މި އަހަރަކީ ރާއްޖޭގެ ތާރީޚުގައި އެންމެ ގިނައިން ޒަކާތްް ދެއްކި އަހަރު ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު މިއަދު ވިދާޅުވެއްޖެއެވެ.
މި އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ލިބުނު ފައިސާގެ އަދަދު، މިދިޔަ އަހަރު އެއްކޮށް ލިބުނު އަދަދަށް ވުރެ އިތުރުވެފައިވާކަން ޒަކާތު ހައުސްގެ ތަފާސްހިސާބުތަކުން ވަނީ ދައްކާފައެވެ.
ޒަކާތު ހައުސްގެ ތަފާސްހިސާބުތަކުން ދައްކާ ގޮތުގައި، މި އަހަރުގެ ޖަނަވަރީން ފެށިގެން މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109.6 މިލިއަން ރުފިޔާ ވަނީ ބަލައިގަނެފައެވެ. މިއީ މިދިޔަ އަހަރު އެއްކޮށް ލިބުނު 106.5 މިލިއަން ރުފިޔާއާ އަޅައިބަލާއިރު 2.8 މިލިއަން ރުފިޔާ އިތުރު އަދަދެކެވެ.
އެކަމާ ގުޅުވައި މިއަދު އެކްސްގައި ކުރެއްވި ޕޯސްޓެއްގައި މިނިސްޓަރު ޝަހީމް ވަނީ، ރާއްޖޭގެ ޒަކާތުގެ ނިޒާމަކީ ހަރުދަނާ އުސޫލުތަކެއްގެ މައްޗަށް އާރާސްތުކުރެވިފައިވާ ނިޒާމެއް ކަމަށް ވިދާޅުވެފައެވެ. އެގޮތުން ރާއްޖޭގެ ޒަކާތުގެ ނިޒާމަކީ ގާނޫނަކުން ރައްކާތެރިކަން ލިބިފައިވާ ނިޒާމެއް ކަމަށާއި ޒަކާތު ފައިސާ ބަލަހައްޓަމުންދަނީ މަރުކަޒީ ބޭންކު، އެމްއެމްއޭއިންކަން މިނިސްޓަރު ވަނީ ފާހަގަކުރައްވާފައެވެ.
އޭނާ ވަނީ، ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީއަތުގައިވާ ގޮތުގެ މަތިން ޝަރީއާ ގައިޑްލައިނެއް އާންމުކޮށް، އޭގައިވާ ގޮތުގެ މަތިން ކަމަށް ވިދާޅުވެފައެވެ.
https://x.com/Mohamedshaheem1/status/2106315328586121526
ޝަހީމް ވަނީ، ރާއްޖޭގެ ޒަކާތުގެ ނިޒާމަކީ ޚަރަދުކުރެވެމުންދާ ގޮތް މަހުން މަހަށް އާންމުކޮށް ހާމަކުރަމުންދާ ނިޒާމެއް ކަމަށާއި. ޒަކާތު ކައުންސިލާއި ޝަރީއާ ކޮމިޓީގެ ލަފާ ހޯދައިގެން ކުރިއަށްގެންދާ ނިޒާމެއްކަން ވެސް ފާހަގަކުރައްވައިފައެވެ.
މިނިސްޓަރު ވިދާޅުވި ގޮތުގައި ވޭތުވެދިޔަ ދެ އަހަރަކީ ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް ގެނެވުނު ދެ އަހަރެވެ.
މި އަހަރަކީ ދިވެހިރާއްޖޭގެ މުޅި ތާރީޚުގައި އެންމެ ގިނައިން ޒަކާތް ދެއްކި އަހަރު. އެންމެ ގިނައިން ފަގީރުންގެ ދަފުތަރުގައި ޖެހިފައިވާ ފަރާތްތަކަށް ހޭދަކުރެވުނީ މި ދެ އަހަރު. ފަގީރުންނަށް މާލީ އެހީތެރިކަން ދިނުމުގެ އިތުރުން ފަގީރުންގެ ތައުލީމާއި ސިއްހަތަށް ވެސް ހޭދަކުރެވުނު އަހަރު. އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު
މިނިސްޓަރު ވަނީ ޝަރީއާ ހުއްދަކުރާ މަގުން ޒަކާތު ފަންޑު އިތުރުކުރަން ގިނަ މަސައްކަތްތަކެއް ނިމިދިޔަ ދެ އަހަރުގެ ތެރޭގައި ފެށި ކަމަށް ވިދާޅުވެފައެވެ. އަދި ޒަކާތަށް ވަކި އިދަަރާއެއް ގާއިމުކޮށް، ދިވެހި ރައްޔިތުން ރާއްޖޭގެ ޒަކާތުގެ ނިޒާމަށް ދެމުން ގެންދާ އިތުބާރަށް މިނިސްޓަރު ވަނީ ޝުކުރު އަދާކުރައްވާފައެވެ.
މީގެ އިތުރުން. ގާނޫނަކުން ޒަކާތުގެ ނިޒާމު ތަރައްގީކޮށްދެއްވި ކަމަށް ޓަކައި މިނިސްޓަރު ވަނީ ރައީސް ޑރ. މުޙައްމަދު މުއިއްޒަށް ޝުކުރު އަދާކުރައްވާފައެވެ.
އިސްލާމިކް މިނިސްޓްރީގެ ދަށުން ހިންގާ ޒަކާތު ހައުސްގެ މައިގަނޑު މަސްއޫލިއްޔަތަކީ ޒަކާތް ބަލައިގަތުމާއި ބެހުމުގެ ނިޒާމު ހަރުދަނާކުރުމާއި، ޝަރުއީ ހަމަތަކުގެ މަތިން ޒަކާތު ފަންޑު ތަރައްގީކުރުމެވެ. އޭގެ އިތުރުން ފަގީރުންގެ ދަފުތަރު ބެލެހެއްޓުމާއި، ޒަކާތް ލިބޭ މީހުން ފުދުންތެރި ބަޔަކަށް ހެދުމަށް މަސައްކަތްކުރުމާއި، ޒަކާތާ ގުޅޭގޮތުން އާންމުންނާއި ވިޔަފާރިތައް ހޭލުންތެރިކުރުވުމަކީ ވެސް އެ އިދާރާގެ މަސައްކަތެކެވެ.
ޒަކާތު ހައުސް އުފެއްދުމަށްފަހު ޒަކާތް ދެއްކުމުގެ ކަންކަން ފަސޭހަކުރުމަށްޓަކައި އޮންލައިން ޕްލެޓްފޯމްތައް މެދުވެރިކޮށް ފައިސާ ދެއްކޭނެ އިންތިޒާމުތައް ވަނީ ހަމަޖައްސާފައެވެ. އަދި ޒަކާތުގެ މުހިންމުކަމާ ގުޅޭގޮތުން އާންމުން ހޭލުންތެރިކުރުވުމަށް ގިނަ ޕްރޮގްރާމްތަކެއް ދަނީ ހިންގަމުންނެވެ. މިގޮތުން، ޒަކާތާ ގުޅޭގޮތުން ރައްޔިތުންގެ ހޭލުންތެރިކަން އިތުރުކުރުމަށް އެކި ރަށްރަށުގައި މައުލޫމާތު ދިނުމުގެ ސެޝަންތައް ބާއްވާފައިވެއެވެ.