޓިމެއް ކަމަށާއި، އެހެން މީހަކު އޭނާގެ އިޚްތިޔާރުން ބޭރުން މަޖުބޫރުކުރުވައިގެން ކުރި ކަމެއް ކަމަށެވެ. ނަމަވެސް ޝަރީއަތުން ފާހަގަކުރެއްވީ، އެކަން ސާބިތުކޮށްދިނުމަށް ދިފާއުން އެއްވެސް ހެއްކެއް ހުށަހަޅާފައިނުވާ ކަމަށާއި، ތަހުގީގު މަރުހަލާގައިވެސް އޭނާ ހަނުހުރެފައިވާތީ އެ ދިފާއަށް ބުރަދަނެއް ދެވެން ނެތް ކަމަށެވެ.
އެހެންކަމުން ދައުލަތުން ހުށަހެޅި ހެކި ގަރީނާތަކުން ކުށުގެ މާއްދީ ރުކުނާއި މައުނަވީ ރުކުން އެކަށީގެންވާ މިންވަރެއްގެ ޝައްކެއްނެތި ސާބިތުވާތީ، ކްރިމިނަލް ކޯޓުން ވަނީ ދެ މައްސަލައިގައި ވެސް އޭނާގެ މައްޗަށް ކުށް ސާބިތުވާ ކަމަށް ކަނޑައަޅާފައެވެ.