ދާދި މިދާކަށް ދުވަހު އަޅުގަނޑަށް ވަރަށް އުފާވެރި ޚަބަރެއް ކަމަށް ހީވާ ފަދަ އީމެއިލެއް ލިބުނެވެ. އެ އީމެއިލްގައި އޮތީ އަޅުގަނޑުގެ މަގާމުގެ ހައިސިއްޔަތުން ކުރާ މަސައްކަތުގެ އަގު ވަޒަންކޮށް، ދުނިޔޭގެ ފެންވަރުގައި ނެރޭ މަޝްހޫރު މަޖައްލާއެއްގައި އަޅުގަނޑުގެ ވަނަވަރު ޖެހުމަށް އެ މަޖައްލާއިން ނިންމި ވާހަކައެވެ. އަދި އަޅުގަނޑާ ބެހޭ ވަނަވަރު ލިޔުމަށް ފަހު ފޮނުވާނެ ވާހަކަ ވެސް އޮތެވެ. ފުރަތަމަ ކިޔައިލުމުން ކޮންމެ މީހަކަށް ވެސް އުފާވެރިކަން ލިބޭ ފަދައިން އަޅުގަނޑަށް ވެސް އުފާވެރިކަމުގެ އިހުސާސްކުރެވުނެވެ. ނަމަވެސް، މިއީ އާންމުކޮށް އަންނަ ސްކޭމް އީމެއިލްތަކެއް ކަން އެނގޭތީ އަޅާނުލައި ޖަވާބެއް ވެސް ނުދީ ހުއްޓައި، މިއަދު އަނެއްކާވެސް އިތުރު އީމެއިލެއް ލިބިއްޖެއެވެ. މި ފަހަރު އޭގައި އޮތީ އަޅުގަނޑުގެ ވަނަވަރު ލިޔެ މަޖައްލާގައި ޖެހުމަށް ނިންމި ވާހަކަ އާއި މިކަމަށް އަޅުގަނޑުގެ ރުހުން ބޭނުންވާ ކަމަށެވެ. އަދި އެންމެ މުހިންމު ކަމެއްގެ ގޮތުގައި، މަޖައްލާ ހިންގުމާއި ޗާޕުކުރުމުގެ އިންތިޒާމީ މަސައްކަތްތަކަށް ކޮންމެވެސް މިންވަރެއްގެ ފައިސާއެއް ދައްކަން ޖެހިދާނެ ކަމަށް ވެސް ލިޔެފައި އޮތެވެ.
އަޅުގަނޑު އެކަން އެގޮތަށް ކުރަން ބޭނުން ނުވާ ކަމުގައި ވަގުތުން ޖަވާބު ދިނީމެވެ. ފައިސާ ދީގެން އަގުވަޒަންކޮށް ތައުރީފުކުރުވަން ބޭނުން ނޫން ކަމަށް ސާފުކޮށް ބުނީމެވެ. ދެން އީމެއިލް ފޮނުވި ކުންފުނީގެ ވަނަވަރު އިންޓަނެޓްގެ ރިވިއުސްތަކުން ބަލައިލިއިރު ކަމަކު ދާކަށް ނެތެވެ. މިއީ ހަމަ ކުރީން ދެންނެވި މޭރުމުން އެކި ގައުމުތަކުގެ މީހުން އަތުން ފައިސާ ނަގައިގެން ސްކޭމް ހިންގާ ކުންފުންޏެއް ކަން އެނގިއްޖެއެވެ. އަދި ދަންނަވަންތޯއެވެ؟ މިއީ އަޅުގަނޑަށް މިފަދަ ކަމަކާ ކުރިމަތިވި ފުރަތަމަ ފަހަރެއް ނޫނެވެ. މީގެ ކުރިން ޕީއެޗްޑީ އާއި މާސްޓަރސް ސެޓްފިކެޓް ހަވާލުކުރަން ވެސް ހުށަހެޅިއެވެ.
ހިތާމައަކީ، އަޅުގަނޑުމެންގެ ތެރެއިން ގިނަ ބަޔަކު މިފަދަ މަޅިތަކުހައި ޖެހޭތީއެވެ. އެ ފަދަ ކަންކަމަށް ބޮޑު ޚަރަދުކޮށް، އެއިން މާ ބޮޑު ފައިދާއަކާއި ރީތި ނަން ނުލިބި ފައިސާ ބޭކާރު ކުރަމުންދާތީއެވެ. މިއީ ދިވެހިންގެ މެދުގައި މިހާރަކަށް އައިސް ފެތުރެމުންދާ، އަދި އެކަމަށް އަވަސް ހައްލެއް ބޭނުންވެފައިވާ ނުރައްކާތެރި މައްސަލައެކެވެ.
