ލަންޑަން (01 އޮކްޓޯބަރު 2026) : އިނގިރޭސިވިލާތުގައި ކުށްކުރާ މީހުންގެ އާބާދީ ބޮޑުވެ ޖަލުތައް ފުރިބާރުވެ އިތުރަށް ކުށްވެރިން ޖަލަށް ލެވެންނެތް ހާލަތަކަށް ގޮސްފިއެވެ.
އިނގިރޭސިވިލާތުގެ ޖަލުތަކާބެހޭ އިދާރާ (ހިޒްމެޖެސްޓީސް ޕްރިޒަން އެންޑް ބްރޮބޭޝަން ސާވިސް) އިން ބުނިގޮތުގައި އިނގިރޭސި ޖަލުތަކުގައިވާ ބައެއް ކުށްވެރިން (ގައިދީން) އެ މީހުންގެ ޖަލު ހުކުމް މުޅިން ފުރިހަމަ ނުވަނީސް ދޫކޮށްލެވޭނެ މެކޭނިޒަމެއް ނޫނީ ނިޒާމެއް ގާއިމް ކުރުމަށް ސަރުކާރުގެ ކަމާބެހޭ ފަރާތްތަކާ މަޝްވަރާކޮށް ގޮތެއް ނިމުމާހަމައަށް ގޮސްފައިވާ ކަމުގައެވެ.
"ޖަލުތައް ހުރީ 97 އިންސައްތައާއި 98 އިންސައްތައާ ދެމެދުގެ ނިސްބަތަކަށް ފުރިފައި، މިކަން ހައްލުކުރަން އަވަސް ފިޔަވަޅުތަކެއް ނޭޅިއްޖެނަމަ އަންނަ ނޮވެމްބަރު މަހުގެ ތެރޭގައި ޖަލުތައް އެއްކޮށް ފުރޭނެ" ހިޒްމެޖެސްޓީސް ޕްރިޒަން އެންޑް ބްރޮބޭޝަން ސާވިސްއާ ހަވާލާދީ އިނގިރޭސި ނޫސްތައް ބުނެފައިވެއެވެ. ރިޕޯޓްތައް ބުނާގޮތުން ފާއިތުވި 30 އަހަރު، ޖަލުތަކުގައި ބަންދުކޮށްފައިވާ މީހުންގެ އާބާދީ ދެގުނައަށް އިތުރުވެފައިވާއިރު ކުށްކުރާ މީހުންނާ ދެކޮޅަށް އިއްވާ ޖަލު ހުކުމްތަކުގެ މުއްދަތު ވަނީ ވަރަށް ބޮޑަށް އިތުރުވެގެން ގޮސްފައެވެ.
މީހުން މަރާމީހުންނަށް 2000 ވަނަ އަހަރު އާންމުކޮށް އިއްވާފައިވަނީ 13 އަހަރުގެ ޖަލުހުކުމެކެވެ. ނަމަވެސް 2021 އަހަރާ ހަމައަށް އައިއިރު މީހުން މަރާމީހުންނަށް އިއްވާ ޖަލުހުކުމުގެ މުއްދަތުވަނީ 21 އަހަރަށް އިތުރުކޮށްފައެވެ. މީހުން މެރުމަކީ އިނގިރޭސިވިލާތުގައި އާންމުކުށެކެވެ. މިއީ އިނގިރޭސިވިލާތުގައި އެންމެ ގިނައިން ކުރާ ކުށްތަކުގެ ތެރޭގައި ހިމެނޭ ކުށެކެވެ. "ސީރިއަލް ކިލާސް" ނުވަތަ އާންމުކޮށް މީހުން މެރުމުގެ އާދަހިފާފައިވާ ނުރައްކާތެރި ގާތިލުންގެ ނިސްބަތް އިނގިރޭސިވިލާތުގައި ދަނީ ގިނަވަމުންކަން ފުލުހުންގެ ރެކޯޑުތަކުން ސާފުވެއެވެ.
އިނގިރޭސިވިލާތުގައި އިތުރު ޖަލުތައް ބިނާ ކުރުމަށް ފާއިތުވި ވިއްސަކަށް އަހަރު ތެރޭގައި ވެރިކަން ކުރި ސަރުކާރުތަކުން މާބޮޑު ސަމާލުކަމެއް ދީފައިނުވާކަން ޕްރިޒަން އެންޑް ބްރޮބޭޝަން ސާވިސް އިން ފާހަގަކޮށްފައިވެއެވެ. ޖަލުތަކުގެ މަރާމާތަށްވެސް އިނގިރޭސި ސަރުކާރުތަކުން މާބޮޑު ސަމާލުކަމެއް ދީފައިނުވާކަމަށް ވެއެވެ. އަނެއްކޮޅުން ޖަލުތައް ތޮއްޖެހުމަކީވެސް އެޖަލުތައް މަރާމާތު ކުރުމަށާއި އަޕްގްރޭޑް ކުރުމުގެ މަސައްކަތްތަކަށް ހުރަސްއެޅޭކަމެކެވެ.
ހިޒްމެޖެސްޓީސް ޕްރިޒަން އެންޑް ބްރޮބޭޝަން ސާވިސް ބުނާގޮތުން ޖަލުތަކުގެ ތޮއްޖެހުން ކުޑަކުރުމަށްޓަކައި ޖަލުމީހުން އަވަހަށް މިނިވަން ކުރެވޭނެ ނިޒާމެއް ގާއިމް ކުރުމަށް ސަރުކާރުގެ ތަންފީޒީ އިދާރާތަކާ ގުޅިގެން މިހާރު ކުރާ މަސައްކަތް ބިނާކޮށްފައިވަނީ އާދައިގެ ކުށްތަކާއި ނުރައްކާތެރި ނޫން ކުށްތަކުގައި ބަންދުކޮށްފައިވާ މީހުން ޖަލަށް ލުމަށް ކޮށްފައިވާ ހުކުމްތަކުގެ މުއްދަތުގެ ތިންބައިކުޅަ އެއްބައި ފުރިހަމަކުރުމުން މިނިޒާމުގެ ދަށުން ޖަލުން މިނިވަން ކުރުމުގެ މައްޗަށެވެ. ވައްކަމާއި ފޭރުންފަދަ ކުށްތަކުގައި ބަންދުކޮށްފައިވާ މީހުންވެސް ހުކުމުގެ ދެބައިކުޅަ އެއްބައި ފުރިހަމަ ކުރުމުން މިނިޒާމުގެ ދަށުން އެމީހުން މިނިވަން ކުރާނެއެވެ. ނަމަވެސް މީހުން މެރުންފަދަ އަދި މަސްތުވާ ތަކެތީގެ ވިޔަފާރީގެ މައްސަލަފަދަ ކުށްތައް ކޮށްފައިވާ މީހުންގެ ޖަލު ހުކުމް އޭގެ ފުރިހަމަ މުއްދަތަށް ތަންފީޒު ކުރާނެއެވެ. މިނިޒާމުން އެފަދަ ކުށްވެރިން އިސްތިސްނާއެއް ނުވާނެއެވެ.
ކުށްވެރިންގެ ފަރާތުން އަނިޔާ ލިބުނު މީހުންނާއި އެ މީހުންގެ ޢާއިލާތަކުން ދަނީ މިމައްސަލާގައި ކަންބޮޑުވުން ފާޅުކުރަމުންނެވެ.