އިންޑިއާގެ އެންމެ މަގުބޫލު އެއް ޑެލިވަރީ ޚިދުމަތް ކަމަށްވާ 'ސްވިގީ'ގެ ޑެލިވަރީ ޑްރައިވަރެއްގެ ގޮތުގައި މަސައްކަތްކުރި އެ ޤައުމުގެ ޒުވާނެއް ކަމަށްވާ އަޖިތު ކުމާރުގެ ކާމިޔާބީގެ ވާހަކަ އެނގުމުން ގިނަ ބައެއްގެ ސަމާލުކަން އޭނާއަށް ހުއްޓިއްޖެއެވެ.
ދިރިއުޅުމުގައި އެއްވެސް ކަމަކީ އަޖިތު ކުމާރަށް ފަސޭހައިން ލިބުނު ކަންކަމެއް ނޫނެވެ. ނަމަވެސް އޭނާގެ ވާހަކައަކީ، ބުރަ މަސައްކަތާއި ކެތްތެރިކަމާ އެކު މަސައްކަތްކޮށްފިނަމަ، އިންސާނެއްގެ ތަގުދީރު ބަދަލުވެދާނެކަމުގެ ދިރިހުރި މިސާލެކެވެ.
ކޮލެޖުން ވަކިވާންޖެހި، ސްވިގީގައި ކާބޯތަކެތި ޑެލިވަރީކޮށްދޭން އުޅުނު އަޖިތު، "ޕޮކެޓް އެފްއެމް" ކިޔާ ކުންފުންޏެއްގެ އެހީގައި މިއަދު މިވަނީ މިލިއަނަރަކަށް ވެފައެވެ.
އޭނާގެ މި އާދަޔާ ޚިލާފު ވާހަކަ ފުރަތަމަ ފެންމަތިވީ މި އަހަރުގެ މާޗު މަހު ޕޮކެޓް އެފްއެމްއިން އާންމުކުރި ވީޑިއޯއަކުންނެވެ. ނަމަވެސް މި ވާހަކައަށް ބޮޑު ސަމާލުކަމެއް ލިބުނީ އިންވެސްޓަރެއް ކަމަށްވާ ރާހުލް މާތޫރު މިކަމާ ގުޅޭގޮތުން ކުރި ޕޯސްޓަކާ ގުޅިގެންނެވެ.
އިންޑިއާގެ ފަރީދާބާދަށް ނިސްބަތްވާ އަޖިތު ކުމާރު އެ ވީޑިއޯގައި ބުނި ގޮތުގައި، އާއިލާގެ މާލީ ހާލަތު ހުރި ގޮތުންނާއި ކޮވިޑްގެ ފުރަބަންދުގެ ސަބަބުން އޭރު އޭނާއަށް މަޖުބޫރުވީ ކޮލެޖުން ވަކިވެ ވަޒީފާއެއް ހޯދާށެވެ.
'ޕޮކެޓް މަނީ'ގެ ހިންގުންތެރިން ކަމަށްވާ ރޯހަން ނަޔަކް، ޕްރަތީކް ޑިކްސިޓް އަދި ނިޝާންތު ކޭއެސް--ފޮޓޯ/ރެޑިޓް
އަޖިތުގެ ބައްޕަ ދިއްލީ އެންސީއާރްއަށް ބަދަލުވީ، ކުދިންނަށް އުޖާލާ މުސްތަގުބަލެއް ހޯދައިދިނުމުގެ އުންމީދުގައެވެ. އާއިލާގެ ޒަރޫރީ ބޭނުންތައް ދެކޮޅު ޖެއްސުމަށާއި ކުދިންނަށް ކިޔަވައިދިނުމަށްޓަކައި އޭނާގެ ބައްޕަ ތަފާތު އެކި މަސައްކަތްތައް ކުރިއެވެ. ބައެއް ފަހަރު އާއިލާއަށް ފުދޭވަރަށް ކާނާ ނުލިބޭ ދުވަސްތައް ވެސް ދިޔައެވެ.