މިފަދަ ސްކޭމްތަކަކީ ހަމައެކަނި ރާއްޖެއަށް އަމާޒުކޮށްގެން ހިންގާ އާދައިގެ ކަންކަމެއް ނޫނެވެ. މިއީ މުޅި ދުނިޔޭގައި، ޚާއްސަކޮށް ދެކުނު އޭޝިއާ ސަރަހައްދުގައި ފުޅާ ދާއިރާއެއްގައި ހިންގާ ބޮޑު ވިޔަފާރީގެ ސިނާއަތެކެވެ. ދި އިކޮނޮމިސްޓް މަޖައްލާއިން އާންމުކޮށްފައިވާ ތަފާސްހިސާބުތަކަށް ބަލާއިރު، އެމެރިކާގައި އެކަނިވެސް އަހަރެއްގެ މައްޗަށް 40،000 އާއި 45،000 އާ ދެމެދުގެ އަދަދަކަށް ސައްހަ ޕީއެޗްޑީ ދޫކުރާއިރު، ފައިސާ ދީގެން ގަންނަ 50،000 ފޭކު ޕީއެޗްޑީ ދޫކުރެއެވެ. މީގެ މާނައަކީ، އަލަށް ޕީއެޗްޑީ ހާސިލުކުރާ މީހުންގެ ތެރެއިން ދެބައިކުޅަ އެއްބަޔަށް ވުރެ ގިނަ މީހުންނަކީ ފޭކު ސެޓްފިކެޓް ގެންގުޅޭ މީހުންނެވެ. އަވަށްޓެރި އިންޑިއާ އާއި ސްރީލަންކާ ފަދަ ގައުމުތަކުގައި ވެސް މިފަދަ މައްސަލަތައް ވަރަށް ގިނައެވެ. އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ބައެއް ކޮންސަލްޓެންސީތަކުން 20،000 ރުޕީސް އިން ފެށިގެން ހަތަރު ލައްކަ ރުޕީސްއާ ދެމެދުގެ އަގުތަކަށް ފޭކު ޑިގްރީތަކާއި ޕީއެޗްޑީތައް ވިއްކައެވެ. ހަމައެހެންމެ، މި އަހަރުގެ ކުރީކޮޅު، ސްރީލަންކާގެ ޔުނިވާސިޓީ އޮފް ކޮލަމްބޯގެ ނަމާއި ލޯގޯ ބޭނުންކޮށްގެން އިންޑިއާގެ ބަޔަކު ފޭކު ޕީއެޗްޑީ ވިއްކި ބޮޑު މައްސަލައެއް ފަޅާއަރާފައިވެއެވެ.
މި ސަރަހައްދުގެ ގައުމުތަކުގައި ތިބި، ދިވެހިންގެ ވައްޓަފާޅި އެނގޭ ސްކޭމަރުން، ސީދާ ދިވެހިންނަށް އަމާޒުކޮށް މިފަދަ ކަންކަން އެބަ ހިންގައެވެ. ބޮޑެތި އިބާރާތްތަކުން ނަން ދީފައިވާ އެވޯޑުތަކާއި ޝަރަފުތައް ހަވާލުކުރުމަށް، ބޮޑެތި ހަފުލާތައް ބާއްވައި ހަދައެވެ. އަވަށްޓެރި ގައުމެއްގެ މިފަދަ ކުންފުންޏެއް ރާއްޖެ އައިސް އުޅުމުގެ ތެރޭގައި އަޅުގަނޑާ ވެސް ބައްދަލުވިއެވެ. އެ މީހުން ފުރަތަމަ ބެލީ ރާއްޖޭގައި ބައެއް ކަންކަން އިންތިޒާމްކޮށް އިތުބާރު ހޯދުމަށެވެ. ރިސޯޓް ވިޔަފާރިތަކާއި ފައިސާ ގެންގުޅޭ މީހުންނަށް އަމާޒުކޮށް ގިނަ ކަންތައްތަކެއް ކުރުމަށެވެ. ނަމަވެސް ކޮންމެވެސް ސަބަބަކާ ހުރެ އެ ފުރުސަތު ތަނަވަސް ނުވުމުން، ދެން އެ މީހުން ދިޔައީ ރާއްޖެއާ ގާތުގައި އޮތް އެހެން ގައުމަކަށެވެ. އެ ގައުމަށް ގޮސް، އެތަނުގެ ސިޔާސީ ބައެއް އިސް ފަރާތްތަކާ ގުޅިގެން މިފަދަ ހަފުލާތައް ބާއްވާތާ މިހާރު ދެތިން އަހަރު ވެއްޖެއެވެ. މިއިން ކޮންމެ ހަފުލާއެއްގައި ވެސް ރާއްޖޭގެ ކޮންމެވެސް ބަޔަކަށް ޝަރަފުވެރިކަމުގެ އެވޯޑާއި ސެޓްފިކެޓް ދެއެވެ. ވަރަށް ހެއްވާ، ނުގުޅޭ ނަންނަމުގައި ވެސް ދީފައި މި ފަދަ އެވޯޑުތަކާއި ޝަރަފުތައް ދީފައި އެބަހުއްޓެވެ.
