ރ. އަނގޮޅިތީމުގައި 72 އަހަރުގެ ދިވެހި އަންހެނަކު ނަމާދަށް ހުއްޓާ، މަރައިލާނެކަމުގެ އިންޒާރުދީ ޖިންސީ ގޯނާކުރި މައްސަލައިގައި ހައްޔަރުކުރި މީހާ 15 ދުވަހަށް ބަންދުކޮށްފިއެވެ.
ފުލުހުން މިއަދު ބުނީ، އަނގޮޅިތީމުގައި ދޮށީ އުމުރުގެ އަންހެނަކަށް ޖިންސީ ގޯނާކުރި ކަމުގެ މައްސަލައެއް ފުލުހުންނަށް ހުށަހެޅީ ރޭ 8:30 ހާއިރު ކަމަށެވެ.
މި ހާދިސާގައި އަނިޔާ ލިބުނު އަންހެން މީހާއަށް ފަރުވާދިނުމަށް ފަހު ދޫކޮށްލާފައިވާ ކަމަށް ވެސް އަނގޮޅިތީމުގެ ސިއްހީ މަރުކަޒާ ހަވާލާދީ ފުލުހުން ބުނެފައިވެއެވެ.
މި މައްސަލައިގައި ރޭ ގާތްގަނޑަކަށް 10 ޖަހަނިކޮށް ކޯޓު އަމުރެއްގެ ދަށުން ހައްޔަރުކުރީ 44 އަހަރުގެ ދިވެހި ފިރިހެނެކެވެ.
ފުލުހުން މިރޭ ބުނީ އެ މީހާގެ ބަންދަށް 15 ދުވަސް ކޯޓުން ޖަހައިފައިވާ ކަމަށެވެ.
މައުލޫމާތު ލިބިފައިވާ ގޮތުގައި އެ އަންހެން މީހާއަށް ޖިންސީ ގޯނާކޮށްފައިވަނީ އޭނާ ދިރިއުޅޭ ގޭގެ ކޮޓަރީގައި ރޭ އިޝާ ނަމާދަށް ހުއްޓައެވެ.
މި މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލައި، އިތުރަށް ތަހުގީގު ކުރަމުން އަންނަ ކަމަށް ފުލުހުން ބުނެފައިވެއެވެ.