ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ރިޝްވަތުގެ ގޮތުގައި ކުރީގެ ރައީސް އަބްދުﷲ ޔާމީންގެ އެކައުންޓަށް ޖަމާވި ކަމަށް ދައުލަތުން ތުހުމަތުކުރާ އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާކަން ސާބިތުކުރަން އެމަނިކުފާނުގެ ފަރާތްޕުޅުން ހުށަހެޅުއްވި ދިފާއީ ހެކިތައް ޝަރީއަތަށް ބަލައިނުގަތުމަށް ދައުލަތުން ކްރިމިނަލް ކޯޓުގައި މިއަދު އެދިއްޖެއެވެ.
ޔާމީނާއި ކުރީގެ މަޖިލިސް މެންބަރު ޔޫސުފް ނައީމްގެ މައްޗަށް ދައުވާކޮށްގެން ކުރިއަށްދާ މި ޝަރީއަތުގައި ޔާމީންގެ ފަރާތްޕުޅުން ހުށަހެޅުއްވި ދިފާއީ ހެކިންގެ ތެރޭގައި ހިމެނެނީ:
- އަހުމަދު ނަރީޝް (މާލޭގެ ކުރީގެ ޑެޕިއުޓީ މޭޔަރު / ޔޫތު މިނިސްޓަރުގެ އެޑްވައިޒަރު)
- އަބްދުﷲ ރަޝީދު
- މުހައްމަދު އިސްމާއީލް (ވިލިމާލެ ދާއިރާގެ މަޖިލިސް މެންބަރު)
- މުހައްމަދު ޝާހިދު (ހުޅުދޫ ދާއިރާގެ މަޖިލިސް މެންބަރު)
- ޑޮލަރު މާރުކުރިކަން ބަޔާންކޮށްދޭ ލިޔުން
- ދައުލަތުގެ ހުއްޖަތް
މިއަދުގެ އަޑުއެހުމުގައި ޕްރޮސެކިއުޓަ ޖެނެރަލް (ޕީޖީ) ގެ ވަކީލު އަހުމަދު ޝަފީއު ވިދާޅުވީ، ތަހުގީގު މަރުހަލާގައި ޔާމީން ހަނުހުރުމުގެ ހައްގު ބޭނުންކުރެއްވުމަށްފަހު، އޭރު ހާމަނުކުރާ ހެކިންތަކެއް ޝަރީއަތަށް ބަލައިނުގަނެވޭނެ ކަމަށެވެ. ޖިނާއީ އިޖުރާއަތުގެ ގާނޫނުގެ 47 ވަނަ މާއްދާއާ ހަވާލާދެއްވައި ވަކީލު ފާހަގަކުރެއްވީ، ތުހުމަތުކުރެވޭ މީހާ ދޭ މައުލޫމާތަކީ އޭނާއާ ދެކޮޅަށް ހެކީގެ ގޮތުގައި ބޭނުންނުކުރެވޭ މައުލޫމާތެއް ނަމަ، އެ މައުލޫމާތެއް ތަހުގީގަށް ހާމަކުރަންޖެހޭނެ ކަމަށެވެ. އަދި ތަހުގީގުގައި މައުލޫމާތު ނުދީ ހަނު ހުންނެވި ސަބަބު ވިދާޅުވެދެވެންޖެހޭނެ ކަމަށްވެސް ދައުލަތުން ބުންޏެވެ.
ދައުލަތުގެ ވާހަކަތަކަށް ރައްދު ދެއްވަމުން ޔާމީން ވިދާޅުވީ، ތަހުގީގު މަރުހަލާގައި ހަނު ހުންނެވީ ފުލުހުން ދެއްކި ލިޔުމަކީ ބޭންކެއްގެ ލިޔުމަކަށްވެފައި، އެއީ ސައްހަ ލިޔުމެއް ކަމަށް ނުބެލެވޭތީ ކަމަށެވެ. އަދި އެ ލިޔުމާ ގުޅޭގޮތުން ވާހަކަދައްކަވާނީ ޝަރީއަތުގައި ކަމަށް އޭރު ނިންމެވީ ކަމަށްވެސް އެ މަނިކުފާނު މިއަދުގެ އަޑުއެހުމުގައި ވިދާޅުވިއެވެ.
ޔާމީންގެ ޝަރީއަތްތައް މިއަދު އަލުން ފަށާފައިވަނީ ކްރިމިނަލް ކޯޓުގައި އަޑު އެހުމެއް ނުބާއްވާތާ ގާތްގަނޑަކަށް އަހަރެއްހާ ދުވަސް ފަހުންނެވެ.