ބެލުންތެރިންގެ ބޮޑު ތަރުހީބެއް ލިބުނު "ޕައިރޭޓްސް އޮފް ދަ ކެރީބިއަން" ސީރީޒްގެ ހަވަނަ ފިލްމުގެ މަސައްކަތް ފަށާފައިވާކަމާއި، މި ފިލްމުގައި ކެޕްޓަން ޖެކް ސްޕެރޯގެ ރޯލުން އަލުން އެކްޓަރު ޖޯނީ ޑެޕް ފެނުމާ ބެހޭގޮތުން މަޝްވަރާކުރެވެމުންދާކަން ޕްރޮޑިއުސަރު ޖެރީ ބްރުކްހައިމާ ކަށަވަރުކޮށްދީފިއެވެ.
'ޑީ23' ފޭން އިވެންޓުގައި 'ޑެޑްލައިން'އަށް ދިން އިންޓަވިއުއެއްގައި ބްރުކްހައިމާ ބުނީ، ޖޯނީ ޑެޕްއާ އެކު ވާހަކަދެކެވެމުންދާ ކަމަށާއި، މިހާރު ކުރިއަށްދަނީ ފިލްމުގެ ސްކްރީންޕްލޭ ތައްޔާރުކުރުމުގެ މަސައްކަތް ކަމަށެވެ. އަދި މި މަސައްކަތް ކާމިޔާބުކަމާއެކު ނިންމާލެވޭނެ ކަމަށް އުންމީދުކުރާ ކަމަށްވެސް އޭނާ ފާހަގަކުރިއެވެ.
މުނިފޫހިފިލުވުމުގެ ދާއިރާގެ ހަބަރުތައް ފަތުރާ ވަސީލަތްތަކުން މަސްދަރުތަކާ ހަވާލާދީ ރިޕޯޓްކުރާ ގޮތުގައި، މި ފަހަރުގެ ފިލްމަކީ ހަމައެކަނި ޖޯނީ ޑެޕްގެ ކެޕްޓަން ޖެކް ސްޕެރޯގެ ކެރެކްޓާއަށް ބިނާކޮށް އުފައްދާ ފިލްމެއް ނޫނެވެ. އޭގެ ބަދަލުގައި، މާގޯ ރޮބީ ކުޅޭ ކެރެކްޓާ އިސް ދައުރަކުން ފެންނާނެއިރު، ޖެކް ސްޕެރޯ ފެންނާނީ ސަޕޯޓިންގް ކެރެކްޓާއެއްގެ ގޮތުގައެވެ.
"ޕައިރޭޓްސް އޮފް ދަ ކެރީބިއަން 5"ގެ ޕޯސްޓަރެއް--ފޮޓޯ/ޓެލެގްރާފްއިންޑިއާ
ދެހާސް ސަތާރަވަނަ ވަނަ އަހަރު ނެރުނު "ޑެޑް މެން ޓެލް ނޯ ޓޭލްސް" އަކީ މި ސީރީޒްގެ ފިލްމުތަކުގެ ތެރެއިން އެންމެ އާމްދަނީ ދަށްވި ފިލްމެވެ. އެ ފިލްމަށް މުޅި ދުނިޔެއިން ލިބުނީ 795.9 މިލިއަން އެމެރިކާ ޑޮލަރެވެ. ނަމަވެސް، ޑިޒްނީގެ މި ސީރީޒްގެ ފަސް ފިލްމަށް މިހާތަނަށް ޖުމްލަ 4.5 ބިލިއަން އެމެރިކާ ޑޮލަރުގެ އާމްދަނީއެއް ލިބިފައިވާކަން ފާހަގަކޮށްލެވެއެވެ.
މީގެއިތުރުން، ބްރުކްހައިމާ ވަނީ ޕެރަމައުންޓް ސްޓޫޑިއޯ ކެލިފޯނިއާ އިން ބަދަލުކުރުމަށް ޑޭވިޑް އެލިސަން ގެންގުޅުއްވާ ޕްލޭންތަކާ ބެހޭގޮތުންވެސް ވާހަކަދައްކާފައެވެ. މިކަމަކީ އެންޓި-ޓްރަސްޓް މައްސަލަތަކާއި ވޯނާ ބްރޯސް ޑިސްކަވަރީއާ ގުޅުމަށް ކުރެވޭ މަޝްވަރާތަކަށް ހުރަސްތަކެއް ކުރިމަތިވެފައިވާ ދަނޑިވަޅެއްގައި ދެކެވޭ ވާހަކަތަކެކެވެ.
ބްރުކްހައިމާ ބުނި ގޮތުގައި އޭނާ ބޭނުންވަނީ ސްޓޫޑިއޯ ކެލިފޯނިއާގައި ދެމިއޮތުމަށެވެ.
ޑޭވިޑް އެލިސަން ވޯނާ ބްރޯސް ޑިސްކަވަރީ ގަތުމަށް ހުށަހަޅާފައިވާ ހުށަހެޅުމަށް ބްރުކްހައިމާ ތާއީދުކުރެއެވެ. އޭނާ މީގެ ކުރިންވެސް ވަނީ އެލިސަންގެ ރޭވުންތަކަށް ތާއީދުކޮށް، އޭނާއަކީ ސިނަމާއާއި ފިލްމީ ދާއިރާއަށް ލޯބިކުރާ އަދި އެހީތެރިވާ ފަރާތެއްގެ ގޮތުގައި ސިފަކޮށްފައެވެ.