އިންޑިއާގެ އިންކަމް ޓެކްސް (އައިޓީ) ޑިޕާޓްމަންޓުން މުމްބާއީގައި ހުންނަ ބޮލީވުޑްގެ މަޝްހޫރު ފަންނާނުންނާއި އުފެއްދުންތެރިންނާ ގުޅުންހުރި 12 ތަނެއް ކުއްލި ގޮތަކަށް ބަލައިފާސްކުރަން ފަށައިފިއެވެ.
މި އޮޕަރޭޝަން އަމާޒުވެފައިވަނީ މަޝްހޫރު ބަތަލާ ރަކޫލް ޕްރީތު ސިންގް، އޭނާގެ ބަފައިބެ މަޝްހޫރު ޕްރޮޑިއުސަރު ވަޝޫ ބަގްނާނީ، ޑައިރެކްޓަރު އަލީ އަައްބާސް ޒަފަރު، އަދި ޕްރޮޑަކްޝަން ހައުސް 'ޕެނޮރާމާ ސްޓޫޑިއޯސް'އާ ގުޅުންހުރި އޮފީސްތައް ހިންގާ ތަންތަނަށެވެ.
އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި، އިންޑިއާގެ އިންކަމް ޓެކްސް އިދާރާއިން މި ފިޔަވަޅު އަޅާފައިވަނީ ފިލްމު ކުޅުމާއި، ބޭރު ޤައުމުތަކުގައި ފިލްމު ޝޫޓްކުރުމާއި، ބޭރުގެ ޑިސްޓްރިބިއުޝަންގެ އިތުރުން އުފެއްދުމުގެ ޚަރަދުތަކުގެ ނަމުގައި ބޮޑެތި ޢަދަދުތަކުން ފައިސާ ބޭރު ޤައުމުތަކަށް ފޮނުވާފައިވާ ކަމަށް ލިބުނު މަޢުލޫމާތަކާ ގުޅިގެންނެވެ. މި ތަޙުޤީޤު ހިންގާ އޮފިޝަލުން މިހާރު ދަނީ މި މުޢާމަލާތްތަކުގައި ޓެކްސްއަށް މަކަރުހެދުމާއި މާލީ ޤަވާއިދުތަކާ ޚިލާފު ޢަމަލުތަކެއް ހިންގާފައިވޭތޯ ވަރަށް ކައިރިން ބަލަމުންނެވެ.
ރަކުލް، ފިރިމީހާ ޖެކީ ބަގްނާނީއާ އެކު--ފޮޓޯ/ބޮލީވުޑްހަންގާމާއިންކަމް ޓެކްސް ޑިޕާޓްމަންޓުގެ ގިނަ ޓީމުތަކަކުން މުމްބާއީގެ ތަފާތު ސަރަޙައްދުތަކުގައި ހުރި މި ފަރާތްތަކުގެ އޮފީސްތަކާއި އެކި ތަންތަނަށް ވަދެ، މާލީ ލިޔެކިޔުންތަކާއި ހިސާބުތައް ދަނީ ފުރިހަމައަށް ތަޙުޤީޤު ކުރަމުންނެވެ. ނަމަވެސް، މިއީ ހިންގަމުންދާ ތަޙުޤީޤެއްގެ ފެށުން ކަމަށާއި، މިހާތަނަށް އެއްވެސް ފަރާތަކާ ދެކޮޅަށް ރަސްމީ ނިންމުމެއް ނުވަތަ ކުށެއް ސާބިތުވެފައިވާކަން އިއުލާންކޮށްފައި ނުވާކަން ކަމާބެހޭ އިދާރާތަކުން ފާހަގަކުރެއެވެ.
މި ތަޙުޤީޤުގައި ހިމެނޭ ރަކޫލް ޕްރީތު ސިންގަކީ ހިންދީ އަދި ސައުތު އިންޑިއަން ސިނަމާގައި ފާހަގަކޮށްލެވޭ ކާމިޔާބު ބަތަލާއެކެވެ. އޭނާ ބަގްނާނީ އާއިލާއާ ގުޅުނީ 2024 ވަނަ އަހަރު، ވަޝޫ ބަގްނާނީގެ ދަރިފުޅު އަދި އެކްޓަރު/ޕްރޮޑިއުސަރު ޖެކީ ބަގްނާނީއާ ކައިވެނިކުރުމަށްފަހުއެވެ.
ވަޝޫ ބަގްނާނީއަކީ ބޮލީވުޑްގެ މަގުބޫލު ފިލްމުތަކެއް ކަމަށްވާ "ކޫލީ ނަމްބަރު 1"، "ހީރޯ ނަމްބަރު 1"، "ބީވީ ނަމްބަރު 1"، "ރެހެނާ ހައި ތެރޭ ދިލް މޭ" އަދި "ބަޅޭ މިޔާ ޗޯޓޭ މިޔާ" (2024) ފަދަ ތާރީޚީ ފިލްމުތައް އުފައްދާފައިވާ ތަޖުރިބާކާރު ޕްރޮޑިއުސަރެކެވެ. މީގެ އިތުރުން، ޑައިރެކްޓަރު ޢަލީ އަައްބާސް ޒަފަރަކީ "ސުލްތާން"، "ޓައިގާ ޒިންދާ ހޭ"، "ގުންޑޭ" އަދި "ބާރަތު" ފަދަ ބޮޑެތި ހިޓް ފިލްމުތައް ގެނެސްދީފައިވާ ފަރާތެކެވެ.
ކުމާރު މަންގަތު ޕަތަކް އަދި އަބީޝެކް ޕަތަކް އިސްކޮށް ހަރަކާތްތެރިވާ 'ޕެނޮރާމާ ސްޓޫޑިއޯސް' އަކީ "ޕިޔާރު ކާ ޕަންޗްނާމާ"، "ރެއިޑް" އަދި "ޝައިތާން" ފަދަ ކާމިޔާބު ފިލްމުތައް ނެރެފައިވާ ކުންފުންޏެކެވެ. މި ކުންފުނިން މިހާރު ތައްޔާރުވަމުންދަނީ މި އަންނަ ހުކުރު ދުވަހު ސިނަމާތަކަށް ނެރުމަށް ހަމަޖެހިފައިވާ އާންމުން ބޮޑު އިންތިޒާރެއް ކުރަމުން އަންނަ ފިލްމު "ދްރިޝްޔަމް: ދަ ކޮންކްލޫޝަން" ރިލީޒްކުރުމަށެވެ.