ކޮލެޖު ދަރިވަރެއްގެ ގޮތުގައި ހުރެ، އޭނާއަށް މަޖުބޫރުވީ ތައުލީމު ދޫކޮށްލައި ވަޒީފާއެއް ހޯދާށެވެ. އޭނާގެ ކޮއްކޮ ބުނި ގޮތުގައި، އަޖިތު ވަނީ ތަފާތު އެކި ކަންކަން ކޮށްފައެވެ. އޭގެ ތެރޭގައި ކައިވެނިތަކަށް މޭކަޕްކޮށްދިނުމާއި މެހެންދީ އެޅުން ފަދަ ކަންކަން ވެސް ހިމެނެއެވެ.
ދެން ކުރިމަތިވީ ކޮވިޑްގެ ބަލިމަޑުކަމެވެ. މިއާއެކު އަޖިތު ކުރަމުން އައި ކުދިކުދި މަސައްކަތްތައް ހުއްޓުނެވެ.
"ގޭގެ ކުއްޔާއި، ކާބޯތަކެތީގެ ޚަރަދުތައް ދިޔައީ އިތުރުވަމުން،" ފެންކަޅިވެފައި ހުރެ އަޖިތު ކިޔައިދިނެވެ.
އެ ދަނޑިވަޅުގައި ރަހުމަތްތެރިއަކު ދިން ލަފަޔަކަށް، އޭނާ ކާބޯތަކެތި ޑެލިވަރީ ކުރުމުގެ މަސައްކަތް ފެށިއެވެ. އަތުގައި އޮތް ބައިސްކަލެއްގައި އޭނާ ސްވިގީގެ ޑެލިވަރީ ރައިޑަރެއްގެ ގޮތުގައި މަސައްކަތް ކުރަން ފެށިއެވެ.
"ދުވާލަކު 20 އޯޑަރު ނިންމަން ބޭނުން ނަމަ، މަދުވެގެން 100 ކިލޯމީޓަރަށް ބައިސްކަލު ދުއްވަން ޖެހޭ،" އޭނާ އެ ދުވަސްތައް ހަނދާން ކުރަމުން ބުންޏެވެ.
ނަމަވެސް އަޖިތުގެ ދިރިއުޅުން ބަދަލުކޮށްލީ ކުރިމަތިވި ނުރައްކާތެރި ކާރު އެކްސިޑެންޓެކެވެ. މި އެކްސިޑެންޓުގެ ސަބަބުން އޭނާ އެނދުމަތިވިއިރު، ފައި ބުރިކޮށްލަން ޖެހިދާނެ ކަމުގެ ބިރު ވެސް އޮތެވެ.
"އަހަރެން ހުރީ ވަރަށް ބިރުގަނެފައި. ހީކުރީ ދިރިއުޅުން ނިމުނީ ކަމަށް،" އެ އަނދިރި ދުވަސްތައް ސިފަކުރަމުން އޭނާ ބުންޏެވެ.
އާއިލާ އޮތީ ދަރަނީގެ ތެރޭގައި ކަމަށް ވިޔަސް، އޭނާގެ މަންމަ ހުރީ އިތުރު ދަރަނި ނަގައިގެން ވެސް އޭނާއަށް ފަރުވާ ދޭން ތައްޔާރަށެވެ. އެކަމަކު އަޖިތަށް އެނގެނީ ހަފުތާއެއްގެ ތެރޭގައި ދަރަނި ދޭން ބުނެ މީހުން އަންނާނެކަމެވެ.
