އަމިއްލަ ބާރު ނުފޯރާ ސަބަބެއް ނުވަތަ ގުދުރަތީ ސަބަބެއް މެދުވެރިވެގެން ނޫން ގޮތަކަށް ހައިވޭގައި މަޑުކުރުމާއި ޕާކްކުރުން މަނާކޮށް، އެފަދަ އަމަލުތައް ކުރާ ފަރާތްތައް ޖޫރިމަނާކުރެވޭ ގޮތަށް އެއްގަމު ދަތުރުފަތުރުގެ ގާނޫނަށް ގެނައި ބަދަލުތަކަށް މިއަދު އަމަލުކުރަން ފަށައިފިއެވެ.
ފުލުހުންނަށް ބޮޑެތި ބާރުތަކަކާއި ޒިންމާތަކެއް މަތިކޮށް އަމަލުކުރަން ފެށި މި ގާނޫނުގެ ދަށުން، ގަވާއިދާ ހިލާފުވާ ޑްރައިވަރުން ޖޫރިމަނާކުރުމާއި، ލައިސަންސުން ޕޮއިންޓު ކެނޑުމާއި، އުޅަނދުތައް ނެގުމާއި ޓޯކުރުމުގެ ބާރު ފުލުހުންނަށް ލިބިގެންވެއެވެ.
މިއަދު އަމަލުކުރަން ފެށި އައު ގާނޫނުގައިވާ ގޮތުން، ގުދުރަތީ ސަބަބަކާ ނުލައި ހައިވޭގައި މަޑުކޮށް ނުވަތަ ޕާކުކޮށްފިނަމަ ފުރަތަމަ ފަހަރު 1,000 ރުފިޔާއިން ޖޫރިމަނާކުރެވޭނެއެވެ. ދެވަނަ ފަހަރު 2,000 ރުފިޔާއިން ޖޫރިމަނާކުރާއިރު، ތިންވަނަ ފަހަރު 4,000 ރުފިޔާއިން ޖޫރިމަނާކޮށް ޑީމެރިޓް ޕޮއިންޓް ރެކޯޑުކުރެވޭނެއެވެ.
މީގެއިތުރުން އެއަށްވުރެ އިތުރުވާ ކޮންމެ ފަހަރަކު އެންމެ ފަހުން ކުރި ޖޫރިމަނާގެ ދެގުނަ އަދަދަކުން ޖޫރިމަނާކުރުމުގެ އިތުރުން، އެ އުޅަނދެއް 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެންގޮސް ޓޯކުރަން ޖެހެއެވެ.
ޓްރެފިކް ޖޫރިމަނާގެ އަދަދު 5,000 ރުފިޔާއަށްވުރެ އިތުރުވާނަމަ އުޅަނދު ނުދުއްވޭ ގޮތަށް ފުރޮޅުގައި ތަޅުއަޅުވައިގެން ބޫޓުކުރުމުގެ ބާރު ފުލުހުންނަށް މި ގާނޫނުގެ ދަށުން ލިބިގެންވެއެވެ. އަދި ގާނޫނު ބުނާގޮތުން ބޫޓުކުރާ އުޅަނދުތަކުގެ ޖޫރިމަނާ ފައިސާ 72 ގަޑިއިރުގެ ތެރޭގައި ނުދައްކައިފިނަމަ އެ އުޅަނދެއް ފުލުހުންގެ ބެލުމުގެ ދަށަށް ގެންދެވޭނެއެވެ.
ފުލުހުން މިއަދު އަމަލުކުރަންފެށި އައު ގާނޫނުގެ ދަށުން އަޅާނެ ފިޔަވަޅުތައް..... ގާނޫނާ އެއްގޮތަށް ޓޯކުރާ އުޅަނދުތަކާ 30 ދުވަހުގެ ތެރޭގައި ވެރިފަރާތުން ހަވާލުނުވެއްޖެނަމަ، އެ އުޅަނދެއް ނީލަންކިޔުމުގެ އިހުތިޔާރު ފުލުހުންނަށް ލިބިދެއެވެ. ނަމަވެސް ނުބައިކޮށް ޓޯކުރެވިފައިވާ އުޅަނދެއްނަމަ 24 ގަޑިއިރުގެ ތެރޭގައި ވެރިފަރާތާ ހަވާލުކުރަން ޖެހޭނެކަމަށް މި ގާނޫނުގައި ބުނެއެވެ.
މި ގާނޫނު ބުނާގޮތުން ނުދައްކާ ހުރި ފީ އާއި ޖޫރިމަނާ ފައިސާގެ އަދަދު 5,000 ރުފިޔާ ނުވަތަ އެއަށްވުރެ ބޮޑުވެއްޖެނަމަ، ޓްރެފިކް ފުލުހުން ކަނޑައަޅައިގެން ނުވަތަ ކޯޓު އަމުރެއްގެ ދަށުން ލައިސަންސް ހިފެހެއްޓޭނެއެވެ. ވަގުތީ ގޮތުން ލައިސަންސް ހިފަހައްޓާ ހާލަތްތަކުގައި 48 ގަޑިއިރަށް ދުއްވުމުގެ ވަގުތީ ހުއްދައެއް ދޫކުރެވޭނެއެވެ.
