ހަޔާ އެޑިއުކޭޝަން މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުން ބޭނުންކުރުމަށްޓަކައި "ވާޗުއަލް އޮފީސް އެޕްލިކޭޝަން" ހެދުމުގެ މަސައްކަތަށް 1.1 މިލިއަނަށްވުރެ ގިނަ ރުފިޔާ ޚަރަދުކޮށްފައިވީ ނަމަވެސް، އެ މަޝްރޫއުން އެއްވެސް މަންފާއެއް ލިބިފައިނުވާކަން އޮޑިޓާ ޖެނެރަލް އޮފީހުގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓް ރިޕޯޓުގައިވާ ގޮތުން، 2021 ވަނަ އަހަރު މި މަސައްކަތް ކުންފުންޏަކާ ހަވާލުކޮށްގެން ކުރިއަށްގެންދިޔައިރު، އެގްރީމެންޓުގައިވާ މުއްދަތުގައި މައިގަނޑު މޮޑިއުލްތައް ނުނިމުމުގެ ސަބަބުން އެކި ފަހަރު މަތިން މުއްދަތު އިތުރުކޮށްދީފައި ވެއެވެ.
އެގޮތުން 2021 އޮގަސްޓު ހަތަކުން 2021 ޖޫން 27 އާ ދެމެދު 12 ފަހަރެއްގެ މަތިން މުއްދަތު އިތުރުކޮށްދީ، އިތުރު 12 މަސްދުވަހުގެ މުއްދަތެއް ވެސް ދީފައިވެއެވެ. އެންމެ ފަހުން މުއްދަތު އިތުރުކޮށްދިން 23 އޮކްޓޫބަރު 2022 ގެ ނިޔަލަށް ވެސް އެގްރީމެންޓުގައިވާ 12 މޮޑިއުލްގެ ތެރެއިން އެއްވެސް މޮޑިއުލެއްގެ މަސައްކަތް ފުރިހަމައަށް ނިންމާފައެއް ނުވެއެވެ.
މި ސޮފްޓްވެއާ ޑިވެލޮޕްމަންޓް ޕްރޮޖެކްޓަށް 2021 އިން 2023 ވަނަ އަހަރުގެ ނިޔަލަށް ޖުމްލަ 1,181,763 (އެއް މިލިއަން އެއްސަތޭކަ އަށްޑިހަ އެއް ހާސް ހަތްސަތޭކަ ފަސްދޮޅަސް ތިން) ރުފިޔާ ވަނީ ޚަރަދުކޮށްފައެވެ.
ނަމަވެސް މަސައްކަތް ކުރިއަށްދިޔަ މިންވަރުގެ ރިޕޯޓުތަކާއި، މަސައްކަތް ޓްރެކްކުރާ ލޮގްތަކާއި، ޑިވެލޮޕަރުންގެ ޓައިމްޝީޓުތަކާއި، ޓެކްނިކަލް ޑެލިވަރަބަލްތައް ފަދަ މުހިންމު ލިޔެކިޔުންތައް ބަލަހައްޓާފައި ނުވާކަން އޮޑިޓުން ވަނީ ފާހަގަކޮށްފައެވެ. މިއީ ދައުލަތުގެ މާލިއްޔަތު ގަވާއިދުގެ 6.01 ވަނަ މާއްދާގެ (ނ) ގެ 6 ވަނަ ނަންބަރާ ޚިލާފަށް ހިންގާފައިވާ ކަމެކެވެ.
މި މައްސަލައާ ގުޅިގެން އޮޑިޓާ ޖެނެރަލްގެ އޮފީހުން ވަނީ، މިނިސްޓަރު ކަނޑައަޅުއްވާފައިވާ އިންތިޒާމުގެ ތެރެއިން މި މައްސަލަ ބަލައި، އިހުމާލުވި ފަރާތްތަކާމެދު ފިޔަވަޅު އެޅުމަށް އަންގާފައެވެ. އަދި ދައުލަތުގެ މާލިއްޔަތު ގަވާއިދުގެ 6.24 ވަނަ މާއްދާއާއި 17.01 އަދި 17.03 ވަނަ މާއްދާއާ އެއްގޮތަށް، މަސައްކަތް ނުނިމިދާ މައްސަލަތަކުގައި ސަރުކާރަށް ލިބޭ ގެއްލުމުގެ އުނިބައި ހޯދުމަށާއި، އިހުމާލުވާ ކުންފުނިތަކާމެދު ފިޔަވަޅު އެޅުމަށްވެސް ވަނީ ލަފާދީފައެވެ.