އިންޑިއާގެ ސަރުކާރާ ދެކޮޅަށް މުޒާހަރާކުރަމުންދާ ޒުވާނުންގެ "ކޮކްރޯޗް" މޫވްމަންޓުން ޕާލަމެންޓަށް ކުރަމުންދިޔަ ހިނގާލުންތައް ހުއްޓާލައިފިއެވެ.
މިއަދު އެ ހަރަކާތުން މިކަން ހާމަކޮށްފައިވަނީ، އިއްޔެ ފުލުހުންނާ ދެމެދު ހިނގި ކުރިމަތިލުންތަކުގައި ގިނަ ބަޔަކަށް އަނިޔާވުމާ ގުޅިގެންނެވެ. ނަމަވެސް ސަރުކާރާ ދެކޮޅަށް ކުރާ މުޒާހަރާތައް ކުރިއަށް ގެންދާނެ ކަމަށް އެ ފަރާތުން ބުނެފައިވެއެވެ.
ކޮކްރޯޗް ޖަންތާ ޕާޓީ (ސީޖޭޕީ) ގެ ނަމުގައި އުފައްދާފައިވާ މި ހަރަކާތުގެ ބާނީ އަބީޖީތު ޑިޕްކޭ ބުނި ގޮތުގައި، ހިނގާލުންތައް ހުއްޓާލީ އިތުރު ޒުވާނުންނަށް އަނިޔާވާން ބޭނުން ނުވާތީއެވެ. އަދި ފިރިހެން ފުލުހުންގެ ފަރާތުން އަންހެން ބައިވެރިންނަށް ލިބުނު އަނިޔާތަކަށް އޭނާ ވަނީ މާފަށް އެދިފައެވެ.
ނޫސްވެރިންގެ ބައްދަލުވުމެއްގައި ޑިޕްކޭ ބުނީ، "އަހަރެމެން ދެން އިތުރަށް ހިނގާލުމެއް ނުކުރާނަން، ސަބަބަކީ ފުލުހުން އަނެއްކާވެސް ޒުވާނުންނަށް އަނިޔާކުރާނެތީ،" ކަމަށެވެ.
ހޯމަ ދުވަހު ނިއު ދިއްލީގައި ހިނގި ކުރިމަތިލުންތަކުގައި 180 އެއްހާ މީހުންނަށް އަނިޔާވެފައިވާ ކަމަށް ދިއްލީ ފުލުހުން ބުނެފައިވެއެވެ. އޭގެ ތެރޭގައި ސަލާމަތީ ބާރުތަކުގެ 118 މީހުންނާއި 60 މުޒާހަރާވެރިން ހިމެނެއެވެ. ނަމަވެސް ސީޖޭޕީން ބުނާ ގޮތުގައި 150 އަށް ވުރެ ގިނަ މުޒާހަރާވެރިންނަށް ދަނީ ހޮސްޕިޓަލުގައި ފަރުވާދެމުންނެވެ. މުޒާހަރާގެ ބައިވެރިން ފަހަތަށް ޖެއްސުމަށް ފުލުހުން ވަނީ މުގުރުން ތަޅައި، ކަރުނަގޭސް ބޭނުންކޮށްފައެވެ. ފުލުހުން ނެރުނު ބަޔާނެއްގައި ބުނެފައިވަނީ މުޒާހަރާވެރިން އަމަލުކުރީ ގާނޫނާ ހިލާފަށް ކަމަށާއި، 70 މީހަކު ހައްޔަރުކޮށް ގާނޫނީ ފިޔަވަޅު އަޅާނެ ކަމަށެވެ.
މި މުޒާހަރާތަކުގެ މައިގަނޑު މަގުސަދަކީ، މިދިޔަ މެއި މަހު މެޑިކަލް ސްކޫލްތަކަށް ވަނުމަށް ހެދި އިމްތިހާނުގެ ކަރުދާސް ލީކުވި މައްސަލައާ ގުޅިގެން އެޑިއުކޭޝަން މިނިސްޓަރު ދަރުމެންދުރަ ޕްރަދާންގެ އިސްތިއުފާއަށް ގޮވާލުމެވެ. މި މައްސަލައިގެ ސަބަބުން ދެ މިލިއަނަށް ވުރެ ގިނަ ދަރިވަރުންނަށް އަސަރުކޮށް، އަލުން އިމްތިހާނު ހަދަން ޖެހުމުގެ އިތުރުން، 12 ވަރަކަށް ދަރިވަރުން ވަނީ އަމިއްލައަށް މަރުވެފައެވެ.
