ބޮލީވުޑްގެ އެންމެ މަޝްހޫރު ތަރިންގެ ވާހަކަ ދައްކާއިރު، އަމީތާބް ބައްޗަން، ސަލްމާން ހާން އަދި ރިތިކް ރޯޝަން އަކީ އެންމެ ކުރީ ސަފުގައި ގުނާލެވޭ ނަންތަކެވެ. ނަމަވެސް މި ތިން ތަރިންގެ މުޅި މިލްކިއްޔާތު އެއްކޮށްލުމުން ލިބޭ އަދަދަކީ 9،500 ކްރޯޑް ރުޕީސްއެވެ. މިއީ ބޮލީވުޑްގެ ރަސްގެފާނު ކަމަށް ގިނަ ބަޔަކު ސިފަކުރާ ޝާހްރުކް ހާންގެ މިލްކިއްޔާތަށް ވުރެ 500 ކްރޯޑް ރުޕީސް މަދު އަދަދެކެވެ.
އަލަށް އާންމުކުރި "ހުރުން އިންޑިއާ ރިޗް ލިސްޓް 2026" އިން ދައްކާ ގޮތުގައި، އިންޑިއާގެ އެންމެ މުއްސަނދި އެކްޓަރުގެ މަގާމުގައި އަދިވެސް ހުރީ ޝާހްރުކް ހާންއެވެ. އޭނާގެ މިލްކިއްޔާތުގައި 10،000 ކްރޯޑް ރުޕީސް ހުރި ކަމަށް އެ ލިސްޓުން ދައްކައެވެ. މިއީ ފިލްމީ ދާއިރާގެ އިތުރުން އޭނާ ކުރަމުން އަންނަ ވިޔަފާރިތަކުގެ ކާމިޔާބީ ރަމްޒުކޮށްދޭ ކަމެކެވެ. ޝާހްރުކްގެ އާމްދަނީގެ ބޮޑު ބައެއް ހިއްސާކުރަނީ އޭނާގެ ޕްރޮޑަކްޝަން ކުންފުނި ކަމަށްވާ "ރެޑް ޗިލީސް އެންޓަޓެއިންމަންޓް" އާއި ކްރިކެޓް ފްރެންޗައިޒްތައް ހިންގާ "ނައިޓް ރައިޑާސް ސްޕޯޓްސް" ގްރޫޕްގައި އޭނާގެ އޮންނަ ހިއްސާގެ ސަބަބުން ކަމަށް ރިޕޯޓުތައް ބުނެއެވެ. މި ގްރޫޕަކީ ކޮލްކަތާ ނައިޓް ރައިޑާސް ފަދަ ޓީމުތަކުގެ ފަހަތުގައިވާ ކުންފުންޏެވެ.
ނަމަވެސް، 2025 ވަނަ އަހަރު ހުރުން ލިސްޓުގައި ޝާހްރުކްގެ މިލްކިއްޔާތުގެ ގޮތުގައި 12،490 ކްރޯޑް ރުޕީސް ރިޕޯޓުކޮށްފައިވާއިރު، މިއަހަރުގެ އަދަދު ވަނީ ގާތްގަނޑަކަށް 20 އިންސައްތަ ދަށަށް ގޮސްފައެވެ. ފާހަގަކޮށްލެވޭ ގޮތުގައި، 2023 ވަނަ އަހަރު ނެރުނު "ޕަތާން"، "ޖަވާން" އަދި "ޑަންކީ" އަށް ފަހު ޝާހްރުކް އަދި ބޮޑު ސްކްރީނަކުން ނުފެނެއެވެ. އޭނާގެ ކުރިއަށް އޮތް ފިލްމު "ކިންގް" ރިލީޒްކުރުމަށް ހަމަޖެހިފައިވަނީ މިއަހަރުގެ ޑިސެންބަރު މަހުގެ 24 ވަނަ ދުވަހުއެވެ. ސިދާތު އާނަންދު ޑައިރެކްޓުކުރާ މި ފިލްމުގައި ޝާހްރުކްއާއެކު އޭނާގެ އަންހެން ދަރިފުޅު ސުހާނާ ހާން ވެސް ފެނިގެންދާނެ ކަމަށް މީޑިއާތަކުން ބުނެއެވެ.
