މެލޭޝިއާގެ ދެ ދައުރެއްގެ ބޮޑުވަޒީރުކަން ކުރެއްވި، ޑރ. މަހާތީރު މުހައްމަދުގެ ސިއްހީ ހާލުކޮޅު ބެއްލެވުމަށް ޓަކައި ހޮސްޕިޓަލުގައި އެޑްމިޓްކޮށްފައިވާ ކަމަށް އެމަނިކުފާނުގެ އޮފީހުން ކަށަވަރުކޮށްދީފިއެވެ.
އުމުރުފުޅުން 101 އަހަރުގެ މަހާތީރު، މެލޭޝިއާގެ ނޭޝަނަލް ހާޓް އިންސްޓިޓިއުޓް (އައިޖޭއެން) ގައި އެޑްމިޓްކޮށްފައިވަނީ ރޭގެ ވަގުތެއްގައެވެ. މަހާތީރު އެޑްމިޓްކޮށްފައި މިވަނީ އެމަނިކުފާނާއެކު 70 އަހަރު ވަންދެން އުޅުއްވި އަނބިކަނބަލުން ސިއްތި ހަސްމާ މުހައްމަދު އަލީ ހަމަ އެ ހޮސްޕިޓަލުގައި އަވަހާރަވިތާ އެއް ދުވަސް ފަހުންނެވެ.
މަހާތީރު ހޮސްޕިޓަލުގައި އެޑްމިޓްކުރަން ޖެހުނު ސީދާ ސަބަބު އަދި ސާފުވެފައެއް ނުވެއެވެ. އެމަނިކުފާނުގެ އެހީތެރިޔާ ސޫފީ ޔޫސުފް ވިދާޅުވީ ޑޮކްޓަރުންގެ ޑައިގްނޯސިސްގެ ނަތީޖާއަށް އިންތިޒާރުކުރަމުންދާ ކަމަށެވެ.
މަހާތީރުގެ ދަރިކަލުން މޮޚްޒާނީ، އެ ގައުމުގެ ބަނާމާ ނިއުސް އޭޖެންސީއަށް މައުލޫމާތު ދެއްވަމުން ވިދާޅުވީ، ވޭތުވެދިޔަ ދެ ދުވަހަކީ އެމަނިކުފާނަށް ނަފްސާނީ ގޮތުންނާއި ޖިސްމާނީ ގޮތުން ވަރަށް ބޮޑު ހާސްކަމެއް ކުރިމަތިވި ދުވަސްތަކެއް ނަމަވެސް، މިވަގުތު ހާލުކޮޅު ރަނގަޅު ކަމަށާއި ކަންބޮޑުވާންޖެހޭ ފަދަ ކަމެއް ނެތް ކަމަށެވެ.
ފަހަކަށް އައިސް މަހާތީރުގެ ސިއްހީ ހާލުކޮޅު ދަށްވެ، އެކި ފަހަރު މަތިން ވަނީ ހޮސްޕިޓަލުގައި ފަރުވާ ހޯއްދަވާފައެވެ.
އެގޮތުން މިދިޔަ ޖެނުއަރީ މަހު ގޭތެރެއަށް ވެއްޓި އުނަގަނޑުގެ ކަށިގަނޑެއް ބިނދިގެން ތިން ހަފުތާ ވަންދެން ފަރުވާ ދީފައިވާއިރު، އުމުރުން ދުވަސްވުމުގެ ސަބަބުން ސާޖަރީ ނުހެދި މިހާރު އެމަނިކުފާނު އިންވަނީ ފުރޮޅުލީ ގޮނޑީގައެވެ. މީގެއިތުރުން 2024 ވަނަ އަހަރުގެ އޮކްޓޫބަރު މަހު ފުއްޕާމޭގެ އިންފެކްޝަނަކަށް ފަރުވާ ހޯއްދެވި އިރު، މީގެ ކުރިން 1989 އަދި 2007 ގައި ހިތުގެ ބައިޕާސް ސާޖަރީތަކެއް ވެސް ވަނީ ހައްދަވާފައެވެ.
އަނބިކަނބަލުން އަވަހާރަވުމާ ގުޅިގެން މެލޭޝިއާގެ މިހާރުގެ ބޮޑުވަޒީރު އަންވަރު އިބްރާހިމާއި ސަރަޙައްދީ އެކި ގައުމުތަކުގެ ވެރިން ވަނީ މަހާތީރަށް ތައުޒިޔާ ފޮނުއްވާފައެވެ.
ޑރ. މަހާތީރަކީ 1981 އިން 2003 އަށް އަދި ފަހުން 2018 އިން 2020 އަށް މެލޭޝިއާގެ ބޮޑުވަޒީރުކަން ކުރެއްވި، ދެކުނު އިރުމަތީ އޭޝިއާގެ އެންމެ ތަޖުރިބާކާރު އަދި ނުފޫޒުގަދަ އެއް ލީޑަރެވެ. އެމަނިކުފާނުގެ ވެރިކަމުގައި މެލޭޝިއާގެ އިގުތިސާދު ވަރުގަދަކޮށް، ސިނާއީ ގޮތުން ބޮޑެތި ކުރިއެރުންތަކެއް ހޯއްދަވައިދެއްވިއެވެ. މީގެއިތުރުން 1990 ގެ އަހަރުތަކުގެ ފަހުކޮޅު ކުރިމަތިވި އޭޝިއާގެ މާލީ ކާރިސާގައި އައިއެމްއެފްގެ ލޯނު ދޫކޮށްލައްވައި، ގައުމުގެ އިގްތިޞާދު ސަލާމަތް ކުރެއްވުމަށް މަހާތީރު އެޅުއްވި ފިޔަވަޅުތަކަކީ ފާހަގަކޮށްލެވޭ ކަންކަމެވެ.