އެމެރިކާގެ ޓެނެސީ ސްޓޭޓްގައި މަރުގެ ހުކުމް ތަންފީޒުކުރުމަށް ދިން ލީތަލް އިންޖެކްޝަންގެ ދެ ޑޯޒުން ސަލާމަތްވި ކްރިސްޓާ ޕައިކްގެ ހާލު ސީރިއަސް ކަމަށް އޭނާގެ ވަކީލު ބުނެފިއެވެ.
މި ހާދިސާއާ ގުޅިގެން، އެ ސްޓޭޓްގައި މިއަހަރަށް ތާވަލުކޮށްފައިވާ މަރުގެ ހުކުމް ތަންފީޒުކުރުންތައް ގަވަރުނަރު ވަނީ ހުއްޓުވާފައެވެ.
ޓެނެސީގެ ގަވަރުނަރު ބިލް ލީ މިގޮތަށް ނިންމެވީ، އުމުރުން 50 އަހަރުގެ ކްރިސްޓާ ޕައިކްގެ މަރުގެ ހުކުމް ތަންފީޒުކުރުމަށް ބުދަ ދުވަހު ކުރި މަސައްކަތް ނާކާމިޔާބުވުމާ ގުޅިގެންނެވެ. ޕައިކްގެ މައްޗަށް މަރުގެ ހުކުމް އިއްވާފައިވަނީ 1996 ވަނަ އަހަރު، އޭނާގެ އޭރުގެ ލޯބިވެރިޔާ ޓަޑެރީލް ޝިޕްއާ ގުޅިގެން އުމުރުން 19 އަހަރެގެ ކޮލީން ސްލެމާއަށް އަނިޔާކޮށް މަރާލި މައްސަލައިގައެވެ. އެ ހާދިސާ ހިނގިއިރު ޕައިކްގެ އުމުރަކީ 18 އަހަރެވެ.
ޕައިކްގެ ވަކީލު ރޭންޑީ ސްޕައިވީ އިއްޔެ ނޫސްވެރިންނަށް މައުލޫމާތު ދެމުން ވިދާޅުވި ގޮތުގައި، ޕައިކްގެ ހާލަތު ސީރިއަސް ނަމަވެސް އޭނާ އަދި ދުނިޔޭގައި އެބައޮތެވެ. އެމެރިކާގެ ސުޕްރީމް ކޯޓުން ހުއްދަ ދިނުމާ ގުޅިގެން ބުދަ ދުވަހު ޕައިކްގެ ގަޔަށް ޕެންޓޯބާބިޓޯލް ކެމިކަލްގެ ދެ ޑޯޒް ދީފައިވާ ކަމަށް ވަކީލުން ވިދާޅުވިއެވެ.
ހުކުމް ތަންފީޒުކުރާ ޓީމުން ވަނީ ޕައިކްގެ ގަޔަށް އައިވީ ގުޅުމަށް ގަޑިއިރެއްހާއިރު މަސައްކަތްކޮށްފައެވެ. އެގޮތުން ވާތަށް އެކަނިވެސް ހަތް ކަށި ޖަހާފައިވާ ކަމަށާއި، އޭގެ ތެރެއިން އެއް ކަށި ނެގިއިރު އޮތީ ލެނބިފައި ކަމަށް ސްޕައިވީ ވިދާޅުވިއެވެ. ދެވަނަ ޑޯޒް ދިނުމަށްފަހުވެސް ޕައިކް ނޭވާލަމުންދިޔަ ކަމަށާއި، އެ މަންޒަރު ބަލަން ތިބި މީހުން ބައިތިއްބާފައި ތިބީ ކަނުއަނދިރި ކޮޓަރިއެއްގައި ދޮރުފޮތިގަނޑެއްގެ ފުރަގަށުގައި ކަމަށް ވަކީލު ފާހަގަކުރެއްވިއެވެ. މިއީ ރަހުމުކުޑަ އަދި އާދަޔާ ހިލާފު އަދަބެއް ކަމަށް ވިދާޅުވެ، ޕައިކްގެ ވަކީލުން ވަނީ ކަންބޮޑުވުން ފާޅުކުރައްވައިފައެވެ.
