މި އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ލިބުނު ފައިސާގެ އަދަދު، މިދިޔަ އަހަރު އެއްކޮށް ލިބުނު އަދަދަށް ވުރެ އިތުރުވެއްޖެއެވެ.
މޯލްޑިވްސް ޒަކާތު ހައުސްގެ ތަފާސްހިސާބުތަކުން ދައްކާ ގޮތުގައި، މި އަހަރުގެ ޖެނުއަރީން ފެށިގެން މިދިޔަ ސެޕްޓެންބަރުގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109.6 މިލިއަން ރުފިޔާ ވަނީ ބަލައިގަނެފައެވެ. މިއީ މިދިޔަ އަހަރު އެއްކޮށް ލިބުނު 106.5 މިލިއަން ރުފިޔާއާ އަޅައިބަލާއިރު 2.8 މިލިއަން ރުފިޔާ އިތުރު އަދަދެކެވެ.
މި އަހަރުގެ މިހާތަނަށް ލިބުނު އަދަދަކީ މިދިޔަ އަހަރުގެ ޖުމުލަ އަދަދާ އަޅައިބަލާއިރު ގާތްގަނޑަކަށް 2.64 އިންސައްތައިގެ ކުރިއެރުމެކެވެ. މި މުއްދަތުގެ ތެރޭގައި ލިބުނު ފައިސާގެ ތެރޭގައި ހިމެނެނީ ދިވެހި ރުފިޔާއިން ލިބުނު 108.7 މިލިއަން ރުފިޔާއާއި، 34،021.41 ޑޮލަރެވެ.
މިދިޔަ އަހަރުގެ ޖުމުލަ އަދަދު ފަހަނައަޅައި ގޮސްފައި މިވަނީ، މި އަހަރު ނިމެން އަދި ތިން މަސްދުވަސް ބާކީ އޮއްވައެވެ. އެހެންކަމުން، އޮކްޓޫބަރު މަހުން ފެށިގެން ޑިސެންބަރު މަހުގެ ނިޔަލަށް ލިބޭ ފައިސާއާއެކު، މި އަހަރުގެ ޖުމުލަ އަދަދު އިތުރަށް ބޮޑުވާނެއެވެ.
މޯލްޑިވްސް ޒަކާތު ހައުސްއަކީ ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަގުސަދުގައި، 18 ޑިސެންބަރު 2023 ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި އިދާރާއެކެވެ. އަދި މި އަހަރުގެ ޖެނުއަރީގައި އަމަލުކުރަން ފެށި ޒަކާތުގެ ގާނޫނުގެ ދަށުން، އެ އިދާރާއަށް ވަނީ ގާނޫނީ ބާރުވެރިކަން ލިބިފައެވެ.
އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގާ މި އިދާރާގެ މައިގަނޑު މަސްއޫލިއްޔަތަކީ ޒަކާތް ބަލައިގަތުމާއި ބެހުމުގެ ނިޒާމު ހަރުދަނާކުރުމާއި، ޝަރުއީ ހަމަތަކުގެ މަތިން ޒަކާތު ފަންޑު ތަރައްގީކުރުމެވެ.
މީގެ އިތުރުން، ފަގީރުންގެ ދަފުތަރު ބެލެހެއްޓުމާއި، ޒަކާތް ލިބޭ މީހުން ފުދުންތެރި ބަޔަކަށް ހެދުމަށް މަސައްކަތްކުރުމާއި، ޒަކާތާ ގުޅޭގޮތުން އާންމުންނާއި ވިޔަފާރިތައް ހޭލުންތެރިކުރުވުމަކީ ވެސް އެ އިދާރާގެ މަސައްކަތެކެވެ.
ޒަކާތު ހައުސް އުފެއްދުމަށްފަހު، ޒަކާތް ދެއްކުމުގެ ކަންކަން ފަސޭހަކުރުމަށްޓަކައި އޮންލައިން ޕްލެޓްފޯމްތައް މެދުވެރިކޮށް ފައިސާ ދެއްކޭނެ އިންތިޒާމުތައް ވަނީ ހަމަޖައްސާފައެވެ. އަދި ޒަކާތުގެ މުހިންމުކަމާ ގުޅޭގޮތުން އާންމުން ހޭލުންތެރިކުރުވުމަށް ގިނަ ޕްރޮގްރާމްތަކެއް ދަނީ ހިންގަމުންނެވެ. މިގޮތުން، ޒަކާތާ ގުޅޭގޮތުން ރައްޔިތުންގެ ހޭލުންތެރިކަން އިތުރުކުރުމަށް އެކި ރަށްރަށުގައި މައުލޫމާތު ދިނުމުގެ ސެޝަންތައް ބާއްވާފައިވެއެވެ.