ސީރިއަލް ޕެކެޓުތަކެއްގައި ފޮރުވައިގެން 3.86 މިލިއަން ރުފިޔާ ރާއްޖޭން ބޭރު ކުރަން އުޅެނިކޮށް ހައްޔަރުކުރި ބިދޭސީ މީހުން އިތުރު 30 ދުވަހަށް ބަންދު ކުރުމަށް ކްރިމިނަލް ކޯޓުން އިއްޔެ އަމުރުކޮށްފިއެވެ.
ގަވާއިދާ ޚިލާފަށް ބޭރު ފައިސާ ގަނެވިއްކުމުގެ މުއާމަލާތްތައް ހިންގާ ފަރާތްތައް ހޯދައި ގާނޫނީ ފިޔަވަޅު އެޅުމަށް ޚާއްސަކުރެވިފައިވާ ޓާސްކްފޯހަށް ލިބުނު މައުލޫމާތަކާ ގުޅިގެން، މި މަހު 18ގައި ހިންގި އޮޕަރޭޝަނުން ހަ މީހަކު ހައްޔަރުކުރީ ފުރަން ގޮސް ތިއްބައެވެ.
އެ މީހުންގެ އަތުގައި ގިނަ އަދަދެއްގެ ބޭރު ފައިސާ، ޔޭޔޭ ބްރޭންޑުގެ ސީރިއަލް ޕެކެޓުތަކެއްގައި ފޮރުވާފައި ހުއްޓާ ވަނީ ފެނިފައެވެ.
އެ މީހުންގެ އަތުން ފެނުނު ފައިސާގެ ތެރޭގައި 174,161 ޔޫއެސް ޑޮލަރު، 56,760 ޔޫރޯ އަދި 1,815 ސްޓާލިން ޕައުންޑް ހިމެނެއެވެ. އޭގެ ޖުމްލަ އަގު ދިވެހި ރުފިޔާއިން ތިން މިލިއަނަށްވުރެ މަތިވާނެއެވެ.
މި މައްސަލައާ ގުޅިގެން ހައްޔަރުކޮށްފައިވަނީ، އެމްޑީ ޝާހިން މިއާއާއި އެމްޑީ މޮހިއްދީން ޗޯދުރީ އަޖްގޮރު މިރިދާއާއި މުހައްމަދު އަބްދުﷲއާއި ރަޖިބްގެ އިތުރުން މުހައްމަދު މައިނުދީން ސޯލަހެވެ. އެ މީހުން އޭރު ބަންދުކުރީ 10 ދުވަހަށެވެ.
އެ މުއްދަތު ހަމަވެގެން އިއްޔެ ކޯޓަށް ގެންދިޔުމުން އިތުރު 30 ދުވަހަށް ބަންދުކުރުމަށް ވަނީ އަމުރުކޮށްފައެވެ. އެ މީހުންގެ މައްޗަށް ކޯޓުންކޮށްފައި ވަނީ، މަނީ ލޯންޑަރިންގެ ތުހުމަތެވެ.
ގާނޫނާއި ގަވައިދުތަކާ ޚިލާފަށް ބޭރު ފައިސާ ގެންގުޅުމާއި އޭގެ ވިޔަފާރި ކުރުމުގެ ތުހުމަތުގައި ބިދޭސީން ހައްޔަރުކުރާ މިންވަރު އަންނަނީ އިތުރުވަމުންނެވެ.
ހޯމް މިނިސްޓަރު އަލީ އިހުސާން ވަނީ، ދިވެހިން ނިވާފަތްގަނޑަކަށް ހަދައިގެން ކަންމަތީ ފިހާރަތައް ހުޅުވައި، އެ ތަންތަނަކީ ގަވައިދާ ޚިލާފަށް ޑޮލަރު މާރުކުރާ ތަންތަނުގެ ގޮތުގައި ބިދޭސީން ހިންގަމުންދާ މަންޒަރު ފެންނަމުންދާ ކަމަށް ވިދާޅުވެފައެވެ.