މެލޭޝިއާގައި މަތީ ތައުލީމު ހާސިލުކުރަން ބޭނުންވާ ދިވެހި ދަރިވަރުންނަށް ސްކޮލަޝިޕްގެ ފުރުސަތުތަކާއި، ޕޯސްޓް ގްރެޖުއޭޓް ފުރުސަތުތައް ފުޅާކޮށްދިނުމަށް މެލޭޝިއާ ސަރުކާރުން މަރުޙަބާ ކިޔާ ކަމަށް އެ ގައުމުން ރާއްޖެއަށް ކަނޑައަޅާފައި ހުންނަވާ ނޮން-ރެޒިޑެންޓް ސަފީރު ބަދްލީ ހިޝާމް ބިން އާދަމް ވިދާޅުވެއްޖެއެވެ.
ސަން އޮންލައިންގެ "ޑިޕްލޮމެޓިކް ފޯކަސް" ގައި ވާހަކަދައްކަވަމުން ސަފީރު ބަދްލީ ހިޝާމް ވިދާޅުވީ، ދިވެހި ގިނަ ދަރިވަރުންތަކެއް މަތީ ތަޢުލީމު ހާސިލުކުރުމަށް މެލޭޝިއާ އިޚްތިޔާރުކުރަނީ އެ ގައުމުގެ ތަޢުލީމީ ފެންވަރު ރަނގަޅުވުމުގެ އިތުރުން، ދިރިއުޅުމުގެ ޚަރަދުތައް އެކަށީގެންވާ މިންވަރެއްގައި ހުރުމުން ކަމަށެވެ. އަދި ޑިގްރީ ނިންމުމަށްފަހު، މާސްޓާސް އަދި ޕީއެޗްޑީ ފަދަ ޕޯސްޓް ގްރެޖުއޭޓް ކޯސްތަކަށް މެލޭޝިއާގައި ދެމިތިބެން ބޭނުންވާ ދަރިވަރުންނަށް އެ ފުރުސަތު ފަހިކޮށްދިނުމަށް އެ ގައުމުން އަބަދުވެސް މަސައްކަތްކުރާނެ ކަމަށް ވިދާޅުވިއެވެ.
ސަފީރު އިތުރަށް ފާހަގަކުރެއްވި ގޮތުގައި، ދެ ގައުމުގެ ދެމެދުގައި އޮތް ގުޅުމުގެ ތެރެއިން ޔުނިވާސިޓީތަކާ ގުޅިގެން ސްކޮލަޝިޕްތައް އިތުރުކުރުމާއި، ކްރެޑިޓް ޓްރާންސްފަކުރެވޭނެ ނިޒާމުތައް ހަރުދަނާކުރުމަށް މަސައްކަތްކުރެވޭނެއެވެ. މީގެ އިތުރުން 'މެލޭޝިއަން ޓެކްނިކަލް ކޯޕަރޭޝަން ޕްރޮގްރާމް' (އެމްޓީސީޕީ) ގެ ދަށުން އިންސާނީ ވަސީލަތް ތަރައްގީކުރުމަށާއި، އެކި ދާއިރާތަކުން ދިވެހިން ތަމްރީނުކުރުމުގެ ފުރުސަތުތައް މެލޭޝިއާއިން އަބަދުވެސް ފަހިކޮށްދެމުން ގެންދާނެ ކަމަށް ސަފީރު ވިދާޅުވިއެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ދާދިފަހުން ރާއްޖެއަށް ކުރެއްވި ރަސްމީ ދަތުރުފުޅުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއެކު ބޭއްވެވި މަޝްވަރާތަކުގައި ވެސް މެލޭޝިއާގައި ދިރިއުޅޭ އަދި ކިޔަވަމުންދާ ދިވެހިންނަށް ދިމާވާ ދަތިތައް ހައްލުކޮށްދިނުމާ ގުޅޭގޮތުން ވަނީ ފުޅާ ދާއިރާއެއްގައި ވާހަކަދައްކަވާފައެވެ.
ސަފީރު ވިދާޅުވީ، ދެ ގައުމުގެ ދެމެދުގައި އަލަށް އެކުލަވާލާ "ޖޮއިންޓް ކޮމިޝަން" މެދުވެރިކޮށް ތައުލީމީ ދާއިރާއިން ދިވެހި ދަރިވަރުންނަށް ކުރިއަށް އޮތް ތަނުގައި އިތުރު ފަސޭހަތަކާއި ފުރުސަތުތައް ފަހިވެގެންދާނެ ކަމަށެވެ.