މީގެ އިތުރުން ލައިސަންސް ނެތި ދުއްވައިފިނަމަ ފުރަތަމަ ފަހަރު 1,000 ރުފިޔާ، ދެވަނަ ފަހަރު 1,500 ރުފިޔާ، އަދި ތިންވަނަ ފަހަރު 2,000 ރުފިޔާއިން ޖޫރިމަނާކުރުމާ އެކު އުޅަނދުގެ ވެރިމީހާ 2,000 ރުފިޔާއިން ޖޫރިމަނާކޮށް އުޅަނދު 30 ދުވަހަށް ހިފެހެއްޓޭނެއެވެ.
ފުލުހުން މިއަދު އަމަލުކުރަންފެށި އައު ގާނޫނުގެ ދަށުން އަޅާނެ ފިޔަވަޅުތައް..... މީގެ އިތުރުން ލައިސަންސް ނެތް މީހަކަށް ނުވަތަ ކުޑަކުއްޖަކަށް އުޅަނދުގެ ކޮންޓްރޯލް ދީފިނަމަ 25,000 އާއި 50,000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.
މީގެ އިތުރުން ފަރުވާކުޑަކޮށް ނުވަތަ ނުރައްކާކޮށް ދުއްވައިގެން މީހަކަށް އަނިޔާއެއް ވެއްޖެނަމަ 100,000 އާއި 500,000 ރުފިޔާއާ ދެމެދުގެ ބޮޑެތި އަދަދުތަކުން ޖޫރިމަނާކުރަން ވެސް އާ ގާނޫނުގައި ވަނީ ކަނޑައަޅާފައެވެ.
މިފަދަ ހަރުކަށި ގާނޫނުތަކެއް ކަނޑައަޅައި އެ ގާނޫނުތަކަށް މިއަދި އަމަލުކުރަން ފަށާފައިވާއިރު، ބްރިޖާއި ހައިވޭއަކީ ރާއްޖޭގައި އެންމެ ބާރަށް އުޅަނދު ދުއްވާ އަދި އެކްސިޑެންޓުތައް ހިނގުމުގެ ފުރުޞަތު ބޮޑު ސަރަހައްދެވެ.
މި ސަރަހައްދުގައި އެންމެ އާންމުކޮށް ފާހަގަކުރެވޭ ގަވާއިދާ ޚިލާފު ކަންކަމުގެ ތެރޭގައި ކަނޑައެޅިފައިވާ 60 ކިލޯމީޓަރުގެ ސްޕީޑަށްވުރެ ބާރަށް ދުއްވުމާއި، ނުރައްކާތެރި ގޮތަކަށް ވާތްފަރާތުން އޯވަޓޭކް ކުރުމާއި ލޭން ބަދަލުކުރުން ހިމެނެއެވެ.
މީގެއިތުރުން ހެލްމެޓް ނޭޅުން ނުވަތަ ސްޓްރެޕް ނާޅުވައި ބޭއްވުމާއި، ސައިކަލު ދުއްވާ ލޭން ދޫކޮށް ކާރު ޓްރެކަށް ވަނުމާއި، ދުއްވަމުން ފޯނު ބޭނުންކުރުމުގެ އިތުރުން މަސްތުގެ ހާލަތުގައި ނުވަތަ މާބޮޑަށް ވަރުބަލިވެފައި ހުރެ ދުއްވުމަކީވެސް ފާހަގަކުރެވޭ މައްސަލަތަކެވެ.
މިފަދަ ނުރައްކާތެރި އަމަލުތައް ހުއްޓުވުމަށް އެޅިދާނެ މުހިންމު ފިޔަވަޅުތަކުގެ ތެރޭގައި، ސްޕީޑް ކެމެރާ މެދުވެރިކޮށް އޮޓޮމެޓިކުން ޖޫރިމަނާކުރުމާއި، ހައިވޭގައި ޓްރެފިކް ފުލުހުންގެ ހަރަކާތްތެރިކަން އިތުރުކުރުމާއި، ގަވާއިދާ ޚިލާފުވާ މީހުންގެ ލައިސަންސް ސަސްޕެންޑްކޮށް އުޅަނދު ހިފެހެއްޓުމުގެ އިތުރުން، ލޭން ވަކިކުރާ ރޭލިންގތަކާއި އިޝާރާތްތައް އިތުރަށް ސާފުކޮށް ބެހެއްޓުން ހިމެނެއެވެ.