ސަރުކާރު ހިއްސާވާ ތިން ކުންފުންޏެއް ގުޅިގެން އުފައްދާފައިވާ މޯލްޑިވްސް ޕޯޓް ޑިވެލޮޕްމަންޓް ޕްރައިވެޓް ލިމިޓެޑް އުފެއްދުމާއި، އެ ކުންފުނީގެ މިލްކުވެރިކަމާއި، ފައިނޭންސް ކުރުމާއި އަދި ހިންގުމާ ގުޅޭ ކަންކަން ދިރާސާކުރުމަށް ރައްޔިތުންގެ މަޖިލީހުގެ ސަރުކާރު ހިއްސާވާ ކުންފުނިތަކުގެ ކޮމިޓީ (އެސްއޯއީ ކޮމިޓީ) އަށް ފޮނުވައިދިނުމަށް އެދި، ރައްޔިތުންގެ މަޖިލީހުގެ މާވަށު ދާއިރާގެ މެންބަރު އަޙްމަދު ޝާކިރު، މަޖިލީހަށް ސިޓީއެއް ހުށަހަޅައިފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ ރަސްމީ ވެބްސައިޓުގެ ބިޒްނަސް ރެޖިސްޓްރީން މިހާރު ލިބެން ހުރި މައުލޫމާތަށް ބަލާއިރު މި ކުންފުނި އުފައްދާފައިވަނީ ސަރުކާރު ހިއްސާވާ ތިން ކުންފުނި ކަމަށްވާ މޯލްޑިވްސް ޕޯޓްސް ލިމިޓެޑް (އެމްޕީއެލް)، ސްޓޭޓް ޓްރޭޑިން އޯގަނައިޒޭޝަން ޕީއެލްސީ (އެސްޓީއޯ) އަދި ހައުސިން ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ) އެކުވެގެން ކަމަށް ޝާކިރުގެ ސިޓީގައި ވިދާޅުވެފައިވެއެވެ.
މިކަން ފާހަގަކުރައްވާ، މިފަދައިން ކުންފުންޏެއް އުފެއްދުމަކީ ދައުލަތުގެ މާލިއްޔަތާއި، ކުންފުނިތައް ހިންގުމުގެ އުސޫލުތަކާއި، މަޖިލީހުގެ މުގާބަލުގައި ޒިންމާދާރުވުމާއި، ދެފުށް ފެންނަ ގޮތަށް ކަންކަން ކުރުމާ ގުޅޭ މުހިންމު ސުވާލުތަކެއް އުފެދޭ ކަމެއް ކަމަށް އެ ސިޓީގައި ވިދާޅުވިއެވެ. އަދި ކުންފުނިތަކާ ބެހޭ ގާނޫނުގެ ދަށުން މިފަދަ ކުންފުންޏެއް އުފެއްދުމުގެ ގާނޫނީ ހުއްދަ އޮތް ނަމަވެސް، މި ކަންކަމަކީ ރައްޔިތުންގެ މަޖިލީހުން ބަލަންޖެހޭ ކަންކަން ކަމަށް ވެސް ޝާކިރުގެ ސިޓީގައި ފާހަގަކުރެއްވިއެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީން ޖުމްލަ 11 ކަމެއް ތަހުގީގު ކޮށްދިނުމަށް އެމްޕީ ޝާކިރު އެދިލައްވާފައިވެއެވެ. އެއީ:
- އެމްޕީއެލް، އެސްޓީއޯ އަދި އެޗްޑީސީން މޯލްޑިވްސް ޕޯޓް ޑިވެލޮޕްމަންޓް ޕްރައިވެޓް ލިމިޓެޑް އުފައްދައި އިންވެސްޓްކުރުމުގައި އަމަލުކޮށްފައިވާ ގާނޫނީ އިޖުރާއަތްތަކާއި ކުންފުނިތަކުގެ ބޯޑުން ދީފައިވާ ހުއްދަތައް
- ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އާއި، މިނިސްޓްރީ އޮފް ފައިނޭންސް ނުވަތަ ހުއްދަ ހޯދަންޖެހޭ އެހެން އިދާރާއަކުން ހުއްދަ ހޯދާފައިވޭތޯ؛
- މި ކުންފުނި އުފެއްދުމާއި އިންވެސްޓްކުރުމަކީ ހިއްސާދާރު ތިން ކުންފުނީގެ ފާސްކޮށްފައިވާ ކޯޕަރޭޓް ޕްލޭންތަކުގައި ހިމެނޭ ކަމެއްތޯ؛
- ކޮންމެ ހިއްސާދާރު ކުންފުންޏަކުން ދީފައިވާ ނުވަތަ ދޭން އެއްބަސްވެފައިވާ ރައުސްމާލާއި، މުދަލާއި، ގެރެންޓީއާއި، ލޯނާއި، މުވައްޒަފުން އަދި އެހެނިހެން ވަސީލަތްތަކުގެ ތަފުސީލު؛
- މި ކުންފުނި އުފެއްދުމަށް ބޯޑުތަކުން ނިންމިއިރު ބަލާފައިވާ ވިޔަފާރީގެ މަންފާއާއި ފީޒިބިލިޓީ ސްޓަޑީޒްތައް؛
- މި ކުންފުނި އުފެއްދުމުގައި ކުންފުނިތަކާ ބެހޭ ގާނޫނާއި، ޕީސީބީގެ އުސޫލުތަކާއި، މާލިއްޔަތު ގަވާއިދުތަކާއި، ސަރުކާރު ހިއްސާވާ ކުންފުނިތަކުން އަމަލުކުރަންޖެހޭ ކޯޕަރޭޓް ގަވަނަންސް އުސޫލުތަކާ އެއްގޮތަށް އަމަލުކޮށްފައިވޭތޯ؛
- މެނޭޖިން ޑިރެކްޓަރާއި ބޯޑު މެންބަރުން އައްޔަންކުރި ގޮތާއި، އެކަމުގައި މަސްލަހަތު ފުށުއަރާ އެއްވެސް ކަމެއް އޮތްތޯ؛
- މި ކުންފުނިން މުދަލާއި ޚިދުމަތް ހޯދުމުގައި (ޕްރޮކިއުމަންޓް) އަމަލުކުރާ އުސޫލުތަކަކީ ސަރުކާރު ހިއްސާވާ ކުންފުނިތަކެކޭ އެއްފަދަ ރައްކާތެރި އުސޫލުތަކެއްތޯ؛
- މި ކުންފުންޏަކީ ޕީސީބީ އާއި އޮޑިޓަރ ޖެނެރަލްގެ ބެލުމުގެ ދާއިރާގެ ތެރޭގައި ހިމެނޭ ކުންފުންޏެއްތޯ؛
- މިފަދަ އޮނިގަނޑެއްގެ ދަށުން ކުންފުނި އުފެއްދުމުގެ ސަބަބުން، ދައުލަތުގެ މުދަލާއި، ހޭދައާއި، ދަރަންޏާއި ޕްރޮކިއުމަންޓް ކަންކަން، ސަރުކާރު ކުންފުނިތަކުން ޖަވާބުދާރީވާންޖެހޭ އާންމު ނިޒާމުން ބޭރުވެފައިވޭތޯ؛ އަދި
- މިހާރު ހުރި ތިން ކުންފުންޏެއް ގުޅިގެން އިތުރު ކުންފުންޏެއް އުފެއްދުމަކީ، ކުންފުނިތައް މަދުކޮށް، ހިންގުން ހަރުދަނާކުރުމަށް ސަރުކާރުން ގެންގުޅޭ ސިޔާސަތާ ފުށުއަރާ ކަމެއްތޯ.
