އިންޑިއާގެ އެންމެ ބޮޑު ފިލްމު ކުންފުނި ކަމަށްވާ ޔަޝް ރާޖް ފިލްމްސް (ވައިއާރްއެފް)ގެ އިޖުތިމާޢީ އިންސާނީ ޚިދުމަތްތައް ފޯރުކޮށްދޭ ގޮފި ކަމަށްވާ "ޔަޝް ޗޯޕްރާ ފައުންޑޭޝަން" (ވައިސީއެފް)އިން، މަޝްހޫރު ފިލްމީ ޚިދުމަތްތެރިޔާ ޔަޝް ޗޯޕްރާގެ ހަނދާނާއި އުޞޫލުތަކާ އެއްގޮތްވާ ގޮތުގެ މަތިން ހިންގާ ސްކޮލަޝިޕް ޕްރޮގްރާމް އިތުރަށް ފުޅާކޮށްފިއެވެ.
ވައިއާރްއެފްއަށް ފިލްމީ ދާއިރާއިން 50 އަހަރަށްވުރެ ގިނަ ދުވަހު ލިބުނު ބޮޑު ތަރުހީބާއި ލޯބީގެ ބަދަލު ހެޔޮގޮތުގައި ދިނުމުގެ މަޤުޞަދުގައި ކުރިއަށްގެންދާ މި ޕްރޮގްރާމަކީ، ހިންދީ ފިލްމީ ދާއިރާގަ އާއި އެފްޑަބްލިއުއައިސީއީ ޔޫނިއަންގައި ރަޖިސްޓްރީވެފައިވާ މަސައްކަތްތެރިންގެ ކުދިންގެ މަތީ ތައުލީމަށް އެހީތެރިވުމުގެ ގޮތުން ހިންގާ ޕްރޮގްރާމެކެވެ. މި ސްކޮލަޝިޕްގެ ދަށުން ކޮންމެ ދަރިވަރަކަށް ބެކްގްރައުންޑް ތަޢުލީމު ޙާސިލުކުރުމަށް ފައިސާގެ ގޮތުން ފަސް ލައްކަ ރުޕީސްއާ ހަމައަށް އެހީތެރިކަން ފޯރުކޮށްދެވޭނެއެވެ.
މާޒީގައި މި ސްކޮލަޝިޕް މައިގަނޑުކޮށް ޚާއްސަކޮށްފައިވަނީ މީޑިއާ، ފިލްމު އަދި އުފެއްދުންތެރިކަމުގެ ދާއިރާތަކަށް ކަމަށްވީ ނަމަވެސް، މިއަހަރުގެ ޕްރޮގްރާމް ވަނީ ފަންނީ ދާއިރާތަކަށް ފުޅާކޮށްފައެވެ. އޭގެތެރޭގައި ރޮބޯޓިކްސް އަދި އާޓިފިޝަލް އިންޓެލިޖެންސް (އޭއައި)ގެ އިތުރުން އިންޖިނިއަރިން، އައިޓީ، މެނޭޖްމަންޓް، ލޯ އަދި މެޑިކަލް ސައިންސް ހިމެނެއެވެ. ޚާއްޞަކޮށް ރޮބޮޓިކްސް އާއި ޓެކްނޮލޮޖީގެ ދާއިރާތަކުން ކިޔަވާ ދަރިވަރުން މިއަހަރުގެ ސްކޮލަޝިޕަށް ހޮވިފައިވުމީ، ފިލްމީ އަދި އުފެއްދުންތެރިންގެ ސިނާޢަތަށް އަންނަމުންދާ ބަދަލުތަކާއި، ކުރިއަރަމުން އަންނަ ޓެކްނޮލޮޖީގެ ދައުރު ބޮޑުވަމުންދާކަން ރަމްޒުކޮށްދޭ ކަމެކެވެ.