ލިސްޓުގެ ދެވަނައިގައި އޮތީ އަމީތާބް ބައްޗަންއެވެ. އޭނާގެ މިލްކިއްޔާތުގައި 4،000 ކްރޯޑް ރުޕީސް ހުރި ކަމަށް ދައްކާއިރު، މިއީ ފާއިތުވި އަހަރާ އަޅައިބަލާއިރު ވަރަށް ބޮޑު ކުރިއެރުމެކެވެ. 2025 ވަނަ އަހަރު އަމީތާބްގެ މިލްކިއްޔާތުގެ ގޮތުގައި ރިޕޯޓުކޮށްފައިވަނީ 1،630 ކްރޯޑް ރުޕީސްއެވެ. ހުރުން އިން ބުނާ ގޮތުގައި، އަމީތާބްގެ މުއްސަނދިކަން އިތުރުވެފައިވަނީ އޭނާގެ އާއިލީ އޮފީސް މެދުވެރިކޮށް ކޮށްފައިވާ އިންވެސްޓްމަންޓްތަކާއި ރިއަލް އެސްޓޭޓް ވިޔަފާރީގެ ސަބަބުންނެވެ. މިއީ ލިސްޓުގެ ކުރީގައި އުޅޭ ހަތަރު ތަރިންގެ ތެރެއިން ފެނުނު އެންމެ ބޮޑު ކުރިއެރުމެވެ.
މިއަހަރުގެ ލިސްޓުން ފެނުނު އެންމެ ބޮޑު އެއް ބަދަލަކީ ސަލްމާން ހާން ފުރަތަމަ ފަހަރަށް މި ލިސްޓުގައި ހިމެނުމެވެ. 3،000 ކްރޯޑް ރުޕީސްގެ މިލްކިއްޔާތަކާއެކު ސަލްމާން އޮތީ ލިސްޓުގެ ތިންވަނައިގައެވެ. އޭގެ ފަހަތުން ހަތަރުވަނައިގައި އޮތީ 2،500 ކްރޯޑް ރުޕީސްއާއެކު ރިތިކް ރޯޝަންއެވެ. 2025 ވަނަ އަހަރު ރިތިކްގެ މިލްކިއްޔާތަކީ 2،160 ކްރޯޑް ރުޕީސްއެވެ. އޭނާގެ އާމްދަނީ އިތުރުވެފައިވަނީ އޭނާ ކޯ-ފައުންޑަރެއްގެ ގޮތުގައި ހަރަކާތްތެރިވާ ފިޓްނަސް އަދި ލައިފްސްޓައިލް ބްރޭންޑް "އެޗްއާރްއެކްސް" ގެ ވިޔަފާރި ފުޅާވުމާ ގުޅިގެން ކަމަށް ރިޕޯޓުތައް ބުނެއެވެ. މި ބްރޭންޑުން ވަނީ އަންނައުނާއި ފިޓްނަސްއާ ގުޅޭ ތަކެތީގެ އިތުރުން ކޮންސިއުމަރ ކެޓަގަރީގެ އެހެނިހެން ބާވަތްތަކަށް ވެސް ވިޔަފާރި ފުޅާކޮށްފައެވެ.
މީގެ ކުރިން މި ލިސްޓުން ޖާގަ ހޯދި ބޮލީވުޑްގެ މަޝްހޫރު ދެ ނަމެއް މިއަހަރުގެ ލިސްޓުން ވަނީ އުނިވެފައެވެ. އެގޮތުން 2025 ވަނަ އަހަރު 7،790 ކްރޯޑް ރުޕީސްގެ މިލްކިއްޔާތަކާއެކު ލިސްޓުގައި ހިމެނުނު ޖޫހީ ޗާވްލާ މިއަހަރުގެ ލިސްޓަކު ނެތެވެ. އަދި ފާއިތުވި އަހަރު 1،880 ކްރޯޑް ރުޕީސްއާއެކު ލިސްޓުގައި ހިމެނުނު ކަރަން ޖޯހަރް ވެސް 2026 ވަނަ އަހަރުގެ ރޭންކިންއިން ފެންނާކަށް ނެތެވެ.
ޝާހްރުކް ހާންގެ މިލްކިއްޔާތު މިދިޔަ އަހަރަށް ވުރެ ދަށަށް ގޮސްފައިވީ ނަމަވެސް، އޭނާ އަދިވެސް ހުރީ އިންޑިއާގެ އެންމެ މުއްސަނދި އެކްޓަރުގެ ގޮތުގައެވެ. ކުރިއަށް އޮތް ތަނުގައި މި ލިސްޓަށް އަތުވެދާނެ އެންމެ ބޮޑު ބަދަލަކީ "ކިންގް" ފިލްމާއެކު ޝާހްރުކް އެނބުރި ސިނަމާތަކަށް އައުމުން އަންނާނެ ބަދަލެއް ކަމަށް ބެލެވެއެވެ. އެ ފިލްމަށް ބޮކްސް އޮފީހުގައި ލިބޭ ކާމިޔާބީއާއި އޭގެ ސަބަބުން އޭނާގެ އާމްދަނީއަށް ކުރާނެ އަސަރު ފެނިގެންދާނީ ކުރިއަށް އޮތް އަހަރުތަކުގެ ރޭންކިންތަކުންނެވެ.