މިފަދަ ކަންކަމުގެ ފަހަތުގައި ހައްގުނޫން ފައިސާ ހިމެނޭނެކަން ކަށަވަރެވެ. ސަބަބަކީ ދިވެހިން ދުވަހަކު ވެސް އުއްމީދު ނުކުރާ މީހަކަށް، ނުވެސް ގުޅޭ ދާއިރާއަކުން ތައުރީފުކޮށްފައި މިކަހަލަ ޝަރަފު ނުވަތަ އެވޯޑު ދީފައިވާތީއެވެ. މި ވާހަކަ މި ދެންނެވީ މީހަކަށް ޝަރަފެއް ލިބިގެން ކަންބޮޑުވާތީ އެއް ނޫނެވެ. ނަމަވެސް، ހައްގު ނޫން ޝަރަފާއި އިއްޒަތާއި އެވޯޑުތަކެއް ގިނަބަޔަކަށް ލިބުމަކީ ދިވެހި ގައުމުގެ ކުރިމަގަށް ވިސްނާއިރު ގައުމަށް ގެއްލުން ހުރިކަމަކަށް ވާތީ އެކަމާ ކަންބޮޑު ވަނީއެވެ. ބުރަ މަސައްކަތާއި އެތައް ދުވަހެއްގެ ގުރުބާނީއެއް ވެގެން އެވޯޑާއި ޝަރަފު ހޯދާ ބައެއްގެ ހައްގަށް ބަޔަކު އަރައިގަންނާތީ އެކަމާ ކަންބޮޑުވަނީއެވެ. މިފަދަ މަޅިތަކުގައި އަޅުގަނޑުމެންގެ ތެރެއިން މީހުން ޖެހިފައި ވަނީ ބަލަންޖެހޭ ވަރަށް ނުބަލާތީއެވެ. ނުވަތަ އަމިއްލަ އެދުން އިސްކުރާތީއެވެ.
މިކަމުގެ އަސްލު މައްސަލައަކީ މުޖުތަމައުގެ ތެރޭގައި މަގުބޫލުކަން ހޯދުމަށާއި، މޮޅު މީހަކަށް ވުމަށް އޮންނަ ނަފްސާނީ އެދުމެވެ. ނަމުގެ ކުރިއަށް "ޑރ." އިތުރުކޮށްލުމުން ނުވަތަ ބައިނަލްއަގުވާމީ އެވޯޑެއް ލިބިފައިވާ ކަމަށް ދެއްކުމުން ލިބޭ ވަގުތީ އުފަލާއި މުޖުތަމައުގެ ލޯތައް ހުއްޓޭ ހުއްޓުމަށް ޓަކައި، ގިނަ ބަޔަކު އެތައް ހާސް ޑޮލަރެއް ޚަރަދުކުރެއެވެ. ބެޓަރ ބިޒްނަސް ބިއުރޯ (ބީބީބީ) ފަދަ އިދާރާތަކުން ހާމަކުރާ ގޮތުގައި، މިފަދަ ސްކޭމް އެވޯޑުތަކަށް އާންމުކޮށް ދުއިސައްތައެއްހާ ޑޮލަރުން ފެށިގެން އެތައް ހާސް ޑޮލަރަކާ ހަމައަށް ފީ ނަގައެވެ. މިކަމުގެ ސަބަބުން މާލީ ގޮތުން ގެއްލުންވުމުގެ އިތުރުން، އެ މީހެއްގެ ޕްރޮފެޝަނަލް އަބުރު ވެސް ވެއްޓެއެވެ. އެންމެ ހިތާމަވެރި ކަމަކީ، އެތައް އަހަރެއް ވަންދެން ބުރަ މަސައްކަތުން ހަގީގީ ޕީއެޗްޑީ ހާސިލުކުރާ މީހުންނާއި، ހަގީގީ ހުނަރުވެރިކަމުން އެވޯޑުތައް ހޯދާ މީހުންގެ މަސައްކަތުގެ އަގު މިފަދަ ފޭކު ސެޓްފިކެޓްތަކުގެ ސަބަބުން ވެއްޓިގެން ދިއުމެވެ.
