ފްލައިދުބާއީ ތެރޭ ހަމަލާދިން ޕައިލެޓު ބޭނުންވީ އިޒްރޭލަށް ބޯޓު ވައްޓާލަން ކަމަށް، އޭނާ ތަހުގީގުގައި ބުނެފައިވާ ކަމަށް ކަމާ ގުޅުންހުރި އޮފިޝަލުން ވިދާޅުވެއްޖެއެވެ.
މިދިޔަ ބުދަ ދުވަހު މި ހާދިސާ ހިނގީ 174 ފަސިންޖަރުންނާއި އަށް ކުރޫންނާއެކު ދުބާއީން އިޒްރޭލުގެ ތެލް އަވީވްއަށް ދަތުރުކުރި ފްލައިދުބާއީގެ ބޯޓެއްގައެވެ. ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށްފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފައެވެ. އަދި ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓު ތިރިކޮށްފައެވެ.
އޭގެ ފަހުން އިސްރާއީލުން ވަނީ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ހައިޖެކްކޮށްގެން ނޫން ކަމަށާއި، އެއީ ސަލާމަތީ ނުރައްކަލެއް އޮތް ކަމެއް ނޫން ކަމަށް ބުނެފައެވެ.
އެ މައްސަލައާ ގުޅޭ ގޮތުން ޔުނައިޓެޑް އަރަބް އެމިރޭޓްސްއިން ވަނީ، އެ ހަމަލާއަކީ ބޯޓު ވައްޓާލަން ކޯޕައިލެޓް ދިން ހަމަލާއެއް ކަމަށާއި އެއީ ޓެރަރިޒަމްގެ އަމަލެއް ކަމަށް ބުނެފައެވެ.
ޔޫއޭއީގެ އެޓާނީ ޖެނެރަލް ހަމަދު ސައިފް އަލް ޝަމްސީއާ ހަވާލާދީ އެ ގައުމުގެ ރަސްމީ ނޫސް އޭޖެންސީން ރިޕޯޓުކޮށްފައިވާ ގޮތުގައި، ކޯޕައިލެޓް މަސައްކަތްކުރީ ބޯޓުގެ ކޮންޓްރޯލް އަތުލައި ބޯޓު ވައްޓާލުމަށެވެ. އެ ހާދިސާގައި ތުހުމަތުކުރެވެނީ، އުމުރުން 29 އަހަރުގެ އޮމާންގެ ރައްޔިތެއް ކަމަށްވާ ހަމާމް އަލް ހައްމާމީއަށެވެ.
މިއީ މި ހާދިސާއަކީ ޓެރަރިޒަމްގެ އަމަލެއްކަން ޔޫއޭއީގެ ރަސްމީ އިދާރާއަކުން ކަށަވަރުކޮށްދިން ފުރަތަމަ ފަހަރެވެ. މީގެ ކުރިން ޔޫއޭއީން ބުނެފައިވަނީ މިއީ ސަލާމަތީ ހާދިސާއެއް ކަމަށާއި، މީގައި ޓެރަރިޒަމްގެ އަމަލެއް އެކުލެވިގެންވޭތޯ ބަލަމުންދާ ކަމަށެވެ.
އެ މައްސަލައިގެ ތަހުގީގާ ގުޅުންހުރި މަސްދަރުތަކަކާ ހަވާލާދީ އޭބީސީ ނޫހުން ރިޕޯޓުކޮށްފައިވާ ގޮތުގައި، ހައްމާމީ މިހާރި ވަނީ ސައުދީން ޔޫއޭއީއަށް ގެންގޮސްފައެވެ. އަދި، އޭނާ ތަހުގީގަށް އެއްބާރުލުން ދެމުންދާ ކަމަށާއި އޭނާއާ ސުވާލުކުރުމުން، އޭނާ ބޭނުންވީ އިޒްރޭލަށް ބޯޓު ވައްޓާލަން ކަމަށް ބުނެފައިވާ ކަމަށް އެ ނޫހުގައިވެއެވެ.
