މެޖިސްޓްރޭޓް ކޯޓުތަކުގެ ހިންގުން އެއްއުސޫލަކުން ހަރުދަނާކޮށް، ކޯޓުތަކުން ދެވޭ ޚިދުމަތްތައް އެއްފެންވަރެއްގައި ފޯރުކޮށްދިނުމަށް އެކުލަވާލާފައިވާ "މެޖިސްޓްރޭޓް ކޯޓުތަކުގެ ގަވާއިދު"އަށް މިއަދު އަމަލުކުރަން ފަށައިފިއެވެ.
އެކެއް ޖުލައި 2026 ގައި ދިވެހިސަރުކާރުގެ ގެޒެޓްގައި ޝާއިއުކޮށްފައިވާ މި ގަވާއިދަށް މިއަދުން ފެށިގެން އަމަލުކުރަން ފެށުމާއެކު، 2008 ވަނަ އަހަރު ފެހި ޤާނޫނުއަސާސީއަށް އަމަލުކުރަން ފެށުމުން ޖަސްޓިސް މިނިސްޓްރީ އުވިގެން ދިއުމާ ގުޅިގެން މެޖިސްޓްރޭޓް ކޯޓުތަކުގެ ގަވާއިދަށް އައިސްފައިވާ 18 އަހަރުވީ ދިގު ގާނޫނީ ހުސްކަމަށް މިވަނީ ނިމުން އައިސްފައެވެ.
އެއްގޮތް އުސޫލަކުން ކޯޓުތައް ހިންގުން:
މިއަދުން ފެށިގެން، ރާއްޖޭގެ ހުރިހާ މެޖިސްޓްރޭޓް ކޯޓުތަކުގައި މައްސަލަ ހުށަހެޅުމާއި، މައްސަލަ ބަލައިގަތުމާއި، ޝަރީޢަތްތައް ކުރިއަށްގެންދިއުމުގެ އިޖުރާއަތްތައް އެއްގޮތްވެ، ރައްޔިތުންނަށް ހަމަހަމަކަމާއެކު އިންސާފު ލިބިގެންދާނެއެވެ.
މި ގަވާއިދުގެ ދަށުން މެޖިސްޓްރޭޓް ކޯޓުތަކަށް ރަޖިސްޓްރާއިން އައްޔަންކުރެވޭނެއެވެ. މީގެކުރިން ރަޖިސްޓްރާގެ މަސްއޫލިއްޔަތު އަދާކުރަމުންދިޔައީ ކޯޓުގެ އެޑްމިނިސްޓްރޭޓަރު ނުވަތަ ފަނޑިޔާރުން ކަމަށްވާތީ، މިއަދު ޢަމަލުކުރަން ފެށި ބަދަލާއެކު އިދާރީ މަސައްކަތްތަކަށް ބޮޑު ލުޔެއް ލިބިގެންދާނެއެވެ.
ކައިވެނިކުރުމުގައި ތެލަސީމިއާ ކާޑު ލާޒިމުކުރުން:
ގަވާއިދުގެ 83 ވަނަ މާއްދާގައިވާ ގޮތުން، މެޖިސްޓްރޭޓް ކޯޓުތަކަށް ކައިވެނިކުރުމަށް އެދި ހުށަހަޅާއިރު ދެމީހުން ތެލަސީމިއާއަށް ޓެސްޓުކޮށް، ތެލެސީމިއާ ކާޑު ހުށަހަޅަންޖެހޭނެއެވެ. ނަމަވެސް އެކަކުގެ ކިބައިގައި ތެލަސީމިއާ ވާރުތަކުރާ ގޮތް ނެތްނަމަ، ދެވަނަ މީހާގެ ނަތީޖާ ހުށަހެޅުން ލާޒިމެއް ނޫނެވެ.
ބަންދާމެދު ގޮތެއް ނިންމުމުގެ އުސޫލު:
ކުށެއްގެ ތުހުމަތުގައި ހައްޔަރުކުރެވޭ މީހުންގެ ބަންދާމެދު ގޮތެއް ނިންމުމުގެ މަޖިލިސްތައް ކުރިއަށްދާނެ ވަގުތުތަކާއި އުސޫލުތައް ގަވާއިދުގައި ސަރީހަކޮށް ބަޔާންކޮށްފައިވެއެވެ.
މި ގަވާއިދަށް މެޖިސްޓްރޭޓް ކޯޓުތަކުގެ މުވައްޒަފުންނާއި ފަނޑިޔާރުން އަހުލުވެރިކުރުމަށް ޖުޑީޝަލް އެކަޑަމީން ވަނީ ޚާއްޞަ ތަމްރީނު ޕްރޮގްރާމްތަކެއްވެސް ކުރިއަށްގެންގޮސްފައެވެ.