މީހުންގެ މެދުގައި އޮންނަ އިތުބާރު ގެއްލި، ކޮންމެ ސެޓްފިކެޓަކީ ވެސް ގަނެފައިވާ އެއްޗެއް ކަމަށް ހީކުރެވޭ ހިސާބަށް ކަންކަން ދިއުމަކީ މުޅި ގައުމުގެ ތައުލީމީ އަދި ފަންނީ ނިޒާމަށް ލިބޭ ވަރަށް ބޮޑު ނިކަމެތިކަމެކެވެ. މީގެ ނޭދެވޭ އަސަރު ވަޒީފާގެ ބާޒާރަށް ވެސް ކުރެއެވެ. ކެންޔާ ފަދަ ގައުމުތަކުގައި ސަރުކާރުގެ އިސް މަގާމުތަކުގައި ތިބި މީހުން ފޭކު ޑިގުރީ ބޭނުންކުރި މައްސަލަތަކެއް ފަޅާއަރައި، އެތައް ބަޔަކު ވަޒީފާއިން ވަކިކޮށްފައިވެއެވެ. ރާއްޖޭގައި ވެސް މިފަދަ ކަންކަން އާންމުވެއްޖެ ނަމަ، ހަގީގީ ގާބިލުކަން ހުރި މީހުންނަށް ފުރުސަތު ގެއްލި، މުޅި ނިޒާމު ފެއިލްވެގެން ހިނގައިދާނެއެވެ.
ބައިނަލްއަގުވާމީ ފެންވަރުގައި ދިވެހިންނަށް ލިބޭ ކޮންމެ އެވޯޑަކީ ފޭކު އެވޯޑެއް ނޫނޭ ބުނެ، އަޅުގަނޑު މި ދައްކާ ވާހަކައާ ބައެއް މީހުން ދެކޮޅު ހަދައިފާނެއެވެ. އަދި ރަނގަޅު މަސައްކަތްކުރާ މީހުންނަށް ހިތްވަރު ދިނުމުގެ ގޮތުން އެވޯޑު ދިނުމަކީ މުހިންމު ކަމެކޭ ވެސް ބުނެފާނެއެވެ. އަޅުގަނޑު ވެސް އެއްބަސްވަމެވެ. ބައިނަލްއަގުވާމީ ގޮތުން ދެވޭ ކޮންމެ އެވޯޑަކާއި ޝަރަފަކީ އޮޅުވައިލުމާއި މަކަރުގެ ތެރެއިން ދެވޭ އެއްޗެއް ނޫނެވެ.
