ބޮލީވުޑްގެ މަޝްހޫރު އެކްޓަރު ޝާހިދު ކަޕޫރުގެ އަންހެނުން މީރާ ރާޖްޕުތު، ކަރީނާ ކަޕޫރު ޚާން ގެނެސްދޭ މަޤުބޫލު ޓޯކް ޝޯ "ވޮޓް ވުމަން ވޯންޓް"ގެ މެހުމާނެއްގެ ގޮތުގައި ބައިވެރިވިކަން އިއުލާނުކުރުމާއެކު، މުޅި ފިލްމީ ދާއިރާއާއި އާންމުންގެ ބޮޑު އިންތިޒާރެއް މި އެޕިސޯޑަށް ވަނީ ހުއްޓިފައެވެ. ބޮލީވުޑްގެ މާޒީއަށް ބަލާއިރު، މިއީ އާންމުކޮށް ފެންނަ ފަދަ އާދައިގެ ބައްދަލުވުމެއް ނޫނެވެ.
މީގެ އަހަރުތަކެއް ކުރިން ގާތްގަނޑަކަށް ހަތަރު އަހަރު ވަންދެން ކަރީނާ އާއި ޝާހިދުގެ މެދުގައި އޮތް ސީރިއަސް ލޯބީގެ ގުޅުމަކީ، އޭރު މީޑިއާގެ ސަމާލުކަން އެންމެ ބޮޑަށް ލިބުނު އެއް ޚަބަރެވެ. ހާއްސަކޮށް އެދެމީހުން އެކުގައި ކުޅުނު "ޖަބް ވީ މެޓް" އަކީ އަދިވެސް ސަޕޯޓަރުންގެ މެދުގައި ބޮޑު މަގުބޫލުކަމެއް އޮތް ފިލްމެކެވެ.
ކަރީނާއަކީ ކުޑައިރުއްސުރެ ފިލްމީ އާއިލާއަކުން އައިސް، ބޮލީވުޑްގެ އެންމެ އަގުބޮޑު ބަތަލާއިންގެ ތެރޭގައި ހިމެނޭ ފަންނާނެކެވެ. އެއާ ޚިލާފަށް، މީރާއަކީ ފިލްމީ ދާއިރާއާ އެއްވެސް ގުޅުމެއް ނެތް، ދިއްލީގެ އާދައިގެ އާއިލާއަކަށް ނިސްބަތްވާ ނަމަވެސް، ކައިވެންޏަށްފަހު އަމިއްލަ ވަރުގަދަ ޝަޚްޞިއްޔަތެއް ބިނާކޮށްފައިވާ ފަރާތެކެވެ. އެހެންކަމުން ދެމީހުން އެކުގައި އެއް ސޯފާއެއްގައި އިށީނދެލައިގެން ދައްކާނެ ވާހަކަތަކާމެދު ސަޕޯޓަރުންގެ ޝައުޤުވެރިކަން ވަނީ އިތުރުވެފައެވެ.
ކަރީނާ ގެނެސްދޭ މަޤުބޫލު ޓޯކް ޝޯ "ވޮޓް ވުމަން ވޯންޓް"ގައި ކަރީނާ މީރާއާ އެކު އަދި ޝާހިދު އެވޯޑު ހަފްލާއެއްގައި ކަރީނާއާ އެކު--ފޮޓޯ/އިންޑިއާޓުޑޭމި އެޕިސޯޑުން ޝާހިދުއާ ބެހޭ ވާހަކަތައް އެހުމަށްވުރެ ބޮޑަށް ދެކެވޭނީ މަންމައެއްގެ ޒިންމާ އާއި އަމިއްލަ އައިޑެންޓިޓީ ހިފެހެއްޓުމާއި، މީޑިއާގެ ފާާޑުކިޔުންތަކާ ކުރިމަތިލާނެ ގޮތްތަކާ މެދު މީރާގެ ވިސްނުން ކަމަށް ބެލެވެއެވެ. އެހެންކަމުން މިއީ ކަރީނާ ގެނެސްދޭ ޓޯކް ޝޯގެ ތާރީޚުގައިވެސް އެންމެ ގިނަ ބަޔަކު ބަލާނެ އެއް އެޕިސޯޑަށް ވެގެންދާނެއެވެ.
މި ޝޯގެ ބައެއް މަންޒަރުތައް ހިއްސާކުރަމުން މީރާ ކުރި ޕޯސްޓުގައި، ކަރީނާއަށް ވަރަށް ބޮޑަށް ތައުރީފުކޮށް ބުނެފައިވަނީ، އަންހެނުން ބޭނުންވަނީ އެމީހުންގެ އަމިއްލަ ގޮތުގައި ދެމިތިބުމަށް ކަމަށެވެ. އަދި ކަރީނާގެ ފަރާތުން ލިބުނު މެހުމާންދާރީއަށް އޭނާ ވަނީ ޝުކުރު އަދާކޮށްފައެވެ. މީގެ ރައްދުގައި ކަރީނާވެސް ވަނީ މީރާ އެ ޝޯއަށް އައުމުން ވަރަށް އުފާވިކަމަށް ބުނެ ކޮމެންޓްކޮށް، ދެމީހުންގެ މެދުގައި އޮތް ގާތްކަން ހާމަކޮށްދީފައެވެ.