އިންޑިއާގެ ވެރިރަށް ނިއުދިއްލީގައި ހުންނަ ގާނޫނުހަދާ މަޖިލީހަށް ހިނގާފައި ދިއުމަށް މަސައްކަތްކުރި 'ކޮކްރޯޗް ޖަންތާ ޕާޓީ' (ސީޖޭޕީ) ގެ ސަޕޯޓަރުންނަށް ފުލުހުން މިއަދު މުގުރުން ހަމަލާދީފިއެވެ.
މި މުޒާހަރާއަކީ އިންޑިއާގެ އެޑިއުކޭޝަން މިނިސްޓަރު ދަރުމެންދުރަ ޕްރަދާންގެ އިސްތިއުފާއަށް ގޮވާލައި ޒުވާނުން އިސްވެ ތިބެ ކުރިއަށްގެންދާ ހަރަކާތެކެވެ.
މުޒާހަރާގެ ބައިވެރިން ބުނާ ގޮތުގައި އެ މީހުން ނުކުމެ ތިބީ މެޑިކަލް ސްކޫލްތަކަށް ވަނުމަށް ހަދާ އިމްތިހާނުގެ ކަރުދާސްތައް ލީކުވުމުގެ މައްސަލަތަކާ ގުޅިގެންނެވެ. މި މައްސަލައިގެ ސަބަބުން ދެ މިލިއަނަށްވުރެ ގިނަ ދަރިވަރުންނަށް އަލުން އިމްތިހާނު ހަދަން ޖެހިފައިވާ ކަމަށް ރޮއިޓާސްއިން ރިޕޯޓުކޮށްފައިވެއެވެ.
ފުލުހުން ވަނީ މުޒާހަރާކުރުމުގެ ހުއްދަ ނުދޭކަން ހާމަކޮށްފައެވެ. ނަމަވެސް، ދިއްލީ ފުލުހުންގެ ޑެޕިއުޓީ ކޮމިޝަނަރު ސަޗިން ޝަރްމާ މައުލޫމާތު ދިން ގޮތުގައި، މިއަދު ހެނދުނު ގާތްގަނޑަކަށް 10،000 އެއްހާ މީހުން ވަނީ ޖަންތަރް މަންތަރް ސަރަހައްދަށް އެއްވެފައެވެ. އަދި އެ ސަރަހައްދުގައި ޖާގަ ނެތުމުގެ ސަބަބުން ނުރައްކާތެރި ހާލަތެއް މެދުވެރިވެދާނެ ކަމަށް އޭނާ ބުންޏެވެ.
ބަނޑުހައިހޫނުކަމުގެ ހަޅުތާލެއް ކުރަމުންދިޔަ އެކްޓިވިސްޓް ސޯނަމް ވަންގްޗުކް ހޮނިހިރު ދުވަހު ފުލުހުން ގަދަކަމުން ހޮސްޕިޓަލަށް ގެންދިއުމާ ގުޅިގެން މުޒާހަރާގެ ބައިވެރިންގެ ރުޅިވެރިކަން ވަނީ އިތުރުވެފައެވެ.
ވަންގްޗުކް ބުނި ގޮތުގައި، ތައުލީމީ ނިޒާމުގެ މައްސަލަތަކަށް ސަރުކާރުން ޒިންމާ ނަގައިފިނަމަ ނުވަތަ ގާނޫނުހަދާ މަޖިލީހުގެ މެންބަރުން އެ މައްސަލަތަކަށް ހައްލެއް ހޯދައިދޭނެކަމުގެ ޔަގީންކަން ދީފިނަމަ އޭނާ ހަޅުތާލު ހުއްޓާލާނެއެވެ.
މި މުޒާހަރާތަކަކީ އިންޑިއާގެ ޒުވާނުންގެ މެދުގައި ވަޒީފާ ނެތް މީހުންގެ ނިސްބަތް އިތުރުވުމާއި އިމްތިހާނު ކަރުދާސްތައް ލީކުވުމުގެ ސަބަބުން އުފެދިފައިވާ ނުތަނަވަސްކަމުގެ ނަތީޖާއެއް ކަމަށް މާހިރުންނާ ހަވާލާދީ ރިޕޯޓުތަކުގައި ބުނެފައިވެއެވެ.
ސަރުކާރުގެ ތަފާސްހިސާބުތައް ދައްކާ ގޮތުން، 2025 ވަނަ އަހަރު އުމުރުން 15 އަހަރާއި 29 އަހަރާ ދެމެދުގެ ޒުވާނުންގެ ތެރެއިން ވަޒީފާ ނެތް މީހުންގެ ނިސްބަތް ހުރީ 9.9 އިންސައްތައިގައެވެ. މީގެ ތެރެއިން ސިޓީތަކުގައި މި ނިސްބަތް އުޅެނީ 13.6 އިންސައްތައިގައެވެ.
މުޒާހަރާގެ ބައިވެރިންނަށް ފުލުހުން މުގުރުން ހަމަލާދޭ މަންޒަރު ޓީވީތަކުން ދައްކާފައިވީ ނަމަވެސް، ދިއްލީ ފުލުހުން ވަނީ ބާރުގެ ބޭނުންކޮށްފައި ނުވާނެ ކަމަށް ބުނެފައެވެ. އަދި މުޒާހަރާ ކޮންޓްރޯލްކުރަމުންދަނީ ޕްރޮފެޝަނަލްކޮށް ކަމަށް ފުލުހުން ބުނެފައިވެއެވެ.