ވަރަށް ރަނގަޅަށް މިފަދަ ކަންކަން އިންތިޒާމްކޮށްގެން ކުރާ ފަރާތްތައް ނެތެކޭ ނުދަންނަވަމެވެ. އޮޅުވައިލުމާއި މަކަރުން އެއްކިބާވެފައިވާ، ހަގީގީ، އިތުބާރު ހުރި އެވޯޑުތަކާއި ޝަރަފުތައް ދުނިޔޭގައި ދީ އުޅެއެވެ. ރާއްޖޭގައި ވެސް އެފަދަ ޝަރަފުވެރި އެވޯޑްތައް ދެއެވެ. ނަމަވެސް، ހަގީގީ އެވޯޑަކާއި ފައިސާއަށް ގަންނަ އެވޯޑެއްގެ ތަފާތު ވަރަށް ބޮޑެވެ. ހަގީގީ އެވޯޑުތަކަކީ އެކަމަށް ޚާއްސަ މިންގަނޑުތަކެއް ކަނޑައެޅިފައިވާ، ފަނޑިޔާރުންގެ ޕެނަލަކުން އިންސާފުކުރުމަށް އެ ދާއިރާއަށް ކުރެވިފައިވާ މަސައްކަތްތައް ވަޒަންކޮށްގެން ދޭ އެއްޗެކެވެ. އެފަދަ އެވޯޑުތަކުގައި، އެވޯޑު ލިބޭ މީހާގެ އަތުން ޓްރޮފީއަށް ނުވަތަ މަޖައްލާގައި ނަން ޖެހުމަށް މަޖުބޫރުކޮށްގެން ފައިސާއެއް ނުނަގާނެއެވެ. އެވޯޑަކަށް ކުރިމަތިލުމަށް ފީއެއް ނެގުމަކީ ބައެއް ހާލަތްތަކުގައި އާންމު ކަމަކަށް ވިޔަސް، އެވޯޑު "ލިބުމުން" އެކަން ގަބޫލުކުރުމަށް ނުވަތަ ޓްރޮފީއާ ހަވާލުވުމަށް ފައިސާ ދައްކަން ޖެހުމަކީ ސީދާ ސްކޭމެކެވެ. ހަމައެހެންމެ، ފޮތް ޗާޕުކުރުމުގައި އަމިއްލައަށް ޚަރަދުކުރުން ފަދަ ކަންކަމަކީ ގޯހެއް ނޫނެވެ. ނަމަވެސް، މޮޅު މީހެއްގެ ގޮތުގައި ދައްކަން ފައިސާ ދިނުމަކީ މުޅިން ތަފާތު، އޮޅުވާލުމުގެ އަމަލެކެވެ.
އެހެންކަމުން، މިފަދަ ހުށަހެޅުމެއް ލިބިއްޖެ ނަމަ، އަމަލުކުރަންވީ ގޮތުގެ ފިޔަވަޅުތަކެއް އެނގުން މުހިންމެވެ.
ފުރަތަމަ ކަމަކަށް، ތިމާ ކުރިމަތިނުލާ ނުވަތަ ނަން ހުށަހަޅާފައި ނުވާ އެވޯޑެއް ކުއްލިއަކަށް ލިބުނު ކަމަށް އަންގާ އީމެއިލެއް އަތުވެއްޖެ ނަމަ، އެއީ އެންމެ ފުރަތަމަ ރެޑް ފްލެގް ނުވަތަ އިންޒާރުގެ ނިޝާނެވެ.
ދެވަނަ ކަމަކަށް، އެވޯޑު ހަވާލުކުރުމަށް، ޓްރޮފީ ގަތުމަށް، ނުވަތަ ސެޓްފިކެޓް ޕްރިންޓްކުރުމަށް ކަމަށް ބުނެ އެއްވެސް މިންވަރެއްގެ ފައިސާއެއް ދައްކަން އަންގައިފި ނަމަ، އެއީ ޔަގީނުން ވެސް ސްކޭމެކެވެ.
ތިންވަނަ ކަމަކަށް، އީމެއިލް ފޮނުވި ފަރާތުގެ ސައްހަކަން ކަށަވަރުކުރާށެވެ. އެ ކުންފުންޏެއްގެ ނަން އިންޓަނެޓުން ސާޗުކޮށް، އެހެން މީހުން ކޮށްފައިވާ ރިވިއުތައް ކިޔާލާށެވެ. ޑޮމެއިން ރަޖިސްޓްރީކޮށްފައިވާ ގޮތް ބެލުމަށް "ހޫއިޒް" ލުކްއަޕްއެއް ހަދައިލުމުން، އެ ވެބްސައިޓަކީ ކިހާ ދުވަހެއް ވެފައިވާ، ކޮން ގައުމެއްގައި ރަޖިސްޓްރީކޮށްފައިވާ ސައިޓެއްކަން އެނގޭނެއެވެ. ގިނަ ފަހަރަށް މިފަދަ ސްކޭމް ސައިޓުތަކަކީ ވަރަށް ފަހުން ހަދާފައި ހުންނަ، އަދި އަސްލު އޮފީހެއްގެ އެޑްރެހެއް ނުވަތަ ފޯނު ނަންބަރެއް ވެސް ނުހުންނަ ސައިޓުތަކެވެ.
