ޖިންސީ ފުރައްސާރައިގެ ތުހުމަތުތަކަކާ ގުޅިގެން ފުލުހުން ހޯދަން އިއުލާނުކުރި މިހާ މީހާރު ދެނެގަނެވިފައިވާ ކަމަށް ފުލުހުން ބުނެފިއެވެ.
ފުލުހުންގެ އާއިލާއާއި ކުޑަކުދިންގެ ކަންކަން ބަލާ ފެމެލީ އެންޑް ޗައިލް ޕްރޮޓެކްޝަން ޔުނިޓުން ބަލަމުންދާ މައްސަލައަކާ ގުޅިގެން މީހަކު ހޯދުމަށް ވީޑިއޯއެއް އާންމުކޮށް އާންމުންގެ އެހީއަށް އެދުނީ މިއަދުގެ މެންދުރުގެ ވަގުތެއްގައެވެ.
ފުލުހުން އާންމުކުރި ވީޑިއޯގައިވާ ގޮތުން ހޯދަނީ ހުދު ކުލައިގެ އަތްކުރު ގަމީހެއް ލައިގެން ހުރި މީހެކެވެ.
މަޑު ނޫކުލައިގެ ޖިންސެއް ލައިގެން ހުރި އެ މީހާ މަގުމަތިން ހިނގައިފައި އައިސް މާލޭގެ ގެއެއްގެ ކުރިމަތީގައި ހަރަކާތްތެރިވާ މަންޒަރު ފުލުހުން އާންމުކުރި އެ ވީޑިއޯއިން ފެނެއެވެ.
އެއަށްފަހު ދެންމެ ފުލުހުން ކޮށްފައިވާ ޕޯސްޓެއްގައި ވަނީ އެ މީހާ ދެނެގަނެވިފައިވާ ކަމަށް ބުނެފައެވެ. އަދި އެކަމުގައި ރައްޔިތުންގެ ފަރާތުން ލިބުނު އެއްބާރުލުމަށް ފުލުހުން ވަނީ ޝުކުރު އަދާކޮށްފައެވެ.