ކާލާ މަންނަ އެކެޑަމީން އިންތިޒާމުކޮށްގެން ބާއްވާ "ފިޔަވަނަ ޗެރިޓީ ފެމިލީ ފެސްޓިވަލް" އަންނަ ހުކުރު ދުވަހު މާލޭ ސިޓީ ހޯލުގައި ބޭއްވުމަށް ހަމަޖެހިއްޖެއެވެ.
މި ފެސްޓިވަލުގެ މައިގަނޑު ހަރަކާތްތަކުގެ ތެރޭގައި ހަވީރު ކުޑަކުދިންނަށް ޚާއްސަ، މަޖާ ކުޅިވަރުތަކާއި ހަރަކާތްތަކުގެ އިތުރުން، ރޭގަނޑު ފޯރިގަދަ މިއުޒިކް ޝޯއެއް ހިމެނޭނެއެވެ.
އެ ޝޯގައި ރާއްޖޭގެ މަޝްހޫރު ފަންނާނުން ކަމަށްވާ އަހްމަދު އިބްރާހިމް (އައްމަޑޭ)، އަލީ އިއުފާފް އިސްމާއިލް، އަބްދުﷲ އީސާ ފުޅު (އީސަ)، ޑީޖޭ އެފްރޯ އަދި ފަސީ ލައިވްގެ ހުށަހެޅުންތައް ފެންނާނެއެވެ.
ފެސްޓިވަލް ތެރެއިން، ރޭގަނޑު މިއުޒިކް ޝޯއެއް ވެސް ކުރިއަށްގެންދާނެ -- ސަން ފޮޓޯ އެ އިވެންޓް ޕްރޮމޯޓް ކުރުމުގެ ގޮތުން އިއްޔެ ސަލްޓަން ޕާކުގައި ވަނީ ޚާއްސަ ޕްރީ-ޝޯއެއް ބާއްވާފައެވެ. އެގޮތުން އިއްޔެ ހަވީރު 4:00 އިން 6:00 އަށް ކުޑަކުދިންގެ ހަވީރެއް ކުރިއަށްދިޔައިރު، ރޭގަނޑު 8:00 އިން 11:00 އަށް ވަނީ މިއުޒިކް ޝޯއެއް ބާއްވާފައެވެ.
ފެސްޓިވަލުގެ ޓިކެޓް، 9891419 ނުވަތަ 7779929 އަށް ގުޅުމުން ބުކް ކުރެވޭނެއެވެ.
ފިޔަވަނަ ޗެރިޓީގެ "ފަން ޒޯން ޕާޓްނަރު" ގެ ގޮތުގައި އެޑްވެންޗާ އަޕް ބައިވެރިވާއިރު، މީޑިއާ ޕާޓްނަރަކީ އެސްއެސްޓީވީއެވެ. އަދި ޓެކްނިކަލް ޕްރޮޑަކްޝަން ޕާޓްނަރަކީ އިފެކްޓްސް އެންޓަޓެއިންމަންޓެވެ.
ކާލާ މަންނަ އެކަޑަމީން ބުނީ މި ހަރަކާތުގެ މައިގަނޑު މަގުސަދަކީ ޚާއްސަ އެހީއަށް ބޭނުންވާ ކުދިންނަށް އެހީތެރިވުމަށް ފައިސާ ހޯދުން ކަމަށެވެ.