ކުށް ކޮށްގެން ހޯދާ މުދަލާ ބެހޭ ބިލުގެ މަސައްކަތް އެޖެންޑާކޮށް، ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހު ފަށަން ތާވަލުކޮށްފިއެވެ.
މަޖިލީހުގެ ޖަލްސާއެއް އެންމެ ފަހުން ބާއްވާފައި ވަނީ މިދިޔަ އޮގަސްޓް މަހުގެ 26 ވަނަ ދުވަހުއެވެ. އޭގެ ފަހުން އެއް މަހަށް ވުރެ ގިނަ ދުވަހުގެ ޗުއްޓީއަކަށްފަހު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ ހޯމަ ދުވަހަށް މިވަނީ ތާވަލުކޮށްފައެވެ.
އެޖެންޑާގައިވާ ގޮތުން ކުށް ކޮށްގެން ހޯދާ މުދަލާ ބެހޭ ބިލުގެ އިބްތިދާއީ ބަހުސް ވަނީ ހޯމަ ދުވަހަށް އެޖެންޑާކޮށްފައެވެ.
ފާހަގަކުރެވޭ ގޮތުގައި މި އަހަރުގެ ނިމިދިޔަ ދެވަނަ ދައުރު ދެ ފަހަރަށް ދަންމައިލި ނަމަވެސް މަސައްކަތްތަކުގެ ދެބައިކުޅަ އެއްބައި ވެސް ނުނިންމުނު ކަމަށް މަޖިލީހުގެ އިދާރާއިން އާންމުކުރި ތަފާސްހިސާބުން ވަނީ ދައްކައިފައެވެ.
މަޖިލީހުގެ ނިމިދިޔަ ދައުރުގައި ވަނީ 28 ޖަލްސާއެއް ބާއްވައި، 57 ގަޑިއިރު ހޭދަކޮށްފައެވެ. އަދި ކޮމިޓީތަކުން ޖުމުލަ 138 ބައްދަލުވުމެއް ބޭއްވިއިރު ހޭދަކުރީ 63 ގަޑިއިރު ކަމަށް އެ ތަފާސްހިސާބުގައިވެއެވެ. ހަމައެއާއެކު މި އަހަރުގެ ފުރަތަމަ ދައުރުން 94 މަސައްކަތެއް ވަނީ ދެވަނަ ދައުރަށް ނަގުލުވެފައެވެ. އަދި ދެވަނަ ދައުރުގައި 120 މަސައްކަތް އިތުރަށް ހުުށަހެޅުނެވެ.
ރައްޔިތުންގެ މަޖިލީހުގެ ގަވައިދުގައިވާ ގޮތުން އަހަރުގެ ފަހު ދައުރު ފެށޭނީ މި މަހުގައެވެ. އަދި ފަހު ދައުރު ކުރިއަށް ދާނީ ނޮވެންބަރު މަހުގެ ނިޔަލަށެވެ.
މި ފެށޭ ދައުރުގައި އޮންނާނެ މައިގަނޑު މަސައްކަތަކަށް ވާނީ އަންނަ އަހަރަށް ލަފާކޮށް ސަރުކާރުން ހުށަހަޅާ ބަޖެޓަށް ބަހުސްކޮށް ބަޖެޓު ދިރާސާކުރުމަށްފަހު ފާސްކުރުމުގެ މަސައްކަތެވެ.