ހުޅުމާލެއިން ކަރަންޓު ކެނޑެނީ އިންޖީނުގެ މައްސަލައަކުން ނޫން ކަމަށާއި، ކަރަންޓުގެ ޚިދުމަތް މެދުކެނޑެނީ އިމާރާތްކުރުމުގެ މަސައްކަތްކުރާ ފަރާތްތަކުން ބިންކޮނުމުގެ ތެރޭގައި ހައި ވޯލްޓޭޖް ކޭބަލްތައް ބުރިކުރާތީ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބުނެފިއެވެ.
ހުޅުމާލޭގެ ފުރަތަމަ ފިޔަވަހި އަދި ދެވަނަ ފިޔަވަހިން ތަކުރާރުކޮށް ކަރަންޓު ކެނޑޭ މައްސަލައިގައި އާންމުންގެ ބޮޑެތި ކަންބޮޑުވުންތަކެއް ހުރިއިރު، ސްޓެލްކޯއިން "ސަން" އަށް މައުލޫމާތު ދެމުން ބުނީ އެ މައްސަލަ ހައްލުކުރުމަށް އޮތް އެންމެ ބޮޑު ގޮންޖެހުމަކީ ކޮންސްޓްރަކްޝަން މަސައްކަތްތަކުގައި ބިންކޮނުމުގެ ތެރޭގައި ކޭބަލްތަކަށް ގެއްލުންވުން ކަމަށެވެ.
އެގޮތުން، ކަރަންޓު ކެނޑޭ މައްސަލަ ހައްލުކުރެވޭނީ އިމާރާތްކުރުމާއި މަގުތައް ކޮންނަ މީހުން ބިމުގެ އަޑީގައިވާ ކޭބަލްތަކަށް ސަމާލުވެ، ރައްކާތެރިކަމާއެކު މަސައްކަތްކޮށްގެން ކަމަށް އެ ކުންފުނިން ފާހަގަކުރެއެވެ.
"ހުޅުމާލެއިން ކަރަންޓު ކެނޑެނީ އިންޖީނުގެ މައްސަލައެއް ނުވަތަ ޑިސްޓްރިބިއުޝަން ބޮކްސްތަކުގެ މައްސަލައަކުން ނޫން. އެކަން ދިމާވަނީ ކޮންސްޓްރަކްޝަން މަސައްކަތް ކުރާމީހުން ކޭބަލްތައް ބުރިކުރާތީ. އެތައް ފަހަރަކު ވާނެ އެކަން ރަނގަޅުކޮށްލަން އިލްތިމާސްކޮށްފައި. ކަރަންޓުގެ މައްސަލަ ހައްލުކުރެވޭނީ އެކަން ހުއްޓުވިގެން،" ސްޓެލްކޯއިން ބުންޏެވެ.
ސްޓެލްކޯއިން ފާހަގަކުރި ގޮތުގައި ހައިވޯލްޓޭޖް ކޭބަލްތައް ހުންނަ ސަރަހައްދުތަކުގައި ސްޓެލްކޯގެ ޓެކްނިކަލް އޮފިޝަލުންގެ ބެލުމުގެ ދަށުން މަސައްކަތް ނުކުރުމަކީވެސް މައިގަނޑު އެއް ސަބަބުކަމަށް ސްޓެލޯއިން ފާހަގަކުރެއެވެ.
https://x.com/STELCOMALDIVES/status/2104620612039971242
މިފަދަ އިހުމާލުތަކުގެ ސަބަބުން ކުއްލިއަކަށް މުޅި ސަރަހައްދުން ކަރަންޓު ކެނޑުމުގެ އިތުރުން، އުފެދޭ ވޯލްޓޭޖް ފްލަކްޗުއޭޝަންތަކުގެ ސަބަބުން ގޭބިސީތަކުގައި ހުންނަ އޭސީ، އައިސްއަލަމާރި އަދި ޓީވީ ފަދަ އަގުބޮޑު އިލެކްޓްރޯނިކް ސާމާނު ހަލާކުވެއެވެ.
މީގެއިތުރުން، ހައިވޯލްޓޭޖް ކޭބަލްތަކުގައި އެކްސްކަވޭޓަރު ފަދަ ތަކެތި ޖެހުމަކީ މަސައްކަތްކުރާ މީހުންނަށް އިލެކްޓްރިކް ޝޮކް ލިބި ފުރާނައަށް ވެސް ނުރައްކާވެދާނެ ކަމެކެވެ.
މިފަދަ މައްސަލަތައް ހުއްޓުވުމަށްޓަކައި، އިހުމާލުން ކޭބަލް ބުރިކުރާ ކޮންސްޓްރަކްޝަން ކުންފުނިތަކުން މަރާމާތުގެ ހުރިހާ ޚަރަދެއް ދައްކަންޖެހޭނެ ކަމަށާއި ހުއްދައާ ޚިލާފަށް މަސައްކަތްކުރާ ފަރާތްތަކާމެދު ފިޔަވަޅު އަޅައި ޖޫރިމަނާކުރާނެ ކަމަށް ވަނީ ހާމަކޮށްފައެވެ.
އެހެންކަމުން، ކޮންޓްރެކްޓަރުން ކޮނުމުގެ ކުރިން ހުއްދަތައް ފުރިހަމަކުރުމަށާއި، އާންމު ރައްޔިތުން ވެސް މިފަދަ ނުރައްކާތެރި ހާދިސާއެއް ފެނިއްޖެނަމަ ސްޓެލްކޯގެ ހޮޓްލައިން 1545 އަށް ގުޅައި ރިޕޯޓުކުރުމަށް ވަނީ އިލްތިމާސްކޮށްފައެވެ.
ފާއިތުވި އަހަރުތަކުގައި މާލެއާއި ހުޅުމާލޭން ކަރަންޓު ކެނޑުމުގެ މައްސަލަތައް ވަނީ ބޮޑުވެފައެވެ. އެގޮތުން ހުރިހާ ސަރަހައްދަކުން ކަރަންޓު ކެނޑި 'ބްލެކްއައުޓް'އަކަށް ދިޔުމާއި، ހުޅުމާލެ ދެވަނަ ފިޔަވަހީގައި ގިނަ ބަޔަކު ދިރިއުޅޭ ޓަވަރުތަކުން ކަރަންޓު ކެނޑި ގިނައިރު ވުމުގެ މައްސަލަތައް ހިމެނެއެވެ.
ސްޓެލްކޯއިން އަންނަނީ، މާލެ ސަރަހައްދުގައި ކަރަންޓުގެ ޑިމާންޑް ބޮޑުވަމުން އަންނަ މިންވަރާ އެއްވަރަށް ކަރަންޓު ފޯރުކޮށްދިނުމަށް މަސައްކަތް ކުރަމުން އަންނަ ކަމަށް ބުނަމުންނެވެ.