ރިޕޯޓުތައް ބުނާ ގޮތުގައި، ހަމާމް ވަނީ ކޮކްޕިޓް ތެރޭގައި އޮންނަ ކްރޭޝް އެކްސް ބޭނުންކޮށްގެން ބޯޓުގެ ކެޕްޓަން ސްމިތު މަޗްޗަރަށް ހަމަލާދީފައެވެ. ކެޕްޓަނަށް ބޮޑެތި އަނިޔާތަކެއް ލިބިފައިވީ ނަމަވެސް، އޭނާ ވަނީ ކޯޕައިލެޓް ހުއްޓުވައި، ކޮކްޕިޓުގެ ދޮރު ހުޅުވާފައެވެ. އެއާއެކު ބޯޓުގައި ތިބި ބައެއް ފަސިންޖަރުން ވަނީ ކޮކްޕިޓަށް ވަދެ ކޯޕައިލެޓް ހިފަހައްޓާފައެވެ.
ކޯޕައިލެޓްގެ ހަމަލާއާ ގުޅިގެން ބޯޓު ވަރަށް ބޮޑަށް ތިރިވި ނަމަވެސް، ފަސިންޖަރުންގެ ގޮތުގައި ދަތުރުކުރި އޮފް-ޑިއުޓީ ދެ ޕައިލެޓަކު ވަނީ ބޯޓުގެ ކޮންޓްރޯލް ނަގައި، ސައުދީ އަރަބިއްޔާގެ ތަބޫކަށް ބޯޓު ޖައްސާފައެވެ. ކެޕްޓަން ސްމިތު ފަހުން ބުނި ގޮތުގައި، އޭނާ މަސައްކަތްކުރީ ފަސިންޖަރުންގެ ފުރާނަ ސަލާމަތްކުރުމަށެވެ.
ޔޫއޭއީގެ އެޓާނީ ޖެނެރަލް ވިދާޅުވި ގޮތުގައި، މި ހާދިސާގެ ފަހަތުގައިވާ ސަބަބުތައް ދެނެގަތުމަށްޓަކައި ޑިޖިޓަލް އަދި ފިޒިކަލް ހެކިތައް ތަހުލީލުކުރުމުގެ މަސައްކަތް ދަނީ ކުރިއަށެވެ.
އޭބީސީ ނިއުސްއިން ރިޕޯޓުކޮށްފައިވާ ގޮތުގައި، 2024 ވަނަ އަހަރު އޮމާން އެއާގެ ޓްރެއިނީ ކޯޕައިލެޓެއްގެ ގޮތުގައި ހަމާމް މަސައްކަތްކުރިއިރު، ހަރުކަށި ފިކުރުގެ ލިޔެކިޔުންތަކެއް އޭނާގެ އަތުން ފެނުމާ ގުޅިގެން އޭނާ ވަނީ ފްލައިޓްތަކަށް އެރުން މަނާކޮށްފައެވެ. އޭގެ ފަހުން އޭނާ ވަނީ އެ ކުންފުނީގެ އިދާރީ ވަޒީފާއަކަށް ބަދަލުކޮށްފައެވެ.
ނަމަވެސް އޭގެ ފަހުން ފްލައިދުބާއީން އޭނާއަށް ވަޒީފާ ދިން ގޮތަކާ މެދު މިހާރު ދަނީ ސުވާލު އުފައްދަމުންނެވެ. ފްލައިދުބާއީން ނެރުނު ބަޔާނެއްގައި ބުނެފައިވަނީ ތަހުގީގު ކުރިއަށްދާތީ އިތުރު މައުލޫމާތު ހާމަކުރެވެން ނެތް ކަމަށާއި، ކަމާބެހޭ ފަރާތްތަކަށް ފުރިހަމަ އެއްބާރުލުން ދެމުންދާ ކަމަށެވެ.