ހަތަރުވަނަ ކަމަކަށް، ފަނޑިޔާރުންގެ ޕެނަލް ބަލައިލާށެވެ. ވެބްސައިޓުގައި ފަނޑިޔާރުންގެ ނަންތައް ނެތް ނަމަ، ނުވަތަ އެއީ ކޮން ބައެއްކަން ނޭނގޭ ނަމަ، އެއީ އިތުބާރު ކުރެވޭނެ އެވޯޑެއް ނޫނެވެ.
ފަސްވަނަ ކަމަކަށް، ޔުނިވާސިޓީއަކުން ދޭ ޝަރަފުވެރި ޑިގްރީއެއް ނަމަ، އެ ޔުނިވާސިޓީއަކީ އެ ގައުމެއްގެ ކަމާބެހޭ އިދާރާތަކުން ގަބޫލުކުރާ، އެކްރެޑިޓްކޮށްފައިވާ ތަނެއްތޯ ބަލާށެވެ. ރާއްޖޭގައި ނަމަ، މޯލްޑިވްސް ކޮލިފިކޭޝަންސް އޮތޯރިޓީ މެދުވެރިކޮށް އެތަނެއްގެ ސައްހަކަން ކަށަވަރު ކުރެވިދާނެއެވެ.
ހަވަނަ ކަމަކަށް، މީގެ ކުރިން އެ އެވޯޑު ލިބިފައިވާ މީހުންނަކީ ކޮބައިތޯ ބަލާށެވެ. އެއީ ހަގީގަތުގައި ވެސް އެ ދާއިރާއިން ފާހަގަކޮށްލެވޭ މަސައްކަތްތަކެއް ކޮށްފައިވާ މީހުންތޯ ނުވަތަ ހަމައެކަނި ފައިސާ ދީގެން އެވޯޑު ގަނެފައިވާ ބައެއްތޯ ދެނެގަތުމަކީ މުހިންމު ކަމެކެވެ.
އަޅުގަނޑުމެން ގަބޫލުކުރަންވީ ހަގީގަތަކީ، ފައިސާ ދީގެން ގަންނަ ޝަރަފަކީ އެއްވެސް އަގެއް ހުރި އެއްޗެއް ނޫން ކަމެވެ. ހަގީގީ ކާމިޔާބީއަކީ ބުރަ މަސައްކަތުން، ތެދުވެރިކަމާއެކު ހޯދާ ކާމިޔާބީއެވެ. މިފަދަ ސްކޭމްތަކުގެ މަޅީގައި ނުޖެހި ސަލާމަތްވުމަކީ ކޮންމެ ފަރުދެއްގެ ވެސް ޒިންމާއެކެވެ. އަދި މުޖުތަމައެއްގެ ގޮތުގައި، ފައިސާއަށް އެވޯޑު ގަންނަ މީހުންނަށް ތައުރީފުކުރުން ހުއްޓާލައި، ހަގީގީ ހުނަރުވެރިންގެ އަގުވަޒަންކުރަން ފަށަން ޖެހެއެވެ. ޕްރޮފެޝަނަލް ދާއިރާތަކުގެ އިތުބާރު ހިފެހެއްޓޭނީ އޭރުންނެވެ. މިއަދު އަޅުގަނޑުމެން މިފަދަ ފޭކު ޝަރަފުތަކަށް ނޫނެކޭ ނުބުނެފި ނަމަ، މާދަމާ އަޅުގަނޑުމެންގެ ތައުލީމީ އަދި ފަންނީ ނިޒާމުގެ އެއްވެސް އަގެއް ނޯންނާނެއެވެ. އެހެންކަމުން، ދެން ފަހަރަކު ވެސް ކުއްލިއަކަށް "އެންމެ މޮޅު މީހާ" ގެ އެވޯޑު ލިބުނު ކަމަށް އަންގާ އީމެއިލެއް އަތުވެއްޖެ ނަމަ، ކްރެޑިޓް ކާޑު ނެގުމުގެ ކުރިން ދެވަނަ ފަހަރަށް ވިސްނައިލާށެވެ. މިފަދަ އޮޅުވާލުންތަކަށް ފުރުސަތު ނުދީ، ހަގީގީ މަސައްކަތުން ކުރިއަރަން އަމާޒު ހިފުމަކީ މިއަދު އަޅުގަނޑުމެން ކޮންމެހެން ކުރަން މަޖުބޫރުވެފައިވާ ކަމެކެވެ.