ފަތުރުވެރިންނަށް ވިސާއާ ނުލައި ތައިލެންޑަށް އެތެރެވެވޭ މުއްދަތު ދެބައިކުޅަ އެއްބަޔަށް ކުރުކުރުމަށާއި، ގިނަ ގައުމުތަކަކަށް ދީފައިވާ ލުއިތައް އުވާލުމަށް އެ ގައުމުގެ ކެބިނެޓުން ނިންމި ނަމަވެސް، ދިވެހިރާއްޖެ ހިމެނޭ ގޮތަށް ބައެއް ގައުމުތަކަށް ވިސާގެ އާ ލުއިތަކެއް ދީފައެވެ.
ތައިލެންޑުގެ ކެބިނެޓުން އިއްޔެ ނިންމާފައިވަނީ މީގެ ކުރިން 93 ގައުމަކަށް ދީފައިވާ 60 ދުވަހުގެ ވިސާ ފްރީ މުއްދަތު އުވާލުމަށެވެ. ކެބިނެޓުގެ ވަޒީރުން ވިދާޅުވި ގޮތުގައި މި ނިންމުން ނިންމެވީ، ގާނޫނާ ހިލާފު އަމަލުތައް ހިންގުމަށާއި ގައުމީ ސަލާމަތަށް ނުރައްކާވާ ފަދަ ގޮތްގޮތަށް މި ނިޒާމުގެ ނާޖާއިޒު ފައިދާ ނަގަމުންދާތީއެވެ.
އަލަށް ހަމަޖެއްސި އުސޫލުގެ ދަށުން، ވިސާއާ ނުލައި 30 ދުވަހުގެ މުއްދަތަކަށް އެތެރެވެވޭނީ 59 ގައުމެއްގެ ރައްޔިތުންނަށެވެ.
މި ބަދަލާއެކު ހަ ގައުމަކަށް ވިސާގެ އިތުރު ލުއިތަކެއް ލިބިގެންދާނެއެވެ. އޭގެ ތެރޭގައި ދިވެހިރާއްޖޭގެ އިތުރުން ބަލްގޭރިއާ، ކްރޮއޭޝިއާ، ސައިޕްރަސް، އިންޑިއާ އަދި މޯލްޓާ ހިމެނެއެވެ. މީގެ އިތުރުން، ވިލާތުގެ އިއްތިހާދު (ޔޫރަޕިއަން ޔޫނިއަން - އީޔޫ) ގެ މެންބަރު 27 ގައުމަށް ވެސް ހަމަހަމަ ވިސާގެ ލުއިތަކެއް ދިނުމަށް ވަނީ ނިންމާފައެވެ.
މީގެ ދެ މަސް ކުރިން ތައިލޭންޑުން ވަނީ ދިވެހީންނަށް ވިސާއާ ނުލައި އެ ގައުމުގައި ތިބެވޭނީ ގިނަ ވެގެން 15 ދުވަހަށް ކަމަށް ނިންމައިފައެވެ. ނަމަވެސް އެ އުސޫލަށް މި ވަނީ ލުއި ދީފައެވެ.
ކެބިނެޓުން ފާސްކުރި އާ އުސޫލުގެ ދަށުން، ސީޝެލްސް އަދި މޮރިޝަސްގެ ރައްޔިތުންނަށް 15 ދުވަހުގެ ވިސާ-ފްރީ މުއްދަތެއް ލިބޭނެއެވެ. އަދި އަޒަރުބައިޖާން، ބެލަރޫސް އަދި ސާބިއާގެ ރައްޔިތުންނަށް އޮން-އެރައިވަލް ވިސާގެ ހިދުމަތް ދިނުމަށް ވަނީ ހަމަޖެހިފައެވެ.
ވިސާގެ އުސޫލުތަކަށް ގެނައި މި ބަދަލުތަކަށް އަމަލުކުރަން ފަށާނީ، ތައިލެންޑުގެ ރޯޔަލް ގެޒެޓުގައި ޝާއިއުކުރާތާ 15 ދުވަސް ފަހުންނެވެ. ނަމަވެސް، މި އާ ގަވާއިދުތަކަށް އަމަލުކުރަން ފެށުމުގެ ކުރިން ތައިލެންޑަށް އެތެރެވެފައިވާ ބިދޭސީންނަށް، އެ މީހުންނަށް ފުރަތަމަ ދޫކޮށްފައިވާ ހުއްދައިގެ މުއްދަތު ހަމަވަންދެން އެ ގައުމުގައި ތިބެވޭނެއެވެ.