ހުޅުމާލޭގައި ހުންނަ މޯލްޑިވްސް ކަރެކްޝަނަލް ސާވިސްގެ ޖަލަށް ހުއްދަނެތި ވަން މީހަކު 26,600 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި ކުށް ސާބިތުވެފައިވަނީ ހުޅުމާލެ، ފްލެޓް ނަންބަރު 04-1-123، ޢާޡިމް މުޙައްމަދުގެ މައްޗަށެވެ. ދައުލަތުން އޭނާގެ މައްޗަށް އުފުލީ ދިވެހިރާއްޖޭގެ ޤާނޫނުލްޢުގޫބާތުގެ 230 ވަނަ މާއްދާގެ ދަށުން "އެނގިހުރެ ހުއްދަނޫން ތަނަކަށް ވަނުމުގެ" ކުށުގެ ދައުވާއެވެ. ދައުލަތުން ހުށަހެޅި ދައުވާގައިވާ ގޮތުން، 2026 ޖޫން 20 ގައި، 20:14 ހާއިރު، ޢާޡިމް މުޙައްމަދު ވަނީ ހުޅުމާލޭ އޮނުގަސްމަގުގައި ހުންނަ މޯލްޑިވްސް ކަރެކްޝަނަލް ސާވިސްގެ ޖަލަށް ހުއްދަނެތި ވަދެފައެވެ.
ކްރިމިނަލް ކޯޓުގައި ބޭއްވި އިބްތިދާއީ އަޑުއެހުމާއި އަވަސްނިޔާގެ މަޖިލީހުގައި، އޭނާ ވަނީ އެއްވެސް މަޖުބޫރުކަމެއް ނެތި، އަމިއްލަ އިޚްތިޔާރުގައި ދައުވާއަށް ފުރިހަމައަށް އިއުތިރާފު ވެފައެވެ. އެހެންކަމުން މައްސަލަ ބެއްލެވި ޤާޟީ ވަނީ އެ އިއުތިރާފުގެ މައްޗަށް ބިނާކޮށް، އެކަށީގެންވާ ޝައްކެއްނެތް މިންވަރަށް އޭނާގެ މައްޗަށް ކުށް ސާބިތުވާ ކަމަށް ކަނޑައަޅުއްވާފައެވެ.
މިއީ ޖިނާޔަތުގެ ފަސްވަނަ ދަރަޖައިގެ ކުށަކަށްވާތީ، އަސާސީ އަދަބަކީ ނުވަ މަހާއި 18 ދުވަހުގެ ޖަލު އަދަބެކެވެ. ޝަރީޢަތުގައި ކުށަށް އިއުތިރާފުވުމުން އެއް ދަރަޖަ ދަށްކުރެވި، އަދި ކޯޓަށް އެއްބާރުލުން ދީފައިވާތީ ފަނޑިޔާރަށް ލިބިދޭ އިޚްތިޔާރުގެ ދަށުން އިތުރު އެއް ދަރަޖަ ދަށްކުރުމުން އަދަބު ހަތަރު މަހާއި 24 ދުވަހުގެ ޖަލު އަދަބަކަށް ކުޑަވިއެވެ. އަދި ތަޙުޤީޤު މަރުޙަލާގައި ބަންދުގައި ހޭދަކުރި 11 ދުވަސް އުނިކުރުމުން ތަންފީޛުކުރަންޖެހޭ އަދަބަކީ ހަތަރު މަހާއި 13 ދުވަހުގެ ޖަލު އަދަބެކެވެ.
ކުށަށް އިއުތިރާފުވެ، އެއްބާރުލުން ދީފައިވުމާއި، މި ބާވަތުގެ އިތުރު ކުށެއްގެ ރެކޯޑެއް ނެތުމުން، ކޯޓުން ވަނީ އޭނާގެ މައްޗަށް އިއްވި ހަތަރު މަހާއި 13 ދުވަހުގެ ޖަލު އަދަބު 26,600 ރުފިޔާގެ ޖޫރިމަނާގެ އަދަބަކަށް ބަދަލުކޮށްފައެވެ. މި ފައިސާ ހަ މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް ކޯޓުން ވަނީ އަންގާފައެވެ.