ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ ރިޒާވްގައި ހުރި 6 ބިލިއަން ޑޮލަރުގެ ބޮޑު ކޭޝް ފަންޑުން މެންބަރު ގައުމުތަކަށް ބަހާ ފައިސާގެ އަދަދު އިތުރުކުރަން ތާއީދުކުރައްވާނެކަމުގެ އިޝާރާތެއް ފީފާގެ ރައީސް ޖިއާނީ އިންފަންޓީނޯ ދެއްވައިފިއެވެ.
ފީފާގެ ދަށުން ހިންގާ ބައްރުތަކުގެ ހަ ކޮންފެޑެރޭޝަނަށް ފޮނުއްވި ރަސްމީ ސިޓީއެއްގައި އިންފަންޓީނޯ ވިދާޅުވީ، ފީފާގެ ހިންގުމުގެ ހަރުދަނާ އުސޫލުތަކުގެ ތެރެއިން ދެވެން އޮތް އެންމެ ގިނަ ފައިސާއެއް މެންބަރު ގައުމުތަކަށް ދިނުމަށް އޭނާ އެއްބާރުލުން ދެއްވާނެ ކަމަށެވެ. ނަމަވެސް، މި ސިޓީގައި ދޭނެ ސީދާ އަދަދެއް ހާމަކުރައްވަން އޭނާ ވަނީ ދެކޮޅު ހައްދަވާފައެވެ.
އިންފަންޓީނޯ ވިދާޅުވީ ވަކި އަދަދެއް ކަނޑައަޅައިގެން މަޝްވަރާތައް ފެށި ނަމަވެސް، މުޅި ދުނިޔެއަށް ހިންގާނެ ސިޔާސަތެއް ނިންމޭނީ ހުރިހާ ފަރާތްތަކެއްގެ ޚިޔާލާއެކު ކަމަށެވެ.
މި ނިންމުން އައިސްފައިވަނީ ޔޫރަޕްގެ ފުޓްބޯޅަ އިދާރާ (ޔުއެފާ) ގެ ރައީސް އަލެކްސަންޑަ ސެފެރިން އަދި ކޮންކާކާފްގެ ރައީސް ވިކްޓާ މޮންޓަގްލިއާނީ އިސްވެ، ފީފާއަށް ބޮޑު ޕްރެޝަރެއް ކުރިމަތިކުރުވާފައިވާ ދަނޑިވަޅެއްގައެވެ. އެ ބޭފުޅުން ހުށަހަޅުއްވާފައިވަނީ ފީފާގެ ރިޒާވުން 2.1 ބިލިއަން ޑޮލަރު އެއްފަހަރާ ދޫކޮށް، ކުރިއަށްއޮތް 2027 އިން 2030 ގެ ސައިކަލްގެ ތެރޭގައި ފީފާގެ ކޮންމެ މެންބަރު އެސޯސިއޭޝަނަކަށް 10 މިލިއަން ޑޮލަރު ދިނުމަށެވެ.
މި ބޮޑު ޑިމާންޑާ ކުރިމަތިލާން ޖެހުމުން، އިންފަންޓީނޯއަށް ވަނީ މެންބަރު ގައުމުތަކުގެ ތާއީދު ހޯއްދެވުމަށްޓަކައި ރިޒާވް ފައިސާ ދޫކުރަން އެއްބަސްވާން މަޖުބޫރުވެފައެވެ.
މީގެ އިތުރުން، މެންބަރު ގައުމުތަކަށް ގިނަ ފައިސާ ދޭން އިންފަންޓީނޯ ދެން މި ފެއްޓެވީ، އޭނާ ކުރިން ރޭއްވެވި "ފީފާ ފޯވާޑް އެންޓަޕްރައިޒް ޕްލޭން ފެއިލްވެ، ދުނިޔޭގެ ފުޓްބޯޅަ ކޮމިއުނިޓީގެ ބޮޑު ފާޑުކިޔުމެއް އަމާޒުވުމާ ގުޅިގެންނެވެ. އެ ޕްލޭންގެ ދަށުން ވޯލްޑް ކަޕްގެ ވިޔަފާރީގެ ޙައްޤުތަކުން 20 އިންސައްތަ ޕްރައިވެޓް އިންވެސްޓަރުންނަށް ވިއްކާލައިގެން، ކޮންމެ ގައުމަކަށް 20 މިލިއަން ޑޮލަރު ދޭން އިންފަންޓީނޯ އުޅުއްވުމުން، ގިނަ ބަޔަކު ވަނީ އޭނާގެ އިސްތިއުފާއަށްވެސް ގޮވާލާފައެވެ.
އެހެންކަމުން، މިހާރު ހުށަހެޅިފައިވާ އެކި ފަންޑިންގް މޮޑެލްތައް ދިރާސާކޮށް، އެއް ރިޕޯޓެއް ތައްޔާރުކުރަން ފީފާގެ ސެކްރެޓަރީ ޖެނެރަލް މަޓިއަސް ގްރާފްސްޓްރޮމްއަށް މިހާރު ވަނީ އަންގަވާފައެވެ. މި މައްސަލައިގައި އެންމެ ފަހުގެ ގޮތެއް ނިންމުން އޮންނާނީ 15 އޮކްޓޫބަރު 2026 ގައި ބާއްވާ ފީފާ ކައުންސިލްގެ ރަސްމީ ބައްދަލުވުމުގައެވެ.
މިކަން ހާމަކޮށްފައިވަނީ ކުރިއަށްއޮތް 2027 ވަނަ އަހަރުގެ މާރިޗު މަހު ބޭއްވުމަށް ހަމަޖެހިފައިވާ ފީފާގެ ރައީސް ހޮވުމުގެ އިންތިޚާބާ ދިމާކޮށެވެ. އިންތިޚާބުގައި އިންފަންޓީނޯއާ ވާދަކުރަން ބޭނުންވާ ކެންޑިޑޭޓުންނަށް ނަން ހުށަހެޅުމުގެ ސުންގަޑިއަކީ 18 ނޮވެމްބަރު 2026 ކަމަށްވުމާއެކު، މެންބަރު ގައުމުތަކަށް ގިނަ ފައިސާ ދިނުމުގެ މި ވައުދަކީ ވޯޓު ހޯދުމުގެ ސިޔާސީ އުކުޅެއްގެ ގޮތުގައި ގިނަ ފަރާތްތަކުން ސިފަކުރެއެވެ.