އިންޑިއާގެ ކެރެލާ ސްޓޭޓަށް ކުރަމުންދާ ވިއްސާރައިގައި ފެންބޮޑުވެ ހިނގި އެކި ހާދިސާތަކުގައި މަރުވި މީހުންގެ އަދަދު 11 އަށް އަރައި، 7،600 އަށް ވުރެ ގިނަ މީހުން ވަގުތީ ހިޔާތަކަށް ބަދަލުކޮށްފިއެވެ.
ކެރެލާގެ ސަރުކާރާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މަރުވި މީހުންގެ ތެރޭގައި މަލައްޕޫރަމް ޑިސްޓްރިކްޓުން މަރުވި ހަތަރު މީހުންނާއި، ތިރުވަނަންތަޕޫރަމް، އާލަޕޫޅާ އަދި އިޑުއްކީން މަރުވި މީހުން ހިމެނެއެވެ. މީގެ އިތުރުން ކޯޅިކޯޑުން ވެސް އެކަކު ވަނީ މަރުވެފައެވެ.
ކެރެލާގެ ރެވެނިއު މިނިސްޓަރު އޭ.ޕީ އަނިލްކުމާރު ވިދާޅުވި ގޮތުގައި، ސްޓޭޓުގެ އެކި ސަރަހައްދުތަކުގައި ގާއިމުކޮށްފައިވާ 273 ކޭމްޕަކަށް 7،674 މީހުން ވަނީ ބަދަލުކޮށްފައެވެ. އަދި އެ ތަންތަނުން ކާބޯތަކެއްޗާއި ސިއްހީ ފަރުވާގެ އިންތިޒާމުތައް ހަމަޖައްސާފައިވާ ކަމަށް އޭނާ ވިދާޅުވިއެވެ. އެންމެ ގިނަ ކޭމްޕު ގާއިމުކޮށްފައިވަނީ 75 ކޭމްޕާއެކު ޕަތަނަމްތިއްޓާ ޑިސްޓްރިކްޓުގައެވެ.
އިންޑިއާގެ މޫސުމާ ބެހޭ އިދާރާ (އައިއެމްޑީ) އިން ވަނީ ހޯމަ ދުވަހު ކެރެލާގެ ހުރިހާ 14 ޑިސްޓްރިކްޓަކަށް ޔެލޯ އެލާޓް ނެރެފައެވެ. ނަމަވެސް އަންގާރަ އަދި ބުދަ ދުވަހު ބޯކޮށް ވާރޭވެހޭނެ ކަމަށް އެ އިދާރާއިން ލަފާކޮށްފައެއް ނުވެއެވެ. ރައްކާތެރިކަމުގެ ފިޔަވަޅެއްގެ ގޮތުން 10 ޑިސްޓްރިކްޓެއްގެ ސްކޫލްތަކާއި ކޮލެޖުތައް ވަނީ ބަންދުކޮށްފައެވެ.
ކެރެލާގެ ޗީފް މިނިސްޓަރު ވީ.ޑީ ސަތީސަން ފޭސްބުކްގައި އާންމުކުރެއްވި ޕޯސްޓެއްގައި ވިދާޅުވީ، ފެންގަނޑު ހިނދެމުންދާ ސަރަހައްދުތައް ސާފުކުރުމުގެ މަސައްކަތް މިހާރު ފަށާފައިވާ ކަމަށެވެ. އަދި މި ހާލަތުން އަރައިގަތުމަށް ސަރުކާރުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އޭނާ ދެއްވިއެވެ.
އަނެއްކޮޅުން، ސީޕީއައި (އެމް) އިން ވަނީ ނުރައްކާތެރި ސަރަހައްދުތަކުން މީހުން ރައްކާތެރި ހިސާބުތަކަށް ބަދަލުކުރުމުގައި ސަރުކާރުން އިހުމާލުވެފައިވާ ކަމަށް ބުނެ ފާޑުކިޔާފައެވެ. އަދި ހާލަތުގެ ގޯސްކަން ދެނެގަނެ، ރައްޔިތުންނަށް އެހީތެރިވުމަށް އެ ޕާޓީން ވަނީ ޗީފް މިނިސްޓަރަށް ގޮވާލާފައެވެ.
ވިއްސާރައިގެ ސަބަބުން 30 ގެއެއް އެއްކޮށް ހަލާކުވެ، 293 ގެއަކަށް އެކިވަރުގެ ގެއްލުންތައް ލިބިފައިވާ ކަމަށް ސަރުކާރުގެ ތަފާސްހިސާބުތަކުން ދައްކައެވެ. މީގެ އިތުރުން، ކެރެލާ ސްޓޭޓް ޑިޒާސްޓާ މެނޭޖްމަންޓް އޮތޯރިޓީ (ކޭއެސްޑީއެމްއޭ) އިން ވަނީ ފެންގަނޑުތަކާއި ފަތުރުވެރިން ޒިޔާރަތްކުރާ ސަރަހައްދުތަކަށް ދިއުން ވަގުތީ ގޮތުން މަނާކޮށްފައެވެ.