އިންޑިއާގެ ސިނަމާގެ ތާރީޚުގެ އެންމެ މަޤުބޫލު އެއް ފަންނާނު ކަމަށްވާ މިތުން ޗަކްރަބޯތީ، ފިލްމީ ދާއިރާއިން ރަސްމީކޮށް ޖާގަ ހޯދުމުގެ ކުރިން މަގުމަތީގައި ނިދައި، ދުވަހުގެ ކޮއްތު ހޯދުމަށް އެކި ކަހަލަ ޙަފްލާތަކުގައި ނަށައިދީ ހަދާފައިވާކަން ހާމަކޮށްފިއެވެ.
މިތުން މި ހަނދާންތައް އާކޮށްފައިވަނީ މަޝްހޫރު ފިލްމީ އުފެއްދުންތެރިޔާ ފަރާ ޚާންގެ ޔޫޓިއުބް ވްލޮގްގައި ބައިވެރިވެ ދެއްކި ވާހަކަތަކުގައެވެ. މީގެ އަހަރުތަކެއް ކުރިންސުރެ މިތުން ދަންނަ ފަރާ ޚާން ކިޔައިދިން ގޮތުގައި، އޭނާގެ ބޮޑުބޭބެ އަދި ސްކްރީންރައިޓަރު ކޭކޭ ޝުކްލާ ބާއްވާ ޙަފްލާތަކަށް މިތުން އަންނަނީ ރޭގަނޑުގެ ކޭންބުއިން ހަމަޖައްސާލުމުގެ ބޭނުމުގައެވެ.
"އަހަރެންގެ ބޮޑުބޭބެ ކޭކޭ ޝުކްލާ، އަމީތާބު ބައްޗަންގެ ފިލްމުތަކަށް ސްކްރިޕްޓް ލިޔުނު ދުވަސްވަރު، މިތުން އަހަރެންގެ ބޮޑުބޭބެގެ ހަފްލާތަކަށް އައިސް ނަށައިދެނީ ހަމައެކަނި ރޭގަނޑު ކާނެ އެއްޗެއް ހޯދުމުގެ ނިޔަތުގައި،" ފަރާ ޚާން ބުންޏެވެ.
އިންޑިއާގެ 70 ވަނަ ނެޝަނަލް އެވޯޑު ހަފްލާގައި، 'ލައިފްޓައިމް އެޗީވްމަންޓް' އެވޯޑާ މިތުން ހަވާލުވަނީ--ފޮޓޯ/މިޑްޑޭ ފަރާ އިތުރަށް ފާހަގަކުރި ގޮތުގައި، މިތުންއަކީ ވަރަށް މޮޅަށް ނަށާ މީހަކަށްވާތީ ގިނަ ބަޔަކު އޭނާއަށް ޙަފްލާތަކަށް ދަޢުވަތު ދެއެވެ. އަދި އޭނާ އެއްވެސް ފައިސާއެއް ނުނަގައި، ހަމައެކަނި ކެއުމެއްގެ ބަދަލުގައި އެ ހަފްލާތަކުގައި ފެންވަރުހުރި ހުނަރު ދައްކައިދެއެވެ.
"އާންމުކޮށް މީހުން ތަޙައްމަލުކުރާ އުނދަގޫތަކަށް 'ސްޓްރަގްލް'އޭ ކިޔައި އުޅުނަސް، ޙަޤީޤީ އިމްތިޙާނަކީ އަދި ތަހައްމަލުކުރުމަކީ މިއީ،" ފަރާ އިތުރަށް ބުންޏެވެ.
މި ވާހަކަތަކާ ގުޅިގެން، މިތުން ބުނީ، އޭނާ ތަޙައްމަލުކުރި ކަންކަމަކީ އާންމު އުނދަގޫތަކަށްވުރެ މާ ފުން، ހިތްދަތި ތަޖުރިބާތަކެއް ކަމަށެވެ.