އުއްތަރު ޕްރަދޭޝްއިން މުޒާހަރާގައި ބައިވެރިވި ސާހިލް ސިންގް ބުނި ގޮތުގައި، ފުލުހުން ވަނީ އެ މީހުންނަށް ވަރަށް ބޮޑަށް އަނިޔާކޮށް، މުޒާހަރާކުރާ ސަރަހައްދަށް ގެއްލުންދީފައެވެ. އަދި މިނިސްޓަރު ޕްރަދާން އިސްތިއުފާ ދެއްވައިގެން ޒިންމާދާރުކުރުވަން ބޭނުންވާ ކަމަށް އޭނާ ބުންޏެވެ.
މީގެ އިތުރުން، މުޒާހަރާވެރިން ދަނީ ޖޫން 28 އިން ފެށިގެން ބަނޑުހައިހޫނުކަމުގެ ހަޅުތާލެއް ކުރަމުންދަނިކޮށް ހޮނިހިރު ދުވަހު ގަދަކަމުން ހޮސްޕިޓަލަށް ގެންދިޔަ އެކްޓިވިސްޓް ސޯނަމް ވަންގްޗުކް މިނިވަންކުރުމަށާއި، އަމިއްލައަށް މަރުވި ކޮންމެ ދަރިވަރެއްގެ އާއިލާއަށް 10 މިލިއަން ރުޕީސް (104،000 ޑޮލަރު) ގެ ބަދަލެއް ދިނުމަށް ގޮވާލަމުންނެވެ. ސީޖޭޕީން ބުނި ގޮތުގައި، ހެލްތު މިނިސްޓަރު ޖޭ.ޕީ ނައްޑާ ވަނީ ހޯމަ ދުވަހު އެ ހަރަކާތުގެ ދެ ލީޑަރަކާ ބައްދަލުކުރައްވައި، ސަރުކާރުގެ ތެރޭގައި މިކަމާ މަޝްވަރާކުރުމަށް ވަގުތު ހޯއްދަވާފައެވެ. ޕާލަމެންޓަރީ އެފެއާޒް މިނިސްޓަރު ކިރެން ރިޖިޖޫ ވިދާޅުވި ގޮތުގައި، މަޝްވަރާތައް ރަނގަޅު މިސްރާބަކަށް ދާއިރު، މާހައުލު ގޯސްކޮށްގެން ނުވާނެއެވެ.
އޮންލައިން ސަމާސާއެއްގެ ގޮތުގައި ފެށުނު މި ހަރަކާތަކީ މިހާރު ބޮޑުވަޒީރު ނަރެންދުރަ މޯދީގެ ތިންވަނަ ދައުރުގައި ކުރިމަތިވެފައިވާ އެންމެ ބޮޑު ގޮންޖެހުމެވެ. ކޮންފްލިކްޓް މޮނިޓަރިންގ ރިސާޗް ގްރޫޕް (އޭސީއެލްއީޑީ) ގެ ސީނިއަރ އެނަލިސްޓް ޕަރލް ޕާންޑްޔާ ފާހަގަކުރި ގޮތުގައި، ސުލްހަވެރި މުޒާހަރާވެރިންނާ ދެކޮޅަށް އަޅާ ކޮންމެ ހަރުކަށި ފިޔަވަޅަކުން ޒުވާނުންގެ ރުޅިވެރިކަން އިތުރުވުން ނޫން ކަމެއް ނުވާނެއެވެ. އަދި ވަޒީފާގެ ދަތިކަމާއި އިމްތިހާނުތައް ލީކުވުން ފަދަ މައްސަލަތަކާ ގުޅިގެން ޒުވާނުންގެ މެދުގައި އުފެދިފައިވާ ނުތަނަވަސްކަމަކީ ކުރިއަށް އޮތް ތަނުގައި ސަރުކާރަށް އޮތް ބޮޑު ގޮންޖެހުމެއް ކަމަށް އޭނާ ބުންޏެވެ.