އެތައް އަހަރެއް ވަންދެން އޮތް ގުޅުންތައް ސިޔާސީ ޚިޔާލުތަފާތުވުމުގެ ސަބަބުން ފަނޑުވިޔަ ނުދޭން ވިސްނަން ވާނެ ކަމަށް، ކުރީގެ ރައީސް އިބްރާހީމް މުޙައްމަދު ޞާލިޙް މިރޭ ވިދާޅުވެއްޖެއެވެ.
މައި އިދިކޮޅު ޕާޓީ އެމްޑީޕީގެ ކޮންގްރެސްގެ އިފުތިތާހީ ޖަލްސާގައި ވާހަކަފުޅު ދައްކަވަމުން ޞާލިޙް ވިދާޅުވީ މިއަދު އެމްޑީޕީގެ އެތެރޭގައި 2028ވަނަ އަހަރުގެ ރިޔާސީ ޓިކެޓަށް އޮތް ވާދަވެރިކަން ބޮޑު ކަމަށެވެ.
ޕާޓީގެ އެތެރޭގެ އިންތިޚާބުތަކުގައި ހަރުދަނާ ވާދަވެރިކަމެއް އޮންނަންޖެހޭނެ ކަމަށް ޞާލިޙް ގަބޫލުކުރައްވައެވެ. އެއް ކެންޑިޑޭޓެއްގެ ސިޔާސަތު އަނެއް ކެންޑިޑޭޓުގެ ސިޔާސަތާ ތަފާތުވާނެކަން ފާހަގަކުރައްވައި ޞާލިޙް ވިދާޅުވީ ވާދަކުރާ ކެންޑިޑޭޓުންނަށް އާންމުންގެ ތާއީދު ލިބޭ ގޮތް ވެސް ތަފާތުވާނެ ކަމަށެވެ.
"އެކަމަކު އެ ވާދަވެރިކަން ނިމުމުން އަލުން އެކުގައި ކުރިއަށް ދިއުމުގެ ހިތްވަރު ކޮންމެ މީހެއްގެ ވެސް ހުންނަންވާނެ، ޕާޓީ ތެރޭގައި ޚިޔާލު ތަފާތުވާ ދެ މީހުންނަކީ ދުޝްމަނުއްނެއް ނޫން، އެއީ ހަމަ އެއް ސިޔާސީ އާއިލާއެއްގެ މީހެއް، އެއީ މި ދެންނެވި ދިގު ދަތުރު އެކުގައި ކުރި އެކަކު، އެތައް އަހަރެއްވަންދެން އޮތް ގުޅުންތައް ވަގުތީ ސިޔާސީ ޚިޔާލުތަފާތުވުމަކުން ފަނޑވެގެން ދިޔަ ނުދިއުމަށް އަޅުގަނޑުމެން ވިސްނުން ގެންގުޅެންވާނެ،" ޞާލިޙް ވިދާޅުވިއެވެ.
އެމްޑީޕީ ކޮންގްރެސްގެ އިފުތިތާހީ ޖަލްސާގައި ކުރީގެ ރައީސް އިބްރާހީމް މުޙައްމަދު ޞާލިޙް ވާހަކަފުޅު ދައްކަވަނީ: ވިދާޅުވީ އެތައް އަހަރެއް ވަންދެން އޮތް ގުޅުންތައް ސިޔާސީ ޚިޔާލުތަފާތުވުމުގެ ސަބަބުން ފަނޑުވިޔަ ނުދޭން ވިސްނަން ވާނެ ކަމަށް --- ސަން ފޮޓޯ: ޙަސަން ޙާފިޒުއެމަނިކުފާނު ވިދާޅުވީ އުފެދޭ ސިޔާސީ ޚިޔާލުތަފާތުވުންތަކުގެ ސަބަބުން އާންމުންގެ މަސްލަހަތާ ދެކޮޅަށް ސަމާލުކަން އެނބުރިގެން ނުވާނެ ކަމަށެވެ.
"ރައީސް ނަޝީދު، އަޅުގަނޑު ކައިރީގަ މީހަކު އިހައް ދުވަހު ބުނި، ރައީސް އިބޫއާއި ރައީސް ނަޝީދު ސިޔާސީ އެއް ފިކުރެއްގައި މަސައްކަތްކޮށްފިއްޔާ މި ޕާޓީއަށް މި އޮތީ ވެރިކަން ލިބިފައޭ،" ޞާލިޙް ވިދާޅުވިއެވެ.
އެއްވެސް މެންބަރަކު އެމްޑީޕީއަށް ވުރެ ބޮޑުނުވާނެ ކަމަށާއި އެއްވެސް ސިޔާސީ ޕާޓީއެއް މި ގައުމަށް ވުރެ ބޮޑުނުވާނެ ކަމަށް ޞާލިޙް ވިދާޅުވިއެވެ.
