ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަޤާމު ފަސް ފަހަރު ހޯދާފައިވާ ކްރިސްޓިއާނޯ ރޮނާލްޑޯ ޕޯޗުގަލްގެ ޤައުމީ ޓީމުގައި މިހާރު އަދާކުރަމުންދާ ދައުރަކީ ޓީމަށް އެހީތެރިވުމުގެ ބަދަލުގައި ކުރިއެރުމަށް އޮތް ހުރަހެކެވެ.
ވޭތުވެދިޔަ ހަތަރު ވަރަކަށް އަހަރު ދުވަހުގެ ތެރޭގައި ޤައުމީ ޓީމުގައި އޭނާގެ ފަރާތުން ފެނުނު ކުޅުމަށް ބަލާއިރު، އިސް ކުޅުންތެރިއެއްގެ ގޮތުގައި މެޗުތައް ފެށުމުގެ ފުރުސަތު އޭނާއަށް ނުލިބި ގޮސްފައިވާކަން މިހާރު ވަނީ ސާފުވެފައެވެ. އެހެންކަމުން، ލިއޮނެލް މެސީ ފަދައިން ބައިނަލްއަޤްވާމީ ފުޓްބޯޅައަށް އަލްވަދާއު ކިއުމުގެ ވަގުތު ރޮނާލްޑޯއަށް މިވަނީ ޖެހިފައެވެ.
ކުރިއަށް އޮތް 2026 ވަނަ އަހަރުގެ ވޯލްޑް ކަޕަށްފަހު ރިޓަޔާކުރުމާމެދު ވިސްނިންތޯ ވޭލްސްއާ ދެކޮޅަށް ކުޅެން އޮތް ނޭޝަންސް ލީގު މެޗުގެ ކުރިން ސުވާލުކުރުމުން ރޮނާލްޑޯ ބުނީ، އޭނާއަކީ އަބަދުވެސް މުސްތަޤުބަލާމެދު ވިސްނާ ކުޅުންތެރިއެއް ކަމަށާއި، ޤައުމީ ޓީމަށް އަދިވެސް އެހީތެރިވެވޭނެ ކަމުގެ އިތުބާރު އެބައޮތް ކަމަށެވެ.
ޕޯޗުގަލްގެ ޖާޒީގައި ކްރިސްޓިއާނޯ ރޮނާލްޑޯ-- މީގެއިތުރުން ހަމައެކަނި ލަނޑު ޖެހުމުގެ އިތުރުން ދަނޑުން ބޭރުން ވެސް ޒުވާން ޓީމަށް އެހީތެރިވެވޭނެ ކަމަށާއި، ނަމަވެސް އެންމެ މުހިންމު ކަމަކީ ދަނޑުމަތީގައި ލަނޑުޖަހައި ޓީމު މޮޅުކޮށްދިނުން ކަމަށް އޭނާ ފާހަގަކުރިއެވެ. ނަމަވެސް ވޭތުވެދިޔަ ބޮޑު ތިން މުބާރާތުގައިވެސް ރޮނާލްޑޯއަށް މި ބުނި ކަންކަން ސާބިތުކޮށްދެވިފައެއް ނުވެއެވެ.
ގަތަރުގައި 2022 ވަނަ އަހަރު ބޭއްވި ވޯލްޑް ކަޕްގައި ކުޅުނު ފަސް މެޗުން ރޮނާލްޑޯއަށް ޖެހުނީ އެންމެ ލަނޑެކެވެ. އަދި ޔޫރޯ 2024 ގެ ފަސް މެޗުގައި އޭނާއަށް އެއްވެސް ލަނޑެއް ނުޖެހުނެވެ. އުތުރު އެމެރިކާގައި ބޭއްވި 2026 ވަނަ އަހަރުގެ ވޯލްޑް ކަޕްގައި އޭނާ ތިން ލަނޑު ޖެހި ނަމަވެސް، އޭގެ ތެރެއިން ދެ ލަނޑަކީ އުޒްބެކިސްތާން ކޮޅަށް ޖެހި ލަނޑުތަކެކެވެ. އަދި އަނެއް ލަނޑަކީ ކްރޮއޭޝިއާ މެޗުގައި ލިބުނު ޕެނަލްޓީއެކެވެ. މޮރޮކޯ، ފްރާންސް އަދި ސްޕެއިން ފަދަ ވަރުގަދަ ޓީމުތަކާ ދެކޮޅަށް ކުޅުނު މުހިންމު މެޗުތަކުގައި ރޮނާލްޑޯގެ ފަރާތުން ފެނުނީ ވަރަށް ދަށް ކުޅުމެކެވެ.
ޕޯޗުގަލްގެ ޖާޒީގައި ކްރިސްޓިއާނޯ ރޮނާލްޑޯ-- އުމުރުން 41 އަހަރުގެ ރޮނާލްޑޯ ގައުމީ ޓީމަށް ޖަހައިދީފައިވާ 146 ލަނޑުގެ ރެކޯޑަކީ އާދަޔާޚިލާފު ރެކޯޑެއް ނަމަވެސް، އޭނާގެ ކުޅުން ދަށަށް ގޮސްފައިވާކަން ގަބޫލުކުރަންޖެހެއެވެ. ޕޯޗުގަލްގެ އާ ކޯޗު ހެސޫސް ވަނީ ރޮނާލްޑޯއަކީ ޤައުމީ ޓީމުގެ ރަމްޒެއް ކަމަށް ބުނެފައެވެ ނަމަވެސް ކޮންމެ މެޗެއްގެ ކޮންމެ މިނެޓެއްގައި ކުޅުމުގެ ފުރުސަތު އޭނާއަށް ކަށަވަރުވެފައި ނޯންނާނެ ކަމަށާއި، އެއީ ކޯޗުގެ ނިންމުމެއް ކަމަށް ހާމަކޮށްފައެވެ. މިއީ މީގެ ކުރިން ކޯޗުން ރޮނާލްޑޯއާ މެދު ކަންތައް ކުރިގޮތާ ޚިލާފަށް ނެގުނު ޖެހިލުންކުޑަ ފިޔަވަޅެކެވެ.
ރޮނާލްޑޯވެސް ވަނީ ޓީމަށް ފައިދާއެއް ނުކުރާކަން އިހުސާސްކުރެވޭ ދުވަހަކުން ނުވަތަ ކޯޗުން އޭނާ ބޭނުންނުވާ ދުވަހަކުން ގައުމީ ޓީމު ދޫކޮށްލަން ތައްޔާރަށް ހުރި ކަމަށް ބުނެފައެވެ. އަދި އޭނާއަކީ ޒުވާން ކުޅުންތެރިންނަށް ނަމޫނާއެއް ކަމަށާއި، މެޗެއްގައި ނުކުޅެ ބެންޗުގައި އިންނަން ޖެހުނަސް މައްސަލައެއް ނެތް ކަމަށް އޭނާ ބުނެފައިވެއެވެ.