މެންބަރުގެ ސިޓީގައި އިތުރަށް ވިދާޅުވީ، މޯލްޑިވްސް ޕޯޓް ޑިވެލޮޕްމަންޓް ޕްރައިވެޓް ލިމިޓެޑްގެ ހިއްސާ އޮންނަނީ ސަރުކާރު ހިއްސާވާ ތިން ކުންފުންޏެއްކަމުން އެ ކުންފުނިތަކުގެ ރައުސުލްމާލު ބޭނުންކޮށްގެން އަލަށް ޕްރައިވެޓް ކުންފުންޏެއް އުފެއްދުމަކީ ދައުލަތުގެ މިލްކު މުދަލެއްގެ ތަބީއަތް ބަދަލުކުރުމަށް މަސައްކަތްކުރުން ކަމަށެވެ.
މި ސިޓީގައި އެމްޕީ ޝާކިރު ވަނީ ދައުލަތުގެ ވަސީލަތްތައް ބޭނުންކުރުމާއި ބެލެހެއްޓުމުގައި ޒިންމާދާރުކުރުވުމަކީ ގާނޫނުއަސާސީން ރައްޔިތުންގެ މަޖިލީހަށް މަތިކޮށްފައިވާ މުހިންމު މަސްއޫލިއްޔަތެއް ކަމާއި އެސްއޯއީ ކޮމިޓީން މީގެ ކުރިން ވެސް ވަނީ ސަރުކާރު ކުންފުނިތަކުގެ ހިންގުމާއި މާލީ ކަންކަމާއި ޕްރޮކިއުމަންޓާ ގުޅޭ މައްސަލަތައް ބަލާފައިވާކަން ފާހަގަކުރައްވާފައެވެ.
ހަމައެއާއެކު ދައުލަތުގެ ފައިސާ ހޭދަކުރުމާ ގުޅޭ ކަންކަމަކީ މާލިއްޔަތު ކޮމިޓީގެ ދައުރެއް އޮންނަ ކަމަކަށް ވާތީ ދައުލަތުގެ ފައިސާ ހޭދަކުރުމާ ގުޅޭ ބައިތައް މާލިއްޔަތު ކޮމިޓީން ބެލުމަށް ފޮނުއްވައިދެއްވުމަށް ވެސް މެންބަރުގެ ސިޓީގައި އެދިލައްވާފައިވެއެވެ. އަދި ކުންފުނި އުފެއްދި ލިޔެކިޔުންތަކާއި ހިންގާ ގަވާއިދާއި ހިއްސާދާރުންގެ އެއްބަސްވުންތަކާއި ބޯޑު ގަރާރުތަކާއި ޕީސީބީ އާއި ފިނޭންސް މިނިސްޓްރީގެ ހުއްދަތަކާއި ކޯޕަރޭޓް ޕްލޭންތަކާއި، ފީޒިބިލިޓީ ސްޓަޑީޒްއާއި ފައިނޭންސް ކުރި ގޮތުގެ ތަފްސީލުތައް، މި ދިރާސާގެ ބޭނުމަށް ހޯދުމަށް އެމްޕީގެ ސިޓީގައި އެދިލައްވާފައިވެއެވެ.
މި ތަހުގީގުން އެއްވެސް ގާނޫނަކާ ނުވަތަ މާލިއްޔަތު ގަވާއިދަކާ ނުވަތަ ކޯޕަރޭޓް ގަވަނަންސް އުސޫލަކާ ޚިލާފު ކަމެއް ފާހަގަކުރެވިއްޖެނަމަ، މަޖިލީހަށް ލިބިގެންވާ ބާރުގެ ދަށުން ފިޔަވަޅު އެޅުމަށާއި، އޮޑިޓާ ޖެނެރަލާއި އެންޓި-ކޮރަޕްޝަން ކޮމިޝަން ފަދަ އިދާރާތަކަށް ފޮނުވަންޖެހޭ ކަންކަން ފޮނުވައިދިނުމަށް ވެސް އެމްޕީގެ ސިޓީގައި އެދިލައްވާފައިވެއެވެ.