މިއަހަރުގެ ފެޝަން ހަރަކާތްތަކުން ޚާއްޞަ ސަމާލުކަމެއް ހޯދަމުން އަންނަ ބޮލީވުޑްގެ މަޝްހޫރު ބަތަލާ އައިޝްވާރިޔާ ރާއީ ބައްޗަން، ޕެރިސް ފެޝަން ވީކްގެ ރަންވޭމަތިން އާންމުންގެ ސަމާލުކަން އަތުލައިގަނެފިއެވެ. މިދިޔަ ހޯމަ ދުވަހުގެ ރޭ ބޭއްވި މި ހަރަކާތުގައި އައިޝްވާރްޔާ ފެނިގެންދިޔައީ ކަޅު ކުލައިގެ ވެލްވެޓް ހެދުމަކާއި ޖަވާހިރު ޖަހާފައިވާ ރީތި ތާޖެއްގައެވެ.
ފިލްމު 'ދޭވްދާސް'އިން ބޮޑު މަގުބޫލުކަމެއް ހޯދި އައިޝްވާރިޔާ ރަންވޭގައި ހިނގާލާފައިވަނީ ކޯސެޓް ޑިޒައިންގެ ކަޅު ކުލައިގެ ވެލްވެޓް ފިޝްޓޭލް ހެދުމެއްގައެވެ. މި ހެދުމާއެކު އޭނާ އަޅައިގެން ހުރީ ކްރިސްޓަލް ބަބުޅާ ކޭޕެކެވެ. މީގެއިތުރުން، ބޮލުގައި އަޅާފައިވާ ވިދާ ތާޖާއި، ސިގްނޭޗަރު ރަތް ކުލައިގެ ލިޕްސްޓިކާއެކު އޭނާގެ ފުރިހަމަކަން އިތުރަށް ފުރިހަމަކޮށްދިނެވެ. މި ހަރަކާތުގެ ތަސްވީރުތަކާއި ވީޑިއޯތައް ސޯޝަލް މީޑިއާގައި އާންމުވުމާއެކު، އައިޝްވާރިޔާގެ ސިފައަށް ގިނަ ބައެއްގެ ތައުރީފު ވަނީ ލިބިގެންގޮސްފައެވެ.
ލޮރިއާލް ޕެރިސް ފެޝަން ޝޯގެ ނުވަ ވަނަ އެޑިޝަންގެ ބައިވެރިންނާ އެކު އައިޝްވާރްޔާ ރަންވޭގައި--ފޮޓޯ/އިންސްޓަގްރާމްލޮރިއާލް ޕެރިސް ފެޝަން ޝޯގެ ނުވަ ވަނަ އެޑިޝަންގައި ބައިނަލްއަޤުވާމީ ގޮތުން ފާހަގަކޮށްލެވޭ ގިނަ އެމްބެސަޑަރުންނާއި މަޝްހޫރު ޝަޚުޞިއްޔަތުތަކެއް ބައިވެރިވިއެވެ. އޭގެ ތެރޭގައި އައިޝްވާރިޔާގެ އިތުރުން ސިމޯން އެޝްލީ، މޭރީ ބޮޝޭ، ވިއޯލާ ޑޭވިސް، ކާރާ ޑެލެވިންޔާ، ޖޭން ފޮންޑާ، ބެބޭ ވިއޯ ގްރާންޑިސް، ލޫމާ ގްރޯތޭ، ކެންޑަލް ޖެނާ، އަޖާ ނިއޯމީ ކިންގް، އެވާ ލޮންގޯރިއާ އަދި އެންޑީ މެކްޑަވަލް ހިމެނެއެވެ.
އައިޝްވާރްޔާ އެންމެފަހުން ބެލުންތެރިންނަށް ފެނިފައިވަނީ މަނީ ރަތުނަމްގެ ތާރީޚީ ފިލްމު 'ޕޮންނިޔިން ސެލްވަން'ގެ ދެބައިންނެވެ.