ހުޅުމާލޭ ދެވަނަ ފިޔަވަހީގައި، ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީކޮށްފައިވާ 4000 ހައުސިން ޔުނިޓުގެ ތެރެއިން ހުއްދަނެތި ކުއްޔަށް ދިނުމުގެ 16 މައްސަލައެއް ބަލަމުން އަންނައިރު، ގަވާއިދުން ކުލި ނުދައްކާ 564 ޔުނިޓު ހުރިކަން އެ ކުންފުނިން ހާމަކޮށްފިއެވެ.
އެފްޑީސީން އިއްޔެ ސޯޝަލް މީޑިއާގައި ހާމަކޮށްފައިވާ ތަފާސްހިސާބުތަކުން ދައްކާ ގޮތުގައި، އެންމެ ގިނައިން ހުށަހަޅާފައިވަނީ ހުއްދަ ނެތި ހައުސިން ޔުނިޓުތަކަށް ބަދަލު ގެނައުމުގެ މައްސަލަތަކެވެ. އެގޮތުން، ޔުނިޓުތަކަށް ބަދަލު ގެނައުމުގެ 28 މައްސަލައެއް ބަލަމުން އަންނައިރު، އޭގެ ތެރެއިން ފަސް މައްސަލައެއްގައި ޔުނިޓުގެ ވެރިފަރާތް ވަނީ ޖޫރިމަނާކޮށްފައެވެ.
މީގެ އިތުރުން، ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ދޫކޮށްފައިވާ މި ފްލެޓުތައް ހުއްދަނެތި ކުއްޔަށް ދޫކުރުމުގެ 16 މައްސަލައެއް ވެސް އެ ކުންފުނިން އަންނަނީ ބަލަމުންނެވެ. މި ފްލެޓުތައް ދޫކޮށްފައިވަނީ ކުއްޔަށްދޭނަމަ ފިޔަވަޅުއަޅާނެކަމުގެ އިންޒާރާއެކުގައި ކަމަށްވާއިރު، ކުއްޔަށް ދިން ފަސް ޔުނިޓެއްގެ ވެރިފަރާތް ޖޫރިމަނާކޮށް، ދެ ޔުނިޓެއްގެ ވެރިފަރާތަށް ވަނީ ނޯޓިސް ފޮނުވާފައެވެ. އަދި ކުއްޔަށް ދިނުމާ ގުޅޭ އިތުރު ނުވަ މައްސަލައެއް މިހާރު ވެސް އަންނަނީ ބަލަމުންނެވެ.
https://x.com/Fdc_mv/status/2105617649678061900
މީގެ އިތުރުން ވެސް، އެޕާޓްމަންޓަށް ބަދަލު ގެނައުމާއި ކުނި އެޅުމުގެ ގަވާއިދާ ހިލާފުވުން ފަދަ ޖުމްލަ 49 މައްސަލައެއް މިދިޔަ މަހުގެ 21 ވަނަ ދުވަހާ ހަމައަށް ވަނީ ހުށަހަޅާފައެވެ.
ގަވާއިދާ ހިލާފަށް ކުނި އެޅުމުގެ ތިން މައްސަލައެއް ފާހަގަކުރެވިފައިވާއިރު، އޭގެ ތެރެއިން ދެ މައްސަލައެއްގައި ހިމެނޭ ފަރާތްތައް ޖޫރިމަނާކޮށްފައިވާ ކަމަށް އެފްޑީސީން ބުނެފައިވެއެވެ. އަދި އެންގުންތަކަށް އަމަލުނުކުރުމުގެ ދެ މައްސަލައަކާއި، އަޑުގަދަވުމުގެ ޝަކުވާއާ ގުޅިގެން ހުށަހަޅާފައިވާ ދެ މައްސަލައެއް ވެސް އެ ކުންފުނިން ވަނީ ބަލާފައެވެ.
ފްލެޓުތަކުގެ ކުއްޔާ ގުޅޭގޮތުން އެފްޑީސީން ބުނެފައިވަނީ، މަހުން މަހަށް ގަވާއިދުން ކުލި ދައްކަމުންދަނީ 3،362 ޔުނިޓުން ކަމަށެވެ. ނަމަވެސް، ގަވާއިދުން ކުލި ނުދައްކާ 564 ޔުނިޓު ހުރިކަން އެ ކުންފުނިން ފާހަގަކުރެއެވެ.
ސަރުކާރުން އިމާރާތްކޮށް މީހުންނަށް ދީފައިވާ ސޯޝަލް ހައުސިން ޔުނިޓުތަކުން ކުލި ނުދެއްކުމަކީ ރާއްޖޭގައި އާންމުކޮށް ފެންނަ ކަމެކެވެ. މިފަދަ މައްސަލަތައް ހުއްޓުވުމަށް އެކަށީގެންވާ ފިޔަވަޅުތައް އެޅުމުގެ ބަދަލުގައި، އިންތިހާބުތަކާ ދިމާކޮށް ކުލީގެ މައާފުތައް ދިނުމަކީ ވެސް އާންމު ކަމެއްގެ ގޮތުގައި ވަނީ ފާހަގަކުރެވިފައެވެ.
އެފްޑީސީގެ އަމާން އުދަރެސް އަދި އަމާން ދޯދި ފްލެޓުތަކާ ގުޅިގެން އާންމުންގެ ފަރާތުން ގިނަ ޝަކުވާތަކެއް ހުށަހަޅަމުންދާއިރު، އެ ތަންތަނުގެ އުސޫލުތަކާ ހިލާފުވާ ފަރާތްތަކުގެ މައްސަލަތައް އެ ކުންފުނިން މިހާރު އަންނަނީ ބަލަމުންނެވެ.