"މިއީ ހަމައެކަނި އުނދަގޫތަކެކޭ ބުނެ ނިންމާލެވޭނެ ކަމެއް ނޫން. އަހަރެން ވަނީ މަގުމަތީގައާއި ޕޭވްމަންޓްތަކުގައި ނިދާފައި. ހިނގާހިނގާ ވަރުބަލިވެގެން ގޮސް މަގުމައްޗަށް ވެއްޓި ނިދޭ ފަހަރުވެސް ދިޔަ" ދިރިއުޅުމުގެ އެންމެ ދަތި އުނދަގޫ ދުވަސްވަރުގެ ހަނދާންތައް އާކުރަމުން މިތުން ކިޔައިދިނެވެ.
މިތުން ފިލްމީ ދާއިރާއަށް އަލަށް ތަޢާރަފްވީ 1976 ވަނަ އަހަރު މްރިނާލް ސެންގެ ފިލްމު 'މްރިގަޔާ'އިންނެވެ. މި ފިލްމުގައި އޭނާ ދެއްކި މޮޅު އެކްޓިންގް ހުނަރާ އެކު އެންމެ މޮޅު އެކްޓަރުގެ ނޭޝަނަލް ފިލްމު އެވޯޑު އޭނާއަށް ލިބުނެވެ.
އޭނާގެ މަޤުބޫލުކަން މުޅި އިންޑިއާއަށް ފެތުރިގެންދިޔައީ 1979 ވަނަ އަހަރު ނުކުތް ޖާސޫސީ ތުރިލާ 'ސުރަކްޝާ'އިންނެވެ. އޭގެ ފަހުން 'ޑިސްކޯ ޑާންސަ'، 'ޑާންސް ޑާންސް'، 'ޕިޔާރު ޖުކްތާ ނަހީން'، 'ކަސަމް ޕައިދާ ކުރާނޭ ވާލޭ ކީ' އަދި 'ކޮމާންޑޯ' ފަދަ އިންގިލާބީ ފިލްމުތަކުން އޭނާ ވަނީ ބޮލީވުޑްގެ އެންމެ އުހަށް ވާސިލުވެފައެވެ.
ޚާއްޞަކޮށް 1980ގެ އަހަރުތަކަކީ މިތުންގެ ފިލްމީ ޙަޔާތުގައި އެންމެ ކާމިޔާބު ދުވަސްވަރެވެ. އެގޮތުން 100 އަށްވުރެ ގިނަ ފިލްމުގައި މަސައްކަތްކޮށްފައިވާއިރު، އެއްފަހަރާ ގިނަ ފިލްމުތަކެއްގެ މަސައްކަތް 80އިގެ އަހަރުތަކުގައި މިތުން ކުރިއެވެ. ހިންދީ ފިލްމުތަކުގެ އިތުރުން ބެންގާލީ ސިނަމާގައިވެސް މިތުން ވަނީ ބޮޑެތި ކާމިޔާބީތަކެއް ހޯދާފައެވެ.
މިތުން، އޭނާގެ ދަރިފުޅު މަހާކްޝޭ ޗަކްރަބަތީ އަދި ސައުތު ސިނަމާގެ އެކްޓަރު ރަޖިނީކާންތާ އެކު--ފޮޓޯ/މިޑްޑޭވޭތުވެދިޔަ ފަންސާހަކަށް އަހަރުގެ ތެރޭގައި މިތުން ވަނީ ހިންދީ އާއި ބެންގާލީގެ އިތުރުން ބޯޖްޕުރީ، ތެލުގޫ، އޮޑިއާ، ތަމިލް، ކަންނަޑާ އަދި ޕަންޖާބީ ހިމެނޭހެން އިންޑިއާގެ ގިނަ ބަހުރުވަތަކެއްގެ ފިލްމުތަކުގައި މަސައްކަތްކޮށްފައެވެ.
