ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޑޮމެސްޓިކް ޓާމިނަލުން ފުރަން ދިޔަ ދިވެހި ފިރިހެނެއްގެ އަތުން ވަޒަނެއްގެ ހުސް ދޯރިއެއް ފެނިއްޖެއެވެ.
ފުލުހުން ބުނި ގޮތުގައި މި ހާދިސާ ހިނގާފައިވަނީ މިއަދު ހެނދުނުގެ ވަގުތެއްގައެވެ.
އެ މީހާގެ އަތުން މި ތަކެތި ފެނިފައިވަނީ، އެތެރޭގެ އުދުހުންތަކުގައި ދަތުރުކުރުމަށްޓަކައި ޓާމިނަލަށް ގޮސް، އޭވިއޭޝަން ސެކިއުރިޓީ ކޮމާންޑުގެ ފަރާތުން ކުރިއަށްގެންދިޔަ ރޫޓީން ސެކިއުރިޓީ ސްކްރީނިން މަރުހަލާގެ ތެރެއިންނެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް އަދި އެއްވެސް މީހަކު ގެންގޮސްފައެއް ނުވެއެވެ. ނަމަވެސް، ދިވެހި ފުލުހުންގެ ހިދުމަތުން ގެންދަނީ މި މައްސަލަ ތަހުގީގު ކުރަމުން ކަމަށް ފުލުހުން ބުންޏެވެ.
ރާއްޖޭގެ ގާނޫނުތައް ބުނާ ގޮތުން، ދައުލަތުގެ ކަމާބެހޭ ފަރާތްތަކުން ދޫކުރާ ޚާއްސަ ހުއްދައެއްގެ ދަށުން ނޫނީ ހަތިޔާރާއި ވަޒަން ފަދަ ތަކެތި ގެންގުޅުމަކީ މަނާ ކަމެކެވެ. އަދި މިއީ ޖިނާއީ ބޮޑު ކުށެކެވެ.
މީގެ ކުރިން ވެސް ވެލާނާ އިންޓަނޭޝަނަލް އެއާޕޯޓުންނާއި ރާއްޖޭގެ އެހެން ބައެއް އެއާޕޯޓުތަކުން ފުރަން ދިޔަ މީހުންގެ އަތުންނާއި ލަގެޖުން ވަޒަން ފަދަ ތަކެތި ފެނިގެން ފުލުހުންނާއި ސިފައިން އެ މައްސަލަތައް ބަލާފައިވެއެވެ. އެގޮތުން ބޭރުގެ ފަތުރުވެރިންގެ އަތުން މިފަދަ ތަކެތި ފެނިފައިވާކަން ފާހަގަކުރެވެއެވެ.
މިފަދަ ހާދިސާތަކާ ގުޅިގެން އެއާޕޯޓުތަކުގެ ސަލާމަތީ ކަންކަން އިތުރަށް ހަރުދަނާކޮށް، ސްކްރީން ކުރުމުގެ ނިޒާމު ވަނީ ވަރުގަދަކޮށްފައެވެ.