އެމަނިކުފާނު ވިދާޅުވިގޮތުގައި އެމްޑީޕީ އަލުން ވެރިކަމަށް އައުމަށްޓަކައި ކުރަންވީ ކަމަކީ އާންމުންގެ އިތުބާރު އިތުރަށް ހޯދުމެވެ. ޞާލިޙް ވިދާޅުވިގޮތުގައި އެ އިތުބާރު ހޯދަން ބޭނުންނަމަ މަސައްކަތް ކުރަންވާނީ ޕާޓީގެ އެންމެ އެތެރެއިންނެވެ.
ޞާލިޙް ވިދާޅުވީ އިތުބާރު ހޯދޭނީ ރައްޔިތުންގެ އަޑުއަހައި ކުރީގެ ގޯސްތައް ގަބޫލުކޮށް ހަގީގީ ހައްލުތަކެއް ހުށަހަޅައި އިހްތިރާމްކޮށްގެންނެވެ.
"އަދި އެންމެ މުހިންމުކަމަކީ އިތުބާރު ހޯދޭނީ އަމަލުން،" ޞާލިޙް ވިދާޅުވިއެވެ.
ފާހަގަކޮށްލެވޭ ގޮތުގައި، ޞާލިޙާއި ނަޝީދަކީ ކުޑައިރުން ފެށިގެން އެކުވެރިންގެ ގޮތުގައި އުޅުއްވައި، އިސްލާހީ މަސައްކަތްތައް ވެސް އެކުގައި ކުރެއްވި ދެ ބޭފުޅުންނެވެ. ޞާލިޙް ވެރިކަމަށް ވަޑައިގަތީ ނަޝީދުގެ ތާއިދާއެކު ކަމަށްވީ ނަމަވެސް، އެ ދައުރުގެ މެދުތެރެއިން ދެ ބޭފުޅުންގެ ގުޅުން ގޯސްވިއެވެ. އެއީ ނަޝީދު ގެންނަން ބޭނުންފުޅުވާ ގޮތަށް، ރާއްޖެއަށް ބަރުލަމާނީ ނިޒާމާ ގެނައުމަށް ޚިޔާލު ހޯދުމުގެ ވޯޓެއް ނެގުމާ ގުޅޭ ގޮތުން ދެ ބޭފުޅުންގެ މެދުގައި ޚިޔާލު ތަފާތުވުން އުފެދުމުންނެވެ.
އެމްޑީޕީން 2023 ވަނަ އަހަރުގެ ރިޔާސީ އިންތިޚާބަށް ބޭއްވި ޕްރައިމަރީން ނަޝީދު ނާކާމިޔާބުވެވަޑައިގަތުމުން ދެ ބޭފުޅުންގެ ގުޅުން އިތުރަށް ގޯސްވިއެވެ. އަދި ނަޝީދު ފާޅުގައި ސަރުކާރަށް ފާޑު ވިދާޅުވެ، ޞާލިޙަށް ވެސް ބޮޑެތި ތުހުމަތުތަކެއް އަމާޒުކުރެއްވިއެވެ. އެއަށްފަހު، އެ މަނިކުފާނަށް ތާއިދު ކުރައްވާ މަޖިލިސް މެންބަރުންނާއެކު އެމްޑީޕީން ވަކިވެވަޑައިގެން އަމިއްލަ ޕާޓީއެއް އުފެއްދެވިއެވެ.
ރިޔާސީ އިންތިޚާބުގައި ނަޝީދުގެ ޕާޓީއާއި ޞާލިޙަށް ވެސް ނާކާމިޔާބީއާ ކުރިމަތިލާން ޖެހުނުއިރު، އެމްޑީޕީއަށް އިންތިޚާބު ގެއްލުނީ ދެ ބޭފުޅުންގެ މެދުގައި އުފެދުނު ދެބަސްވުންތަކާއެކު ޕާޓީ ބައިބައިވުމުން ކަމަށް ގިނަ ބަޔަކު ގަބޫލުކުރެއެވެ.
އެ އިންތިޚާބަށް ފަހު ނަޝީދު ސިޔާސީ ދާއިރާއާ ދުރަށް ވަޑައިގަތުމަށް ފަހު، މިދިޔަ އަހަރުގެ ޖޫން މަހު އަލުން އެމްޑީޕީއާ ގުޅިވަޑައިގަތެވެ. އަދި އެ މަނިކުފާނު ޕާޓީގެ ޗެއާޕާސަންކަން ކާމިޔާބުކުރައްވައި، އަނެއްކާވެސް ނުފޫޒުގަދަ މަގާމެއް ވަނީ ހޯއްދަވައިފައެވެ. ނަޝީދު ވަނީ، އެ މަނިކުފާނު ކުރިއަށް އޮތް ރިޔާސީ ޕްރައިމަރީގައި ތާއިދުކުރައްވާނީ، ޕާޓީގެ ކުރީގެ ޗެއާޕާސަން ފައްޔާޒު އިސްމާއީލަށް ކަމަށް ވިދާޅުވެ، އަމިއްލައަށް ތާއިދުނުކުރައްވާނެކަން ވެސް އިއުލާންކުރައްވައިފައެވެ.