އައިފޯން ޑުއޯ ޕްރީ އޯޑަރު ކުރުމަށް ތައްޔާރުކޮށްފައިވާ ސައްހަ ނޫން ވެބްސައިޓެއް މެދުވެރިކޮށް، އައިފޯން ބޭނުންކުރާ ފަރާތްތަކުގެ ކްރިޕްޓޯކަރަންސީ ވޮލެޓްތަކާއި އަމިއްލަ މައުލޫމާތު ވަގަށް ނެގުމުގެ ނުރައްކާތެރި ހަރަކާތެއް ހިންގަމުންދާކަމުގެ އިންޒާރު ސައިބާ ސެކިއުރިޓީ ކްލައުޑް ކުންފުނި މެލްވެއާބައިޓްސްއިން ދީފިއެވެ.
އައިފޯން ޑުއޯ އޯޑަރު ކުރުމުގެ ފުރުސަތު ރަސްމީކޮށް ހުޅުވާލުމަށް ހަމަޖެހިފައިވަނީ އޮކްޓޯބަރު 16 ވާ ހުކުރު ދުވަހު ކަމަށްވީ ނަމަވެސް، މަކަރުވެރިން ދަނީ އެޕަލްގެ ރަސްމީ ޑިޒައިނާ އެއްގޮތަށް ތައްޔާރުކޮށްފައިވާ ވެބްސައިޓެއް މެދުވެރިކޮށް، "އޮތޮރައިޒްޑް ޕާޓްނާ އެކްސްކްލޫސިވް" އޮފާއެއްގެ ގޮތުގައި 500 ޑޮލަރުގެ ޑިސްކައުންޓް ވައުޗަރެއް ދޭނެ ކަމަށް ބުނެ އާންމުންނަށް އޮޅުވާލުމަށް މަސައްކަތްކުރަމުންނެވެ.
މި ސައްހަ ނޫން ވެބްސައިޓަށް ވަނުމާއެކު "ޑާކްސްވޯޑް" ނަމަކަށް ކިޔާ ނުރައްކާތެރި އެކްސްޕްލޮއިޓް ޗެއިނެއް މެދުވެރިކޮށް، އަޕްޑޭޓް ނުކޮށް ހުރި އައިފޯންތަކަށް ވަގުތުން ހަމަލާ އަމާޒުވެގެންދެއެވެ. ސައިބާ ސެކިއުރިޓީ މާހިރުން ބުނާ ގޮތުގައި، މި ހަމަލާ ކުރިއަށްގެންދިއުމަށްޓަކައި ޔޫޒަރުގެ އެއްވެސް އިތުރު އަމަލަކަށް (މިސާލަކަށް އެއްޗެއް ޑައުންލޯޑް ކުރުން ނުވަތަ ފޯމެއް ފުރުން) އިންތިޒާރެއް ނުކުރެއެވެ. ވެބްސައިޓް ހުޅުވާލުމާއެކު އޮޓޯއިން މެލްވެއާ އޭގެ މަސައްކަތް ފަށައި، ފޯނުގެ އައިޑެންޓިޓީ މައުލޫމާތާއި، ފޯނުގައި ހުރި އެޕްލިކޭޝަންތަކުގެ ލިސްޓުގެ އިތުރުން އެޕަލް ނޯޓްސްގައި ހުރި މައުލޫމާތު ވަގަށް ނަގަން އުޅެއެވެ.
މި މެލްވެއާގެ މައިގަނޑު އަމާޒަކީ ޑިޖިޓަލް ކްރިޕްޓޯ ވޮލެޓްތަކުން ފައިސާ ހޯދުމެވެ. އެގޮތުން މެޓާމާސްކް، ފެންޓަމް، ޓްރަސްޓް ވޮލެޓް، ކޮއިންބޭސް ވޮލެޓް، އެކްސޮޑަސް އަދި ޓޮންކީޕާ ފަދަ މަގުބޫލު ވޮލެޓްތައް ފޯނުގައި ހުރިތޯ ބަލައި، އެ އެޕްތަކުގެ ފައިލްތަކާއި ފޯނުގެ ކީޗެއިންގައި ރައްކާކޮށްފައިވާ ސެކިއުރިޓީ ކްރެޑެންޝިއަލްތައް އަތުލައިގަތުމަށް މަސައްކަތް ކުރެއެވެ. މީގެއިތުރުން ފޯނުގައިވާ މެސެޖުތަކާއި، ކޮންޓެކްޓްސް، ކޯލް ލޮގް، ވޮއިސްމެއިލް، އީމެއިލް، ކަލަންޑަރުގެ އެޕޮއިންޓްމަންޓްތަކުގެ އިތުރުން ސޭވްވެފައިވާ ލޮކޭޝަން މައުލޫމާތުވެސް ސާވާއަށް ފޮނުވާލަން މި މެލްވެއާ މަސައްކަތްކުރެއެވެ.