އެހެންވެ އޭނާ ބޭނުންވީ ބޭރަށް ނުކުމެ ނޫޅެވޭތީ، ގޭގައި ހުރެގެން ކުރެވޭނެ މަސައްކަތެއް ހޯދުމަށެވެ. އެގޮތުން "ޕޮކެޓް އެފްއެމް" އިޝްތިހާރު ކުރާ ވީޑިއޯއެއް އޭނާއަށް ފެނުމުން ކޮންމެ ގޮތެއް ހަދާފައިވެސް އެ މަސައްކަތް ކުރަން ބޭނުންވި ކަމަށް އަޖިތު ވަނީ ބުނެފައެވެ.
ޕޮކެޓް އެފްއެމް އަކީ އޯޑިއޯ ސީރީޒްތައް ގެނެސްދޭ ޕްލެޓްފޯމެކެވެ. ލިޔުންތެރިންނަށް ފައިސާ ލިބެނީ އެމީހުންގެ ވާހަކަތަކަށް ލިބޭ ތަރުހީބަށް ބަލާފައެވެ.
އެ މަސައްކަތް ކާމިޔާބު ނުވިޔަސް ގެއްލޭނެ އެއްޗެއް ނޯންނާނެކަމަށް ވިސްނައި، އަޖިތު އެނދުމަތީގައި އޮވެގެން ވާހަކަ ލިޔަން ފެށި ކަމަށާއި ބައެއް ދުވަސްދުވަހު ހަތަރު ފަސް އެޕިސޯޑު ވެސް ލިޔާ ކަމަށް އޭނާ ބުންޏެވެ.
އޭނާގެ ބުރަ މަސައްކަތުގެ ނަތީޖާ ވަރަށް އަވަހަށް ފެނި، އޭނާ ލިޔުނު އެއް ވާހަކަ މުބާރާތަކުން ހޮވިގެން، ފުރަތަމަ މުސާރައިގެ ގޮތުގައި 20،000 ރުޕީސް ލިބުނެވެ. އެ ފައިސާ އޭނާ ހަވާލުކުރީ އޭނާގެ މަންމައާއެވެ.
މި ކާމިޔާބީއާ އެކު އޭނާގެ ހިތްވަރު އިތުރުވެ، ހުއްޓުމެއް ނެތި ލިޔަން ފެށިއެވެ. ނަތީޖާއެއްގެ ގޮތުން އޭނާގެ އޯޑިއޯ ސީރީޒެއް ޕްލެޓްފޯމްގެ އެއްވަނަ ހޯދައި، އެއްފަހަރާ 52،000 ރުޕީސް އަދި އޭގެ ފަހުން 6.29 ލައްކަ ރުޕީސްގެ ބޮޑު އާމްދަނީއެއް އަޖިތުއަށް ލިބުނުކަމަށް ބުނެފައިވެއެވެ.
އަޖިތު ކުމާރަކީ ޕޮކެޓް އެފްއެމްގެ މަގުބޫލު ސީރީޒްއެއް ކަމަށްވާ "ބްރަމްޔޮދާ: ދަ ޑިސްޓްރޮޔާ"ގެ މައި ލިޔުންތެރިޔާއެވެ. މާތޫރު ފާހަގަކުރި ގޮތުގައި މި އަހަރު މި ސީރީޒްގެ މަގުބޫލުކަން ހަތަރު ގުނަ އިތުރުވެ، އެޕިސޯޑުތަކުގެ އަދަދު 1300އަށް ވުރެ ގިނަވެފައިވެއެވެ.
އަޖިތުގެ ހިތްވަރުން ލިބުނު މި ކާމިޔާބީއާ ގުޅޭގޮތުން އޭނާ ބުނީ، ދުނިޔެ ބަދަލުވުމަށް ސިކުންތެއްގެ ފަޅިއެއް ވެސް ނުނަގާނެ ކަމަށް މީހުން ބުނާ އަޑު އަހާ ކަމަށެވެ. އެއީ ތެދެއްކަން ސާބިތުވެ އޭނާގެ ދުނިޔެވެސް މިއަދު މުޅިން ބަދަލުވެފައިވާ ކަމަށް އަޖިތު ވަނީ ބުނެފައެވެ.