"ޔަޝް ޗޯޕްރާ ފައުންޑޭޝަން"ގެ ސްކޮލަޝިޕް މެދުވެރިކޮށް މަތީ ތަޢުލީމު އުނގެނެމުންދާ ދަރިވަރުންތަކެއް--ފޮޓޯ/ބޮލީވުޑްހަންގާމާތިންސަތޭކަ އަށްވުރެ ގިނަ އުންމީދީ ދަރިވަރުންގެ ތެރެއިން މި އަހަރުގެ ސްކޮލަޝިޕަށް ހޮވާފައިވަނީ އުސޫލުތަކާ އެއްގޮތަށް މެރިޓް އަދި ނީޑް-ބޭސްޑް އުސޫލުން ބަލައި ފާސްކުރެވުނު 11 ދަރިވަރުންނެވެ. މި ދަރިވަރުންނަށް މި އަހަރާއި އަދި އަންނަ އަހަރުގެ އެކަޑެމިކް އަހަރުގެ ކޯސް ފީ ދެއްކުމަށް ފައިސާގެ އެހީތެރިކަން ފޯރުކޮށްދެވޭނެއެވެ.
ޔަޝް ރާޖް ފިލްމްސްގެ ސީއީއޯ އަކްޝޭ ވިދާނީ ބުނީ، ހިންދީ ފިލްމީ ސިނާޢަތް ބިނާވެފައިވަނީ އެކި ފަންތީގައި މަސައްކަތްކުރާ އެންމެހާ ފަރާތްތަކުގެ ބުރަ މަސައްކަތުގެ މައްޗަށް ކަމަށާއި، ވައިސީއެފް ސްކޯލާޝިޕް ޕްރޮގްރާމަކީ އެ ފަރާތްތަކުގެ އާއިލާތަކުގެ މުސްތަޤުބަލަށް އެހީތެރިވުމަށް ކުރެވޭ މުހިންމު މަސައްކަތެއް ކަމަށެވެ.
އަދި މިއަހަރުގެ ދަރިވަރުންގެ އުންމީދުތަކާ އެއްގޮތަށް އެހީތެރިކަން ފުޅާވެގެން ދިއުމަކީ އުފާކުރާ ކަމެއް ކަމަށާއި، މީޑިއާ އާއި މެނޭޖްމަންޓުން ފެށިގެން ރޮބޯޓިކްސް، އޭއައި، އެންޖިނިއަރިން އަދި މެޑިސިން ފަދަ ދާއިރާތަކަށް ދަރިވަރުން ހޮވިގެން ދިއުމުން، ޕްރޮގްރާމް ފެށިއިރަށްވުރެ މިއަދު ފުރުސަތުތައް ފުޅާވެފައިވާކަން ހާމަވާކަމަށް އޭނާ ފާހަގަކުރިއެވެ.
ސިނާއަތަށް އަންނަ ބަދަލުތަކާއެކު، އާއިލާތަކަށް ހުޅުވާލެވޭ ފުރުސަތުތައްވެސް ބަދަލުވާންޖެހޭ ކަމަށާއި، ދަރިވަރުންގެ ތަޢުލީމީ އަދި ކެރިއަރުގެ އުންމީދުތައް ހަޤީޤަތަކަށް ހެދުމުގައި އެހީތެރިވެވޭތީ އުފާކުރާ ކަމަށްވެސް އަކްޝޭ ވިދާނީ ވަނީ ބުނެފައެވެ.
މި އިނިޝިއޭޓިވްގެ މައިގަނޑު މަޤުޞަދަކީ ފިލްމީ ދާއިރާގެ ފަރުދާގެ ފަހަތުގައި މަސައްކަތްކުރާ ކެމެރާގެ އަލިގަދަކުރުމުގައި ޙަރަކާތްތެރިވާ މީހުންނާއި، ލައިޓްމަނުން، ސްޕޮޓް ބޯއިން އަދި ދުވަހު މުސާރައަށް މަސައްކަތްކުރާ މުވައްޒަފުންގެ ކުދިންގެ ތަޢުލީމީ ހުވަފެންތައް ހަޤީޤަތަކަށް ހަދައި، އެ ދަރިވަރުންނަށް ފާގަތި މުސްތަޤުބަލެއް ހޯދައިދިނުމެވެ.