ޢުމުރުން 76 އަހަރުގެ މިތުން އަކީ ތިން ފަހަރު ނޭޝަނަލް ފިލްމު އެވޯޑު އަދި ހަތަރު ފަހަރު ފިލްމްފެއާ އެވޯޑު ހޯދާފައިވާ ކުޅަދާނަ ފިލްމީ ތަރިއެކެވެ. އިންޑިއާގެ ސިނަމާއަށް މިތުން ކޮށްދީފައިވާ އަގުހުރި ޚިދުމަތްތަކުގެ އަގުވަޒަންކުރުމުގެ ގޮތުން 2024 ވަނަ އަހަރު އިންޑިއާގެ އެންމެ މަތީ އެއް މަދަނީ ޝަރަފު ކަމަށްވާ 'ޕަދްމަ ބޫޝަން' މިތުންއަށް ވަނީ އަރުވާފައެވެ. މީގެ އިތުރުން އިންޑިއާގެ ސިނަމާގެ އެންމެ ޝަރަފުވެރި 'ދާދާސާހެބް ފާލްކޭ އެވޯޑު' ވެސް އޭނާއަށް ވަނީ އަރުވާފައެވެ.
ފިލްމީ ދާއިރާގެ އިތުރުން، ޓީވީ ޕްރޮގްރާމްތަކުގެ ޖަޖެއްގެ ގޮތުގަ އާއި ހޯސްޓެއްގެ ގޮތުގައިވެސް މިތުން ވަނީ ބެލުންތެރިންގެ ބޮޑު މަޤުބޫލުކަމެއް ހޯދައި، އިންޑިއާގެ މުނިފޫހިފިލުވުމުގެ ދާއިރާގައި ފަނޑުވުމެއްނެތް ތަރިއެއްގެ ގޮތުގައި އޭނާގެ ނަން ފަވައިފައެވެ.
ފިލްމީ ދާއިރާގެ އިތުރުން ސިޔާސީ ދާއިރާގައިވެސް ހަރަކާތްތެރިވަމުން އަންނަ މިތުން އަކީ ޢުމުރުން ދުވަސްވީ ނަމަވެސް، ފިލްމީ މަސައްކަތްތަކުގައި އަދިވެސް ވަރަށް ސާބިތުކަމާއެކު ދެމިހުރި އެކްޓަރެކެވެ. އެގޮތުން ފަހުގެ އަހަރުތަކުގައިވެސް އޭނާ ވަނީ ބޮޑެތި ކާމިޔާބީތަކެއް ހޯދާފައިވާ ފިލްމުތަކުން ފެނިގެންގޮސްފައެވެ.
އޭގެތެރޭގައި 2022 ވަނަ އަހަރު ނުކުތް "ދަ ކަޝްމީރު ފައިލްސް" އާއި ބެންގާލީ ފިލްމު "ޕްރޯޖާޕަތީ" އަދި 2023 ވަނަ އަހަރުގެ "ކާބުލީވާލާ" އަދި މިދިޔަ އަހަރު ރިލީޒްކުރި "ދަ ބެންގާލް ފައިލްސް" ފަދަ ފިލްމުތަކުގައި އޭނާ ދެއްކި މޮޅު އެކްޓިންގްއަށް އާންމުންގެ ބޮޑު ތަރުޙީބެއް ލިބުނެވެ. މިތުން އެންމެފަހުން ބެލުންތެރިންނަށް ފެނިފައި ވަނީ، މި އަހަރުގެ އޮގަސްޓް މަހު ރިލީޒްކުރި ރާޖްކުމާރު ސަންތޯޝީގެ ފިލްމު "ބަޓްވާރާ 1947"ގެ ރޯލަކުންނެވެ. މިތުންގެ ކުރިއަށްހުރި ފިލްމުތަކުގެތެރޭ، ސައުތު ސިނަމާގެ ލެޖެންޑް ރަޖިނީކާންތު ލީޑް ރޯލް ކުޅޭ ފިލްމު "ޖެއިލާ 2" ހިމެނެއެވެ.