އޯޕެކް ފަންޑް ފޯ އިންޓަނޭޝަނަލް ޑިވެލޮޕްމަންޓުން ކުއްލި އެހީގެ ކްރެޑިޓް ފެސިލިޓީއެއް ގާއިމުކުރުމާ ގުޅޭގޮތުން ދިވެހިރާއްޖެއިން އެ ފަންޑާއެކު މަޝްވަރާކޮށްފިއެވެ.
މި މަޝްވަރާތައް ކުރިއަށް ގެންދެވީ، ގަތަރުގެ ދޯހާގައި މިހާރު ކުރިއަށްދާ އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގެ ހަވާސާގައި، މާލީ އަދި އާންމު ވިޔަފާރިތަކާ ބެހޭ ވަޒީރު ހަސަން ޒަރީރު ބޭއްވެވި ބައްދަލުވުންތަކުގައެވެ.
އޯޕެކް ފަންޑުގެ ރައީސް ޑރ. އަބްދުލްހަމީދު އަލްހަލީފާއާ އެކު ވަޒީރު ޒަރީރު ބޭއްވެވި ބައްދަލުކުރެއްވުމުގައި، މިއަހަރުގެ ޖެނުއަރީ މަހު ދެ ފަރާތުގެ ދެމެދުގައި ސޮއިކޮށްފައިވާ ކަންޓްރީ ޕާޓްނާޝިޕް ފްރޭމްވޯކްގެ ދަށުން ގުޅުން ބަދަހިކުރެވިދާނެ ދާއިރާތަކާ ގުޅޭގޮތުން ވަނީ ވާހަކަދައްކަވައިފައެވެ.
ފިނޭންސް މިނިސްޓްރީން ބުނި ގޮތުގައި، ކުރިއަށް އޮތް ތަނުގައި އެއްބާރުލުން ދިނުމަށް ހަމަޖެހިފައިވަނީ ފެނާއި ނަރުދަމާގެ އިތުރުން ބަނދަރު ތަރައްގީކުރުން ފަދަ މުހިންމު ދާއިރާތަކަށެވެ. މީގެ އިތުރުން، ކުއްލި ހާލަތްތަކުގައި ބޭނުންކުރެވޭނެ ކްރެޑިޓް ލައިނެއް ގާއިމުކުރުމުގެ މުހިންމުކަން ރާއްޖެއިން ވަނީ ފާހަގަކޮށްފައެވެ.
މާލީ ވަޒީރު ގަތަރަށް ކުރައްވަމުން ގެންދަވާ ދަތުރުފުޅުގެ ތެރެއިން މާލީ އިދާރާތަކުގެ އިސްވެރިންނާ ބައްދަލު ކުރެއްވުން-- ފޮޓޯ: ފިނޭންސް މިނިސްޓްރީއޯޕެކް ފަންޑުން ޖެނުއަރީ މަހު ބުނެފައިވާ ގޮތުގައި، 1977 ވަނަ އަހަރުން ފެށިގެން އެ ފަންޑުން ވަނީ ރާއްޖޭގެ ތަރައްގީގެ އެކި މަޝްރޫއުތަކަށް 440 މިލިއަނަށް ވުރެ ގިނަ ޑޮލަރު ފޯރުކޮށްދީފައެވެ.
މި ދަތުރުފުޅުގައި ވަޒީރު ޒަރީރު ވަނީ ގަތަރު ނޭޝަނަލް ބޭންކް (ކިއުއެންބީ) ގެ ގްރޫޕް ޗީފް އެގްޒެކެޓިވް އޮފިސަރު އަބްދުﷲ މުބާރަކް އަލްހަލީފާއާ ވެސް ބައްދަލުކުރައްވައިފައެވެ. މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރެއްވީ މާލީ ގުޅުން ބަދަހިކުރުމާއި އިންވެސްޓްމަންޓްތަކާ ގުޅޭގޮތުންނެވެ. ކިއުއެންބީއަކީ މެދުއިރުމައްޗާއި އެފްރިކާ ބައްރުގެ އެންމެ ބޮޑު މާލީ އިދާރާ ކަމަށް އެ ބޭންކުން ބުނެއެވެ.
