މި އަހަރުގެ ނެޝަނަލް ފިލްމު އެވޯޑު ހާސިލުކުރި ތަރިންނާއި ފިލްމުތައް އިއުލާނުކޮށްފި

އިންޑިއާއިން މި އަހަރު ނެޝަނަލް އެވޯޑު ކާމިޔާބުކުރި ފިލްމީ ތަރިންނާއި ފިލްމުތަކާބެހޭ މައުލޫމާތު އާއްމުކޮށްފިއެވެ.

އިއްޔެ އިއުލާންކުރި 72 ވަނަ ނެޝަނަލް ފިލްމް އެވޯޑްސްގައި، 2024 ވަނަ އަހަރުގެ އެންމެ މޮޅު ފިލްމުގެ ޝަރަފު ހޯދާފައިވަނީ ޑައިރެކްޓަރު އަދިތިޔަ ދާރުގެ އެކްޝަން ޑްރާމާ "އާޓިކަލް 370"އެވެ. މި ފިލްމުގައި އިންޓެލިޖެންސް އޮފިސަރެއްގެ ރޯލު ކުޅުނު ޔާމީ ގޯތަމްއަށް އެންމެ މޮޅު ބަތަލާގެ އެވޯޑް ލިބިފައިވާއިރު، އެންމެ މޮޅު މިއުޒިކް ޑައިރެކްޝަނުގެ އެވޯޑްވެސް ކާމިޔާބުކުރީ މި ފިލްމެވެ.

މި އަހަރުގެ ނެޝަނަލް ފިލްމު އެވޯޑު ކާމިޔާބުކުރި އެކްޓަރުންގެތެރޭ، މަލަޔާޅަމް ސިނަމާގެ ތަޖުރިބާކާރު އެކްޓަރު މަމޫޓީ ހިމެނޭއިރު ބޮލީވުޑްގެ ފިލްމު "ޗަންދޫ ޗެމްޕިއަން"އިން މޮޅު ހުނަރެއް ދެއްކި ކާތިކް އާރްޔަންއަށް ވެސް މި ކެޓަގަރީއިން ނެޝަނަލް އެވޯޑު ވަނީ ކާމިޔާބުވެފައެވެ.

އެކްޓަރު ސަންޖޭ މިޝްރާއަށް ފިލްމު "ބަކްޝް"އިން އެންމެ މޮޅު ސަޕޯޓިން އެކްޓަރުގެ އެވޯޑް ލިބުނުއިރު، މި ކެޓަގަރީއިން އެންމެ މޮޅު ސަޕޯޓިންގް އެކްޓްރެސްގެ އެވޯޑު ލިބުނީ ރޫޕަޝްރީ ވަރްކާޑީ (މިތުޔާ) އަދި ސަޗަނާ ނަމިދާސް (މަހާރާޖާ)އަށެވެ.

އެންމެ މޮޅު ފީޗާ ފިލްމުގެ އެވޯޑް ކާމިޔާބުކުރި ޑައިރެކްޓަރު ނާގް އަޝްވިންގެ ފިލްމު "ކަލްކީ 2898 އޭޑީ"ގެ ޕޯސްޓަރެއް--ފޮޓޯ/އިންސްޓަގްރާމް

އިތުރު ކެޓަގަރީތަކުން އެވޯޑު ކާމިޔާބުކުރި ފިލްމުތަކުގެތެރޭ، މުނިފޫހިފިލުވައިދޭ އެންމެ މޮޅު ފީޗާ ފިލްމުގެ އެވޯޑް "ކަލްކީ 2898 އޭޑީ" ކާމިޔާބުކުރިއިރު، އެންމެ މޮޅު ހިންދީ ފިލްމަކަށް ހޮވުނީ "ސްރީކާންތު"އެވެ. އަދި ގައުމީ އަދި އިޖުތިމާއީ އަގުތައް ކުރިއަރުވާ އެންމެ މޮޅު ފިލްމުގެ އެވޯޑް ލިބުނީ "ކެޕްޓަން މިލާ" އަށެވެ.

މި ފަހަރުގެ ނެޝަނަލް އެވޯޑަކީ ފަހުގެ ތާރީޚެއްގައި ބޭއްވި އެންމެ ވާދަވެރި އެއް އެވޯޑެވެ. އެގޮތުން 'އޯލް ވީ އިމޭޖިން އޭޒް ލައިޓް' އަދި 'ލާޕަތާ ލޭޑީސް' ފަދަ ބެލުންތެރިންގެ ތައުރީފު ލިބުނު ފިލްމުތަކާއި، 'ޕުޝްޕާ 2: ދަ ރޫލް'، 'ސްޓްރީ 2'، 'މަންޖުމަލް ބޯއީސް' އަދި 'ޕްރޭމަލޫ' ފަދަ ބޮޑު އާމްދަނީއެއް ހޯދި ފިލްމުތަކުގެ މެދުގައި ބޮޑު ވާދަވެރިކަމެއް ވަނީ އުފެދިފައެވެ.

މި އަހަރުގެ ނެޝަނަލް އެވޯޑު ހައްގުވާ ފަރާތްތައް ހޮވާފައިވަނީ ތަޖުރިބާކާރު ފިލްމު އުފެއްދުންތެރިޔާ ޖަޔަރާޖް އިސްކޮށް ހުންނަވައިގެން އެކުލަވާލި 11 މެންބަރުންގެ ޖޫރީ ކޮމިޓީއަކުންނެވެ. މި އެވޯޑްތައް އިއުލާންކުރީ ނިއު ދިއްލީގެ ނޭޝަނަލް މީޑިއާ ސެންޓަރުގައި ބޭއްވި ރަސްމިއްޔާތެއްގައެވެ.