މި ހާދިސާއާ ގުޅިގެން ގަވަރުނަރު ލީ ވަނީ މަރުގެ ހުކުމް ތަންފީޒުކުރުމުގެ ކަންކަން ކުރިއަށްދިޔަ ގޮތް ތަހުގީގުކުރުމަށް މިނިވަން ރިވިއުއަކަށް އަމުރުކުރައްވާފައެވެ. ގަވަރުނަރު ވިދާޅުވި ގޮތުގައި މިކަމުގައި އާންމުންގެ ގިނަ ސުވާލުތަކެއް ހުރިއިރު، އެ ސުވާލުތަކަށް ޖަވާބު ދިނުމަކީ މުހިންމު ކަމެކެވެ. ޓެނެސީގެ އެޓާނީ ޖެނެރަލްގެ އޮފީހުންވެސް ވަނީ މި މައްސަލަ ތަހުގީގުކުރުމަށް ތާއީދުކޮށްފައެވެ.
ނަމަވެސް ޓެނެސީ ޑިޕާޓްމަންޓް އޮފް ކަރެކްޝަނުން ނެރުނު ބަޔާނެއްގައި ބުނެފައިވަނީ، ހުކުމް ތަންފީޒުކުރުމުގެ ކަންކަން ކުރިއަށް ގެންދިޔައީ ގާނޫނީ އިމުގެ ތެރެއިން، އެޓާނީ ޖެނެރަލްގެ އޮފީހުން ފާސްކޮށްފައިވާ އުސޫލުތަކާ އެއްގޮތަށް ކަމަށެވެ. އަދި ބޭނުންކުރި ކެމިކަލަކީ އާންމުކޮށް ކާމިޔާބު ކެމިކަލެއް ކަމަށް އެ ޑިޕާޓްމަންޓުން ބުންޏެވެ.
ސްލެމާގެ މަންމަ މޭ މާޓިނޭޒް އެންބީސީ ނިއުސްއަށް މައުލޫމާތު ދެމުން ބުނީ، ހުކުމް ތަންފީޒުކުރުމުގެ ކަންކަން ދިޔައީ ވަރަށް ގޯސްކޮށް ކަމަށެވެ. މި މައްސަލައާ ގުޅިގެން ސިޔާސީ ފަރާތްތަކުންވެސް ދަނީ ވާހަކަދައްކަމުންނެވެ. ޓެނެސީގެ ގަވަރުނަރު ކަމަށް ވާދަކުރައްވާ ރިޕަބްލިކަން ޕާޓީގެ ސެނެޓަރު މާޝާ ބްލެކްބާން ވިދާޅުވީ، މި މައްސަލަ ތަހުގީގުކުރަން ޖެހޭ ކަމަށާއި، ނަމަވެސް ހައްލަކީ އަލުން އިލެކްޓްރިކް ގޮނޑި ބޭނުންކުރަން ފެށުން ކަމަށެވެ. އޭނާއާ ވާދަކުރައްވާ ޑިމޮކްރެޓިކް ޕާޓީގެ ކެންޑިޑޭޓް ޖެރީ ގްރީން ވަނީ އެކަމަށް ފާޑުކިޔައި، އޭނާ ގަވަރުނަރު ކަމަށް އިންތިހާބުވެއްޖެނަމަ މަރުގެ ހުކުމް ތަންފީޒުކުރުން ހުއްޓުވާނެ ކަމަށް އެކްސްގައި ވިދާޅުވެފައެވެ.
މިއީ މި އަހަރުގެ ތެރޭގައި ޓެނެސީގައި މަރުގެ ހުކުމް ތަންފީޒުކުރަން އުޅެ ނާކާމިޔާބުވި ދެވަނަ ފަހަރެވެ. މީގެ ކުރިން މެއި މަހު ޓޯނީ ކަރޫތާސްގެ ހުކުމް ތަންފީޒުކުރުން ހުއްޓާލީ އޭނާގެ ގަޔަށް އިންޖެކްޝަން ޖަހާނެ ނާރެއް ނުފެނުމުންނެވެ. ގަވަރުނަރުގެ އެންގެވުމާ ގުޅިގެން، ޑިސެންބަރު ތިނެއްގައި ތާވަލުކޮށްފައިވާ ގެރީ ސަޓަންގެ މަރުގެ ހުކުމް ތަންފީޒުކުރުންވެސް މިހާރު ވަނީ މަޑުޖެހިފައެވެ.
ޕައިކްގެ ވަކީލުން މިހާރު ދަނީ އޭނާގެ މަރުގެ ހުކުމް ލުއިކޮށްދިނުމަށް އެދެމުންނެވެ.