މީގެ އިތުރުން، ކުވައިތުގެ މާލީ ވަޒީރު ޑރ. ޔައުގޫބް އައްސައްޔިދު އައްރިފާއީއާ ބައްދަލުކުރައްވައި، ސިއްހީ ދާއިރާއާއި ރަށްގިރުމުގެ މައްސަލަތައް ހައްލުކުރުމަށް ކުރިއަށްދާ މަޝްރޫއުތަކާ ގުޅޭގޮތުން ވަޒީރު ޒަރީރު ވަނީ މަޝްވަރާކުރައްވައިފައެވެ. އަދި ކުވައިތު ފަންޑް ފޯ އެރަބް އިކޮނޮމިކް ޑިވެލޮޕްމަންޓް މެދުވެރިކޮށް އިތުރު އެހީތެރިކަން ހޯދުމާ ގުޅޭގޮތުން ވެސް ވާހަކަދެއްކެވިއެވެ.
ރާއްޖޭގެ އުމްރާނީ ތަރައްގީއަށް، ޚާއްސަކޮށް ރަށްގިރުމުން ސަލާމަތްކުރުމަށާއި ފެނާއި ނަރުދަމާގެ މަޝްރޫއުތަކަށް ބޮޑެތި އިންވެސްޓްމަންޓްތަކެއް ބޭނުންވެފައިވާކަން ސަރުކާރުން ވަނީ ފާހަގަކޮށްފައެވެ. ރައީސުލްޖުމްހޫރިއްޔާގެ މި އަހަރުގެ ރިޔާސީ ބަޔާނުގައި ވިދާޅުވެފައިވާ ގޮތުގައި، ގޮނޑުދޮށް ހިމާޔަތްކުރުމުގެ 62 މަޝްރޫއެއް އެކި މަރުހަލާތަކުގައި މިހާރު ވެސް ދަނީ ހިނގަމުންނެވެ. ސަރުކާރުގެ ޕްރޮކިއުމަންޓް ރެކޯޑުތަކުން ދައްކާ ގޮތުގައި، މިއަހަރުގެ ތެރޭގައި މ. މަޑިފުށި، ނ. ކުޑަފަރި، ފ. ނިލަންދޫ އަދި ހއ. އުތީމުގައި ވެސް ގޮނޑުދޮށް ހިމާޔަތްކުރުމާއި ބަނދަރު ހެދުމުގެ މަސައްކަތްތައް ދަނީ ކުރިއަށެވެ.
އިއްޔެ އާއި މިއަދު، "މާދަމާގެ އުމްރާނީ ތަރައްގީ: ނަތީޖާއާއި އީޖާދު" މި ޝިއާރުގެ ދަށުން ކުރިއަށްދާ އޭއައިއައިބީގެ 11 ވަނަ އަހަރީ ބައްދަލުވުމުގެ ގަވަރުނަރުންގެ ބިޒްނަސް ރައުންޑްޓޭބަލްގައި ވާހަކަދައްކަވަމުން ވަޒީރު ޒަރީރު ވަނީ، އުމްރާނީ ތަރައްގީގެ މަޝްރޫއުތައް ހިންގުމުގައި އީޖާދީ އަދި ދެމެހެއްޓެނިވި ގޮތްތަކެއް ބޭނުންވާކަން ފާހަގަކުރައްވައިފައެވެ.
އޭއައިއައިބީއާ އެކު ރާއްޖެއިން މިހާރު ވެސް ގާތް ގުޅުމެއް ބާއްވަމުން އަންނައިރު، އެ ބޭންކުގެ އެހީގައި މާލެ ސަރަހައްދުގެ ކުނިން ހަކަތަ އުފެއްދުމުގެ މަޝްރޫއަށް 40 މިލިއަން ޑޮލަރު، އަދި އިރުގެ އަލިން ހަކަތަ އުފެއްދުމުގެ މަޝްރޫއަށް 20 މިލިއަން ޑޮލަރު ވަނީ ހަމަޖައްސައިފައެވެ. މީގެ އިތުރުން މާލީ ނިޒާމު ހަރުދަނާކުރުމުގެ ޕްރޮގްރާމަކަށް 15 މިލިއަން ޑޮލަރުގެ ފައިނޭންސް އެ ބޭންކުން ވަނީ ފާސްކޮށްފައެވެ.