މި ސައިބާ ހަމަލާގައި ބޭނުންކޮށްފައިވާ "ޑާކްސްވޯޑް" އެކްސްޕްލޮއިޓްގެ ނުރައްކާ ފުރަތަމަ ފާހަގަކޮށްފައިވަނީ ގޫގުލްގެ ތްރެޓް އެނަލިސިސް ގްރޫޕުން މި އަހަރުގެ މާރިޗު މަހުގެ ތެރޭގައެވެ. އެޕަލްއިން ވަނީ އެ ދުވަސްވަރު ނެރުނު ސެކިއުރިޓީ އަޕްޑޭޓްތަކުގައި މި މައްސަލައަށް ހައްލެއް ހޯދައިދީފައެވެ. ނަމަވެސް، އައިއޯއެސް އެންމެ ފަހުގެ ވާޝަނަށް އަޕްޑޭޓް ނުކޮށް ހުންނަ ފޯނުތަކަށް މި ހަމަލާގެ ނުރައްކާ އަދިވެސް ބޮޑެވެ. ސެކިއުރިޓީ ރިސާޗަރުން ބުނާ ގޮތުގައި، މި މެލްވެއާއަކީ ސައިބާ ޖާސޫސީ ކަންކަމަށާއި މާލީ މަންފާ ހޯދުމުގެ ބޭނުމުގައި ތައްޔާރުކޮށްފައިވާ އެކްސްޕްލޮއިޓެކެވެ.
އެޕަލްގެ ވަސީލަތްތައް ބޭނުންކޮށްގެން ކްރިޕްޓޯކަރަންސީއަށް އަމާޒުކޮށް އޮޅުވާލައިގެން ހިންގާ މިފަދަ ޖަރީމާތައް ވަނީ އިތުރުވާން ފަށާފައެވެ. އެގޮތުން، މި އަހަރުގެ ޖުލައި މަހުގެ ތެރޭގައިވެސް އެޕަލްގެ އެޕް ސްޓޯރުން ސައްހަ ނޫން ބިޓްކޮއިން ވޮލެޓް އެޕެއް (ސްޕެރޯ ވޮލެޓްގެ ނަމުގައި) ޑައުންލޯޑް ކުރެވުމުގެ ސަބަބުން 1.8 މިލިއަން ޑޮލަރު ގެއްލުނު ކަމަށް ބުނެ ތިން ކަސްޓަމަރަކު ވަނީ އެމެރިކާގެ ކެލިފޯނިއާގެ ކޯޓެއްގައި އެޕަލްއާ ދެކޮޅަށް ދައުވާވެސް ކޮށްފައެވެ.
މިފަދަ ނުރައްކާތަކުން ރައްކާތެރިވުމަށްޓަކައި، އައިފޯން ބޭނުންކުރާ އެންމެހާ ފަރާތްތަކުން ފޯނުގެ އޮޕަރޭޓިން ސިސްޓަމް އެންމެ ފަހުގެ އައިއޯއެސް އަޕްޑޭޓަށް ބަދަލުކުރުމަށާއި، އަދި ނުދަންނަ ސައިޓްތަކުން ފެންނަ ލިންކުތަކަށާއި ޕްރީ-އޯޑަރުގެ ނަމުގައި އަންނަ އޮފަރުތަކަށް ނުވަނުމަށް ސެކިއުރިޓީ މާހިރުން އިލްތިމާސްކުރެއެވެ.
ސައްހަ ނޫން ސައިޓަކަށް ވަދެވިފައިވާނަމަ، ފޯނު އަޕްޑޭޓް ކުރުމަށްފަހު ރީސްޓާޓް ކުރުމަށާއި، ކްރިޕްޓޯ ވޮލެޓްތަކުގެ ސެކިއުރިޓީ ކީސްތައް ބަދަލުކުރުމަށްވެސް އިރުޝާދު ދީފައިވެއެވެ.