ގޫގުލްގެ މައި ކުންފުނި އަލްފަބެޓުން އެ ކުންފުނީގެ އެންމެ ފަހުގެ އޭއައި ޖެނެރޭޝަން ކަމަށްވާ "ޖެމިނައި 4" އިފްތިތާޙްކޮށް، އޭގެ ތެރެއިން އެންމެ މަތީ ފެންވަރުގެ އާ މޮޑެލް "އާގޮން" އިއުލާންކޮށްފިއެވެ.
މި އާ މޮޑެލްއަކީ ވާދަވެރި އެންތުރޯޕިކް އަދި އޯޕަންއޭއައިގެ ކުރިއެރުންތަކާ ހަމަކުރުމަށް ގޫގުލްއިން ކުރަމުންދާ މަސައްކަތުގެ ދަށުން ނެރުނު މޮޑެލެކެވެ. ގޫގުލްގެ ތަރުޖަމާނަކު ހާމަކުރި ގޮތުގައި "އާގޮން" އަކީ ކުރިން ނެރުނު "ޕްރޯ" މޮޑެލްތަކަށްވުރެ ސައިޒުގެ ގޮތުން ބޮޑު އަދި ނަތީޖާ ނެރުމުގައި މާ ވަރުގަދަ މޮޑެލެކެވެ.
މި މޮޑެލް ފަރުމާކޮށްފައިވަނީ އުނދަގޫ އަދި އެކްސްޓާނަލް ވޯކްލޯޑްތައް ނިންމުމަށް ކަމަށާއި، ކޯޑިން އަދި ސައިބާ ސެކިއުރިޓީގެ ބެންޗްމާކްތަކުން އޯޕަންއޭއައިގެ "އަސްޓްރާ" އަދި އެންތުރޯޕިކްގެ "އޯޕަސް" ފަދަ ކުރިއަރާފައިވާ މޮޑެލްތަކާ އެއްވަރުގެ ނަތީޖާއެއް ދައްކާ ކަމަށް ގޫގުލްއިން ބުނެއެވެ.
ގޫގުލްއިން މިހާރު ދަނީ ސައިބާ ސެކިއުރިޓީގެ ބައެއް ބައިވެރިންނަށް މި މޮޑެލް ބޭނުންކުރުމުގެ ފުރުސަތު ދެމުންނެވެ. އަދި އެމެރިކާގެ ރައީސް ޓްރަމްޕް ސަރުކާރުގެ އިޚްތިޔާރީ އުސޫލުގެ ދަށުން، އާންމުންނަށް ނެރުމުގެ ކުރިން މޮޑެލް އެކްސެސް ކުރުމުގެ މަރުހަލާގައިވެސް ގޫގުލްއިން ބައިވެރިވަމުންދެއެވެ. ނަމަވެސް، މި މޮޑެލް އާންމުންނަށް ލިބޭނެ ވަކި ތާރީޚެއް ގޫގުލްއިން އަދި ހާމައެއް ނުކުރެއެވެ.
އެ ކުންފުނީގެ ނޫސްބަޔާނުގައިވާ ގޮތުން، ބައެއް އިންޑަސްޓްރީ ބެންޗްމާކްތަކުގައި އާގޮންއިން ވަނީ އަސްޓްރާ އަދި އޯޕަސްއަށްވުރެ ރަނގަޅު ނަތީޖާއެއް ހޯދާފައެވެ. ނަމަވެސް ގޫގުލްއިން ހިމެނި ކޯޑިންއާ ގުޅޭ ހަތަރު ބެންޗްމާކްގެ ތެރެއިން ދެ ބެންޗްމާކެއްގައި މިއަށްވުރެ ވާދަވެރި މޮޑެލްތައް އުޅެނީ ކުރީގައެވެ. މީގެއިތުރުން، ސީއީއޯ ސުންދާރު ޕިޗާއި ކުރިން ޖޫން މަހު ނެރޭނެ ކަމަށް ވިދާޅުވި "ޖެމިނައި 3.5 ޕްރޯ" ދެން ނުނެރުމަށް ގޫގުލްއިން ވަނީ ނިންމާފައެވެ.
މި އާ މޮޑެލް ނެރުމުގެ މަސްތަކަކަށް ލަސްވެގެން ދިޔަ މުއްދަތުގެ ތެރޭގައި ގޫގުލްގެ އޭއައި ލެބް "ޑީޕްމައިންޑް" އަށް ބޮޑެތި ބަދަލުތަކެއް ވަނީ އައިސްފައެވެ. އޭގެ ތެރޭގައި އެ ލެބްގެ ފައުންޑާ އަދި ސީއީއޯ ޑެމިސް ހައްސާބިސް މަގާމުން އެކެހެރިވެވަޑައިގަތުމާއި، ޖެމިނައި މޮޑެލްތަކުގެ އިސް ބައެއް ވެރިން ކުންފުނި ދޫކޮށް ދިއުން ހިމެނެއެވެ. މި ލަސްވުންތަކުގެ ސަބަބުން އޭއައިގެ ރޭހުގައި އޯޕަންއޭއައި އަދި އެންތުރޯޕިކްގެ ފަހަތަށް ގޫގުލް ވެއްޓިގެން ދިޔައެވެ.
ޖުލައި މަހު ޕިޗާއި ވަނީ ގޫގުލް ފަހަތަށް ޖެހެމުންދާ ކަމަށް ދެކެވޭ ވާހަކަތައް ދޮގުކުރައްވާފައެވެ. ނަމަވެސް ފަހަކަށް އައިސް ގޫގުލްއިން ދަނީ އެންމެ ކުރިއަރާފައިވާ ގާބިލުކަންތައް އިޝްތިހާރު ކުރުމުގެ ބަދަލުގައި، ވާދަވެރިންގެ މޮޑެލްތަކާ އަޅާބަލާއިރު އެ ކުންފުނީގެ މޮޑެލްތަކުގެ އަގުހެޔޮކަމުގެ ފައިދާއަށް އިސްކަންދީގެން ވާހަކަދައްކަމުންނެވެ.
އޭއައިގެ ދާއިރާގައި ގޫގުލްއަށް ބޮޑެތި ގޮންޖެހުންތަކަކާ ކުރިމަތިލާންޖެހިފައިވާއިރު، އެހެން ކުންފުނިތަކުންވެސް ދަނީ މި ދާއިރާއިން ބޮޑެތި ކުރިއެރުންތަކެއް ހޯދަމުންނެވެ. އެގޮތުން ބްރޯޑްކޮމްއިން އެންތުރޯޕިކްއަށް 42 ބިލިއަން ޑޮލަރާ ހަމައަށް ފައިސާ ދޫކުރުމުގެ އެއްބަސްވުމެއް ހަދާފައިވާއިރު، އެންތުރޯޕިކްއިން ދަނީ އައިޕީއޯއަކަށް (ހިއްސާ އާންމުންނަށް ވިއްކުމަށް) ވެސް ތައްޔާރުވަމުންނެވެ.
މީގެއިތުރުން އެމެރިކާގެ ފެޑެރަލް ޓްރޭޑް ކޮމިޝަން (އެފްޓީސީ) އިން ދަނީ އެންތުރޯޕިކް އަދި އޯޕަންއޭއައި ފަދަ ބޮޑެތި އޭއައި ކުންފުނިތަކުގެ މައްސަލަތަކެއް ބަލައި ތަހުގީގު ކުރަމުންނެވެ.