އާންމު ތަންތަނާއި މަގުމަތީގައި އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކޮށް، އިޖުތިމާއީ އަދި އަހުލާގީ މިންގަނޑުތައް ހިފެހެއްޓުމަށް ދިވެހިރާއްޖޭގައި ދިރިއުޅޭ ބިދޭސީންނަށާއި ފަތުރުވެރިންނަށް ދިވެހި ފުލުހުންގެ ހިދުމަތުން ހަނދާންކޮށްދީފިއެވެ.
ފުލުހުން ނެރުނު ނޫސްބަޔާނެއްގައި ބުނި ގޮތުގައި، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައި އަދި އާންމު ތަންތަނުގައި އުޅޭކަން ވަނީ ފާހަގަކުރެވިފައެވެ. ބައެއް ބިދޭސީންގެ މިފަދަ އަމަލުތަކަކީ މުޖުތަމައުގެ އާންމު ސުލޫކު އަދި އަހުލާގީ މިންގަނޑުތަކާ ހިލާފު އަމަލުތަކެއް ކަމަށް ފުލުހުން ފާހަގަކުރިއެވެ.
އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ހާލަތްތަކެއް ކުރިމަތިވުމުގެ ކުރިން، އެފަދަ ކަންކަން ހުއްޓުވުމަށް އެޅެން ހުރި ފިޔަވަޅުތައް އަޅާނެކަމަށް ފުލުހުން ބުނެފައިވެއެވެ.
މީގެ އިތުރުން، އާންމު އިޖުތިމާއީ މިންގަނޑުތައް ހިފެހެއްޓުމުގެ ގޮތުން، ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް މައުލޫމާތުދީ ހޭލުންތެރިކުރުވުމަށް ފުލުހުން ވަނީ އިލްތިމާސްކޮށްފައެވެ.
ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށް ކަނޑައެޅިފައިވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކުރުމަށް ފުލުހުން އެދިފައިވެއެވެ. އަދި މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް، ފަތުރުވެރިންނަށް ޚިދުމަތް ދޭ ފަރާތްތަކުން ޚާއްސަ ސަމާލުކަމެއް ދިނުމަށް ފުލުހުން ވަނީ ހަނދާންކޮށްދީފައެވެ.
މިކަންކަމާ ހިލާފަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށްވެސް އެ ބަޔާނުގައި ފުލުހުން ވަނީ އިންޒާރުދީފައެވެ.