މާލޭގައި ދުންފަތުގެ އިސްތިއުމާލުކުރުން ކޮންޓްރޯލްކުރުމަށްޓަކައި، ދުންފަތުގެ އިސްތިއުމާލުކުރާ ފަރާތްތަކަށް ޚާއްސަ ކިއޮސްކްތަކެއް މާލެ ސަރަހައްދުގައި ބެހެއްޓުމާ ގުޅޭ ގޮތުން މާލެ ސިޓީ ކައުންސިލާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) މިއަދު މަޝްވަރާކޮށްފިއެވެ.
މާލެ ސިޓީ ކައުންސިލުން 'އެކްސް'ގައި ކުރި ޕޯސްޓެއްގައިވަނީ މާލެ ސަރަހައްދުގައި ދުންފަތުގެ އިސްތިއުމާލުކުރުމަށް ޚާއްސަ ކިއޮސްކްތަކެއް ބެހެއްޓުމާ ގުޅޭގޮތުން ޑެޕިއުޓީ މޭޔަރު މީކާއީލް މުޙައްމަދު ރިޔާޒާއި އެޗްޕީއޭގެ ބައެއް ބޭފުޅުން ބައްދަލުކުރައްވައިފައިވާ ކަމަށެވެ. މި ބައްދަލުވުމުގައި ބައެއް ކައުންސިލަރުން ވެސް ބައިވެރިވެވަޑައިގަތެވެ.
ކައުންސިލުން 'އެކްސް'ގައި ލިއުނު ޕޯސްޓުގައިވަނީ، ދުންފަތުގެ އިސްތިއުމާލުކުރާ މީހުންނަށް ވަކި ތަންތަނުގައި ކިއޮސްކްތައް ބެހެއްޓުމުގެ ބޭނުމަކީ އާންމު ތަންތަނުގައި ދުންފަތުގެ އިސްތިއުމާލުކުރާ މިންވަރު މަދުކޮށް، ސާފު އަދި ސިއްހީގޮތުން އެކަށީގެންވާ ތަނަކަށް މާލެ ހެދުން ކަމަށެވެ.
https://x.com/MaleCitymv/status/2104599439910547795
ނަމަވެސް މިކަމާ ގުޅޭ ގޮތުން އެޗްޕީއޭގެ ބަހެއް ލިބޭ ގޮތް އަދި ވަނީ ނުވެފައެވެ.
މާލޭގެ އާންމު ތަންތަނުގައި ދުންފަތުގެ އިސްތިއުމާލުކުރާ މީހުން ކަމާބެހޭ އިދާރާތަކާ ގުޅިގެން ހުއްޓުވުމުގެ މަސައްކަތް ކުރަން މާލޭ ސިޓީ ކައުންސިލުން ނިންމައިފައިވަނީ މިދިޔަ އޮގަސްޓު މަހުގެ 12ވަނަ ދުވަހު ބޭއްވި ރަސްމީ ޖަލްސާގައެވެ. އެ މައްސަލަ އެ ދުވަހުގެ ޖަލްސާއަށް ހުށަހެޅުއްވީ ހުޅުމާލޭ އުތުރު ދާއިރާގެ ކައުންސިލަރު ފާޠިމަތު ޒަޙިއްޔާއެވެ.
މައްސަލަ ހުށަހަޅުއްވަމުން ޒަޙިއްޔާ އެދިވަޑައިގަތީ އާންމު ތަންތަނުގައި އާންމުންނަށް އުނދަގޫވާ ގޮތަށް ދުންފަތުގެ އިސްތިއުމާލުކުރާ ފަރާތްތަކާ މެދު ގާނޫނީ ހަމަތަކުގެ މަތިން ފިޔަވަޅު އެޅުމަށް ފުލުހުންނަށް އެންގުމަށެވެ.
ޒަޙިއްޔާ ވަނީ، މާލޭގައި ޚާއްސަކޮށް ޕާކު ފަދަ އާންމުން އެއްވާ އެކި ތަންތަނަށް ކުޑަކުދިން ގޮވައިގެން ހިތްފަސޭހަކޮށްލަން ގޮސް އުޅޭއިރު ގާތުގައި ތިބޭ މީހުން ދުންފަތުގެ އިސްތިއުމާލުކުރުމުގެ ސަބަބުން އުނދަގޫތައް ކުރިމަތިވާ ކަމުގެ ޝަކުވާތައް ލިބޭ ކަމަށެވެ. އެއީ ސިއްހީގޮތުން ކުޑަކުދިންނަށް ނޭދެވޭ އަސަރުކުރާނެ ފަދަ ކަމެއްކަން ވެސް އޭނާ ފާހަގަކުރެއްވިއެވެ.
ފާހަގަކުރެވޭ ގޮތުގައި ދުންފަތުގެ އިސްތިއުމާލުކުރުން މަނާ ސަރަހައްދުތަކުގައި ވެސް ބައެއް މީހުން ދުންފަތުގެ އިސްތިއުމާލުކުރެއެވެ. ނަމަވެސް އޭގެ ތެރެއިން އެއްވެސް ބަޔަކަށް ކަމާބެހޭ އިދާރާތަކުން މިހާތަނަށް ފިޔަވަޅު އަޅައިފައި ނުވެއެވެ.
ސަރުކާރުން ވަނީ ރާއްޖޭގައި ދުންފަތް ކޮންޓްރޯލްކުރުމަށްޓަކައި ދުންފަތުގެ ބާވަތްތަކުން ނަގާ ޑިއުޓީ އަށް އިންސައްތައަށް މީގެ ކުރިން ބޮޑުކުރުމަށްފަހު ހަތަރު އިންސައްތައަށް ކުޑަކޮށްފައެވެ.
ހަމަ އެއާއެކު 2007ވަނަ އަހަރުން ފެށިގެން އުފަންވާ ކުދިންނަށް ދުންފަން ބޭނުން ކުރުން މަނާކުރުމަށް 'ޖެނެރޭޝަނަލް ބޭން'އެއް ސަރުކާރުން ވަނީ ގެނެސްފައެވެ.